13
Samea
saran nia kbiit ba balada ida
1
Tuir mai ha’u hare balada ida sai housi tasi laran; nia iha ulun hitu no
dikur sanulu, ho fatuk murak sanulu iha dikur sanulu ida-ida, no hakerek tiha
iha nia ulun sira liafuan aat hasouru Maromak. 2 Ha’u
hare katak balada ne’e hanesan leopardu, nia ain hanesan ursu nian ho ibun
hanesan leaun nian; samea saran tiha nia kbiit no nia kadunan no nia ukun iha
raiklaran ba balada ne’e. 3 Ha’u hare katak iha nia
ulun ida, iha kanek boot maibe kanek ne’e diak tiha ona, no ne’e hotu tiha,
raiklaran tomak hakfodak hodi la’o tuir balada ne’e. 4 Sira
adora samea ne’e basa nia saran tiha ona ba balada nia ukun tomak; no sira
adora balada hodi dehan, “Se mak bele sai hanesan balada ne’e? Se mak bele halo
funu hasouru nia?” 5 Balada ne’e bele hateten lia
loko an nian no lia aat hasouru Maromak no ba fulan haat nulu resin rua, nia simu kbiit atu halo buat naran nebe nia
hakarak; 6 no nia koalia lia aat hasouru Maromak,
hasouru Maromak nia naran, hasouru nia Tenda lalehan nian no hasouru sira hotu
nebe subar iha neba. 7 Nia simu mos kbiit atu halo
funu hasouru santu sira hodi manan sira. Nia bele ukun rasa, povu, lia no
nasaun sira hotu; 8 no povu tomak raiklaran nian
sei adora nia, katak, sira hotu nebe sira nia naran la hakerek iha livru moris
Bibi Oan nebe ema oho tiha nian, houri raiklaran hahu. 9 Se
mak iha tilun atu rona, rona ba: 10 Sira nebe iha
destinu atu tama iha dadur laran sei tama duni neba; sira oho ema ho surik ten
ke mate mos nune’e. Tan ne’e mak santu sira ten ke laran metin no fiar to’o
rohan.
Profeta
bosok ida nudar balada nia atan
11 Tuir mai, ha’u hare
balada seluk sai housi rai okos; nia iha dikur rua hanesan bibi oan nian, maibe
halo tarutu hanesan samea boot ida. 12 Balada seluk
ne’e iha kbiit hanesan balada uluk nian iha fatin nebe nia hela, hodi halo
raiklaran no ema hotu iha nia adora balada uluk nebe kanek boot maibe diak ona.
13 Nia halo milagre bo-boot sira, hanesan haruka
ahi tun housi lalehan ba rai iha ema sira nia oin. 14 Housi
milagre sira ne’e nebe nia bele halo iha balada uluk nia oin, nia lohi ema
raiklaran sira hodi halo sira harii estatua hodi hahi balada uluk ne’e nebe
surik hakanek tiha maibe sei moris hela. 15 Nia
bele hu’u iis hanesan moris nian ba estatua ne’e, nune’e estatua ne’e bele
koalia, hodi haruka oho sira nebe lakohi adora balada uluk nia estatua ne’e. 16
Nia haruka mos ema hot-hotu, kiik ka boot, riku ka kiak, atan ka la’os
atan, atu simu sinal iha nia liman kuana ka iha nia rentos, 17
nune’e ema la bele sosa ka fa’an buat ruma wainhira nia seidauk simu
sinal balada nia naran nian ka nia naran nia numeru. 18 Tan
ne’e, ema ten ke sai matenek. Ema matenek karik, nia bele hatene balada nia
numeru: numeru ne’e ema nian, numeru ne’e 666.
|