17

Babilonia boot

                ¹ Anju na’in hitu sira ida nebe kaer bikan hitu hakbesik hodi dehan mai ha’u, “Mai no ha’u sei hatudu ba o kastigu nebe sei fo ba feto aat boot nebe tur hodi ukun besik be barak, ² ida nebe halo sala foer hamutuk ho liurai sira hotu raiklaran nian, no halo ema hotu raiklaran nian lanu ho nia tua sala foer nian.” ³ Anju ne’e lori ha’u iha espiritu ba rai fuik maran, no iha neba ha’u hare feto ida tur hela iha balada mean nia leten; balada ne’e iha ulun hitu no dikur sanulu no liafuan aat barak hasouru Maromak hakerek hela hodi taka nia isin tomak. ⁴ Feto ne’e hatais hena mean mesa furak, ho osan mean no fatuk murak no perola hafutar nia; iha nia liman, nia kaer kopu osan mean nian nakonu ho buat foer nian housi nia sala foer sira; ⁵ naran ida hakerek hela iha nia rentos, naran nebe ema la hatene: “Babilonia boot, feto aat sira nia inan no buat aat hotu raiklaran nian nia inan.” ⁶ Ha’u hare katak feto ne’e lanu ho santu sira nia ran no ho Jesus nia martir sira nia ran. Buat ne’e halo ha’u hakfodak teb-tebes.

⁷ Anju dehan mai ha’u, “Tansa o hakfodak? Ha’u sei dehan ba o misteriu ne’e kona ba feto ne’e no balada ho ulun hitu no dikur sanulu nebe lori nia.”

Balada no feto katak sa

                ⁸ “Balada nebe o hare iha uluk maibe ohin la iha ona; nia sei mai housi rai klean, maibe nia sei mohu lakon deit. No ema raiklaran sira nebe, houri raiklaran hahu, sira nia naran la hakerek iha livru moris nian, sei hakfodak wainhira sira hare balada ne’e, basa nia iha uluk, ohin la iha ona, hafoin nia sei mai fali tan. ⁹ Iha ne’e ema presisa matenek atu hatene: ulun hitu mak foho oan hitu nebe feto tur iha sira nia leten. ¹⁰ Ulun hitu mos mak liurai boot na’in hitu. Sira ne’e na’in lima monu tiha ona; sira ida sei hela ohin, no ida sei mai, maibe wainhira nia to’o mai, nia sei hela ba tempu badak deit.  ¹¹ Balada nebe iha uluk, maibe ohin la iha ona, mak liurai nebe tuir sira na’in hitu, maibe mos mak sira na’in hitu ikus liu, no nia la’o ba oin atu mohu lakon. ¹² Dikur sanulu mak liurai sanulu nebe seidauk simu sira nia kbiit liurai nian; maibe sira sei simu sira nia kbiit ba oras ida deit hamutuk ho balada. ¹³ Sira neon ida deit atu saran sira nia kbiit no ukun ba balada; ¹⁴ no sira sei halo funu hasouru Bibi Oan; maibe Bibi Oan sei halo lakon sira hotu, basa Nia mak Na’i na’i sira nian no Liurai liurai sira nian. Sira nebe hela ho Bibi Oan mak sira nebe Maromak bolu no fihir no laran metin.”

                ¹⁵ Anju dehan tan: “Be barak sira nebe o hare besik fatin nebe feto aat tur hela, mak povu sira, ema lubun boot sira, nasaun sira no lia sira. ¹⁶ No dikur sanulu nebe o hare: sira no balada sei foti liman hasouru feto aat ne’e, hodi kolu nia hatais no husik nia isin tanan; sira sei han nia isin lolon hodi sunu nia iha ahi laran,  ¹⁷ basa Maromak tau ona iha sira nia laran atu hala’o Nia hakarak hodi saran sira nia kbiit ba balada nia hakarak to’o tempu nebe Maromak nia liafuan sei kumpri lo-los. ¹⁸ Feto nebe o hare mak sidade boot nebe iha kbiit atu ukun liurai sira hotu raiklaran nian.”