15

Sinal boot no furak iha lalehan

                ¹ Iha lalehan, ha’u hare sinal boot no furak: anju na’in hitu lori susar boot hitu nebe ikus liu, basa sira ne’e hato’o ona Maromak nia laran nakali hotu. ² Ha’u hare tasi kiik hanesan vidru nakonu ho ahi, no besik tasi vidru ne’e mak sira hotu nebe halo funu hasouru balada hodi manan, no hasouru nia estatua no numeru nebe hatudu nia naran. Sira hotu kaer harpa housi Maromak; ³ sira hananu knananuk ida Moises, Maromak nia atan, nian no Bibi Oan nian dehan: “Na’i Maromak kbiit wa’in, Ita Boot nia hahalok sira boot no furak. Liurai nasaun sira nian, Ita Boot nia dalan sira los teb-tebes. ⁴ O Na’i, se mak la tauk no fo gloria ba Ita Boot nia naran? Basa, Ita Boot mesak mak santu, no nasaun sira hotu sei mai hodi adora Ita Boot tan hahalok justisa nian nebe Ita Boot hatudu.”

Bikan hitu susar boot sira nian

                ⁵ Ne’e hotu tiha, iha ha’u nia visaun, templu tenda sasin nian nakloke iha lalehan. ⁶ Anju na’in hitu nebe lori susar boot hitu mosu mai housi templu ne’e. Sira hatais hena lana nian mesa mutin nebe futukabun osan mean nian kesi metin iha sira nia knotak.  ⁷ Balada haat sira ida fo ba anju na’in hitu bikan osan mean nian hitu nakonu ho Maromak, nebe moris nafatin ba nafatin, nia laran nakali. ⁸ Templu nakonu ho suar housi Maromak nia gloria no kbiit, nune’e ema ida la bele tama iha nia to’o susar boot hitu housi anju na’in hitu liu tiha ona.