14
Bibi
Oan nia maluk
1
Tuir
mai, ha’u hare iha ha’u nia visaun Foho Siao. Bibi Oan hamriik iha nia leten
hamutuk ho ema rihun atus ida haat nulu resin haat; hakerek tiha iha sira hotu
nia rentos Bibi Oan no nia Aman nia naran. 2 Ha’u
rona tarutu nebe mai housi lalehan hanesan tasi boot nia tarutu ka rai tarutu
ida; hanesan knananuk housi ema sira nebe toka harpa. 3 Iha
kadunan nia oin, sira hananu knananuk foun ida iha balada haat no katuas sira
nia oin, knananuk ida nebe ema rihun atus ida haat nulu resin haat nebe hetan
ona maksoin housi raiklaran deit mak bele hatene. 4 Sira
ne’e mak sira nebe la lakon sira nia laran mos hodi la halo sala foer ho feto
ruma; sira la’o tuir Bibi Oan ba fatin hotu nebe Nia ba; sira ne’e hetan
maksoin iha ema sira leet atu sai ai-fuan uluk ba Maromak no ba Bibi Oan. 5
Sira la husik lia bosok ruma liu housi sira nia ibun basa la bele hetan
sala iha sira.
Anju
fo hatene loron tesi lia nian
6 Tuir mai, ha’u hare
anju seluk tan, semu aas liu iha lalehan, atu haklaken evangeliu rohan laek ba
ema hotu nebe horik iha rai, nasaun, rasa, lia no suku. 7
Nia hakilar ho lia maka’as: “Tauk Maromak ba hodi fo gloria ba Nia, basa
tempu to’o ona ba Nia atu tesi lia; imi adora Ida nebe halo lalehan no rai no
tasi no be matan hotu.”
8 Anju seluk tan tuir nia
hodi hakilar: “Babilonia monu ona, Babilonia sidade boot monu tiha; nia nebe
halo nasaun sira raiklaran tomak hemu tua nia laran foer nian.”
9 Anju ida tan tuir mai
hodi hakilar ho lia maka’as: “Sira hotu nebe adora balada no nia estatua, ka
simu nia sinal iha sira nia liman eh rentos 10 sei
hemu tua Maromak nia laran nakali nian, nebe fui tiha ona la kahur ho be iha
nia kopu hirus nian. Sira sei hetan kastigu iha ahi no fatuk iha anju santu
sira no Bibi Oan nia oin 11 no suar sira nia
kastigu nian sei sa’e nafatin ba nafatin. Sira hotu nebe adora balada ka nia
estatua ka simu sinal ho nia naran sei la hakmatek kalan eh loron.
12
Tan
ne’e sira nebe halo tuir Maromak nia ukunfuan sira no fiar Jesus Kristu ten ke
sai laran metin.”
13
Tuir
mai, ha’u rona lia ida housi lalehan dehan: “Hakerek ba: rahun diak ba sira
nebe mate iha Na’i! Rahun diak duni, Espiritu dehan; basa sira bele hakmatek
ona ba nafatin housi sira serbisu, basa sira nia hahalok diak la’o hamutuk ho
sira.”
Gentiu
sira ko’a hare no ku’u uvas
14 Iha ha’u nia visaun,
ha’u hare kalohan mutin ida, no iha nia ema ida tur hela; hanesan Oan Mane ho
koroa osan mean nian iha nia ulun no tudik ko’a hare nian iha nia liman. 15
Anju ida tan sai housi santuariu, no hakilar ho lia maka’as ba ida nebe
tur hela iha kalohan: “Kaer o nia tudik ba hodi ko’a hare: tempu atu ko’a to’o
ona, no hare raiklaran nian tasak ona. 16 Ne’e
duni, ida nebe tur iha kalohan leten hahu ko’a hare iha rai, no rai nia fulin
ko’a hotu ona.
17 Anju seluk tan sai
housi templu iha lalehan; nia mos kaer tudik kroat ida. 18
Anju ida tan sai housi altar; nia mak ukun ahi. Nia hakilar ba ida nebe
kaer tudik kroat: “Kaer o nia tudik ba hodi ku’u uvas sira hotu iha raiklaran;
basa uvas sira tasak ona.” 19 Nune’e, anju hahu
serbisu iha rai no ku’u iha to’os uvas sira hotu rai ne’e nian hodi hatama nia iha
fatin boot atu sama uvas. 20 Ne’e mak fatin Maromak
nia laran nakali nian, iha sidade nia liur, iha nebe ema sama uvas ne’e to’o
ran nebe sai housi fatin ne’e sa’e aas
to’o kuda nia tali hodi taka rai dook to’o liman rohan ba liman rohan nia
sasukat rihun ida atus neen.
|