18

Anju fo hatene katak Babilonia sei lakon

                ¹ Ne’e hotu tiha, ha’u hare anju ida tan tun mai housi lalehan; nia simu tiha kbiit wa’in; nia gloria leno raiklaran tomak. ² Nia hakilar ho lia maka’as, “Babilonia lakon ona; nia sai tiha diabu sira nia uma, espiritu aat sira hotu nia fatin no manu foer no aat sira nia knuuk, ³ basa nasaun sira hotu lanu tiha ho nia tua sala foer nian; liurai raiklaran sira hotu halo sala foer ho nia, no ema kontratu na’in sai riku ho rikusoi nia moris aat nian.”

                ⁴ Ha’u rona lia foun iha lalehan nebe dehan: “Mai, ha’u nia povu, hadook housi nia, atu imi la bele halo parte iha nia hahalok aat hodi hetan susar hanesan nia. ⁵ Nia sala sira to’o ona lalehan, no Maromak hanoin hetan nia sala sira. ⁶ Halo ba nia buat nebe nia halo ba sira seluk, selu nia dala rua liu fali nia hahalok sira; halo dala rua maka’as liu buat nebe nia atu hemu. ⁷ Fo ba nia susar no terus ho sasukat hanesan nia hahalok no moris aat nian. Nia dehan ba nia an, ‘Ha’u tur iha kadunan nudar liurai feto ida,’ no ‘ha’u la’os feto faluk ida no sei la tanis iha ha’u nia moris tomak.’ ⁸ Tan ne’e, nia sei hetan susar boot sira iha loron ida deit; isin moras, mataben no hamlaha boot. Ahi sei han nia; basa Na’i nebe kbiit wa’in sei tesi lia aat hasouru nia.”

Ema raiklaran tanis tan Babilonia

                ⁹ Liurai raiklaran nian nebe halo sala foer hamutuk ho nia no moris iha nia rikusoi sei tanis no laran susar tan nia ¹⁰ wainhira  sira hare suar housi ahi nebe han nia. Sira sei hare housi dook tan sira tauk hetan nia susar sira. Sira sei dehan, “Tanis, tanis ba tan sidade boot; Babilonia, sidade kbiit maka’as, maibe hetan susar boot iha oras ida deit nia laran.” ¹¹ No kontratu na’in sira raiklaran nian sei tanis no laran susar tan nia wainhira ema la sosa ona buat nebe sira fa’an; ¹² osan mean no osan mutin, fatuk murak no perola; hena furak no riku oi-oin, ai-morin, marfim no ai diak, besi rite, besi ka fatuk mutin; ¹³ ai tahan morin no temperu, naan horun, mina kumu no kiar ben morin; tua, mina, farina no batar; vaka, bibi, kuda no kuda kareta, atan sira, ema nia isin no klamar! ¹⁴ “Ai-fuan sira hotu nebe o hadomi liu la iha ona; o nia moris ho rikusoi no gloria lakon hotu tiha ba nafatin no sei la fila tan.”

¹⁵ Kontratu na’in sira nebe sai riku tan nia sei hamriik housi dook tan sira tauk hetan nia terus, susar no mataben. Sira sei dehan: ¹⁶ “Tanis, tanis ba tan sidade boot ida ne’e; basa hena furak no mean nebe o hatais uluk; tan o nia osan mean no fatuk murak no perola, ¹⁷ o nia rikusoi sira hotu lakon iha oras ida deit nia laran.”

                Bero boot sira nia ulun no sira hotu nebe serbisu ho nia, ro nia serbisu na’in sira no sira hotu nebe moris housi tasi sei hamriik housi dook, ¹⁸ hodi hare suar housi ahi nebe han nia; sira sei dehan, “Iha sidade nebe boot liu fali ida ne’e?” ¹⁹ Sira tau rai rahun iha sira nia ulun hodi dehan ho mataben no tanis, “Tanis, tanis ba basa sidade boot ne’e iha nebe sira hotu nebe iha ro hetan funan boot, sei rahun hotu iha oras ida nia laran.”

                ²⁰ “Lalehan, imi santu sira hotu, apostolu no profeta sira, haksolok ba, tan nia lakon ona: Maromak tesi tiha lia hasouru nia tan imi.”

                ²¹ Tuir mai, anju kbiit na’in ida foti fatuk boot ida hanesan fatuk dulas batar nian, soe nia ba tasi laran hodi dehan, “Nune’e mak sei soe sidade boot Babilonia nian; ema sei la hare nia tan, ²² no ema sei la rona tan iha o nia laran knananuk harpa no ema nian, no mos musika housi flauta no trombeta; ema sei la hetan tan badaen oi-oin sira; ema sei la rona tan tarutu dulas batar nian; ²³ ahi oan sei la lakan tan; ema sei la rona tan noivu no noiva sira nia lia iha o; basa o nia kontratu na’in sira mak ukun raiklaran tomak; no o nia hahalok sira lohi nasaun sira hotu. ²⁴ Iha nia, ema hetan profeta no santu sira nia ran, no ema hotu nian nebe nia ran fakar tiha iha raiklaran.”