22

Mota moris nian

                ¹ Tuir mai, anju hatudu mai ha’u mota be moris nian, nabilan hanesan vidru, sai housi Maromak no Bibi Oan nia kadunan ² liu housi dalan sidade nian nia klaran. ³ Iha mota ne’e nia sorin rua iha ai-hun moris nian nebe fo fuan dala sanulu resin rua iha tinan ida nia laran, fuan oin ida ba fulan ida-ida, no nia tahan aimoruk diak ba nasaun sira. ³ La iha tan buat ida nebe iha malisan. Maromak no Bibi Oan nia kadunan sei hela iha nia fatin iha sidade; nia atan sira sei adora Nia. ⁴ Sira sei hare Nia oin ba oin, no Nia naran sei hakerek iha sira nia rentos. ⁵ Kalan la iha ona no sira sei la presisa tan ahi oan eh loron nia naroman, basa Na’i Maromak sei leno sira. Sira sei ukun nafatin ba nafatin.

⁶ Anju dehan mai ha’u, “Liafuan sira ne’e los tebes duni no sira sei mosu. Na’i Maromak, nebe haraik espiritu ba profeta sira, haruka tiha nia anju atu fo hatene ba Nia atan buat nebe sei mosu mai. ⁷ La kleur ha’u sei mai lalais.”

Rahun diak ba sira nebe rai hela ho laran lia menon profeta nian iha livru ne’e.

Joao fo sasin

                ⁸ Ha’u, Joao, rona no hare buat hotu ne’e. Wainhira ha’u rona no hare tiha buat ne’e hotu, ha’u hakneak atu adora anju nebe fo hatene sai buat hirak ne’e mai ha’u, ⁹ maibe nia dehan, “Keta halo nune’e: ha’u maluk atan hanesan o no o nia maun alin profeta sira, no hanesan sira nebe simu ho laran buat nebe o hakerek tiha iha livru ne’e; o ten ke adora Maromak.”

                ¹⁰ Nia dehan tan, “Keta rai subar deit lia menon sira iha livru ne’e, basa tempu besik ona. ¹¹ Husik ema maksalak halo sala nafatin ba, no sira nebe foer sai foer nafatin ba; sira nebe halo buat nebe diak halo diak ba, no sira nebe santu sai santu nafatin ba.”

¹² “La kleur tan, Ha’u sei mai lalais, hodi lori kolen nebe sei fo ba ema ida-ida tuir nia hahalok. ¹³ Ha’u mak Alfa no Omega, ida uluk no ida ikus nian, hun no rohan.”

¹⁴ Rahun diak ba sira nebe fase mos tiha sira nia hatais, atu sira hetan direitu atu han housi ai-hun moris nian no atu tama sidade liu housi odamatan sira. ¹⁵ Sira seluk ne’e sei  hela iha liur: asu, si’ik na’in, sira nebe halo sala foer, oho ema, eh adora lulik no sira hotu nebe bosok.

                ¹⁶ “Ha’u, Jesus, haruka tiha Ha’u nia anju atu fo hatene ba o lia sasin ne’e ba kreda sira. Ha’u mak David nia abut  no nia oan, no Ha’u mak fitun nabilan dader nian.”

                ¹⁷ Espiritu no Noiva dehan, “Mai.” Ema hotu nebe rona hatan ba: “Mai” Tuir mai, ema hotu nebe hamrook, mai: ema hotu nebe hakarak bele kuru be moris nian; simu deit lalika selu.

                ¹⁸ Ha’u hameno ba sira hotu nebe rona profesia sira iha livru ne’e: ema ruma tau tan buat ida ba sira ne’e, Maromak sei tau mos ba nia susar sira nebe temi ona iha livru ne’e; ¹⁹ ema ruma hasai buat ruma housi profesia sira iha livru ne’e, Maromak sei  hasai mos nia parte housi ai-hun moris nian no housi sidade santa, nebe temi ona iha livru ne’e.

²⁰ Ida nebe fo sasin ba buat sira ne’e  dehan: “Ha’u sei mai lalais duni”

Amen; mai, Na’i Jesus.

                ²¹ Na’i Jesus nia grasa hela ho imi hotu. Amen.