21
Jerusalem
lalehan
1 Tuir mai ha’u hare lalehan foun no rai foun; lalehan uluk nian no rai uluk
nian lakon mohu tiha, no tasi la iha ona. 2 Ha’u
hare sidade santa, Jerusalem foun, tun mai housi Maromak iha lalehan, furak
hanesan noiva nebe hatais tiha ba nia laen. 3 Ha’u
rona lia maka’as ida hakilar housi kadunan dehan, “O hare sidade ne’e? Ne’e mak
Maromak nia horik fatin iha ema sira leet. Nia sei halo nia uma iha sira leet;
sira sei sai nia povu no Nia sei hela ho sira no sai sira nia Maromak. 4
Nia sei hamaran sira nia mataben housi sira nia matan; mate la iha ona,
no ema sei la tanis tan eh laran susar, basa sasan raiklaran uluk nian liu tiha
ona.”
5 Tuir mai, Ida nebe tur
iha kadunan dehan: “Ohin Ha’u halo foun buat tomak.” Nia dehan tan, “Hakerek ida ne’e: katak buat
nebe Ha’u dehan tebes duni no sei mosu mai.” 6 Nia
dehan tan mai ha’u, “Buat ne’e hotu ona. Ha’u mak Alfa no Omega, hun no rohan.
Ha’u sei fo be housi be matan moris nian be ema nebe hamrook, fo deit la fa’an.
7 Ida nebe manan sei simu liman rohan nee: no Ha’u
sei sai nia Maromak no nia sei sai Ha’u oan. 8 Maibe
ba taukten sira, ba sira nebe la halo tuir sira nia liafuan, ba sira nebe oho
ema ka halo sala foer, ba sira nebe si’ik futuru, sira nebe adora lulik ka
bosokten oi-oin; sira nia kolen mak mate ba dala rua iha tasi ahi ensofre nian.
Jerusalem
foun
9 Anju sira na’in hitu
ida nebe iha bikan hitu nakonu ho susar boot hitu ikus nian mai koalia ho ha’u dehan,
“Mai iha ne’e, ha’u sei hatudu ba o noiva nebe Bibi Oan hola tiha.” 10
Iha espiritu, nia lori ha’u ba foho aas liu nia tutun; nia hatudu mai
ha’u Jerusalem, sidade santa, tun mai housi Maromak housi lalehan. 11
Maromak nia gloria nabilan tomak hale’u nia. Fatuk murak oi-oin hafutar
nia. 12 Nia lutu aas liu ho odamatan boot sanulu
resin rua. Iha odamatan boot ida-ida, anju ida hamriik no uma-kain sanulu resin
rua Israel ninian nia naran hakerek tiha iha odamatan sira nia leten. 13
Iha lorosa’e odamatan tolu, iha tasifeto odamatan tolu, iha tasimane
odamatan tolu no iha loromonu odamatan tolu. 14 Sidade
nia lutu ne’e hamriik iha fatuk boot sanulu resin rua nia leten. Apostolu
sanulu resin rua Bibi Oan nian ida-ida nia naran hakerek iha fatuk sira ne’e.
15 Anju nebe koalia mai
ha’u dau-daun lori fafulu osan mean nian ida atu sukat sidade, nia odamatan
sira no nia lutu sira. 16 Sidade ne’e nia planu los
liu; nia naruk hanesan nia luan. Nia sukat sidade ho nia fafulu. Sidade nia
naruk konta housi liman rohan ida ba liman rohan seluk nia naruk rihun sanulu
resin rua, nune’e mos nia luan no nia aas. 17 Nia
sukat nia lutu hodi konta nia aas housi sikun to’o liman rohan atus ida haat
nulu resin haat, anju usa sukat bai-bain. 18 Lutu
ne’e halo ho fatuk jaspe nian, sidade tomak ho osan mean diak liu, hanesan
vidru nabilan. 19 Lutu nia hun taka ho fatuk murak
oi-oin: jaspe, safira, kalsedonia, esmeralda, 20 sardonika,
kornalina, krisolitu, berilu, topasiu, krisoprasu, jasintu, ametista. 21
Odamatan sanulu resin rua halo ho perola sanulu resin rua, no odamatan
ida-ida mak perola boot ida deit. Sidade nia prasa osan mean diak liu, hanesan
vidru mo-mos. 22 Ha’u la hare templu ruma iha
sidade laran basa Na’i Maromak kbiit wa’in no Bibi Oan rasik mak templu, 23
no sidade ne’e la presisa loron ka fulan atu leno nia, basa Maromak nia
gloria leno nia no Bibi Oan mak nia ahi Oan. 24 Nasaun
gentiu sira nian sei la’o ho nia naroman no liurai raiklaran sira nian sei lori
sira nia riku soi ba nia. 25 Ema sei la taka nia
odamatan iha loron; iha neba kalan la iha, 26 no
nasaun sira sei mai hodi lori mai sira nia rikusoi no sasan tomak. 27
Buat foer ida la bele tama ba nia laran; ema nebe halo buat nebe foer eh
bosok la bele, maibe sira deit nebe hakerek tiha iha Bibi Oan nia livru moris
nian.
|