7

Hanoin aat ema

¹ “Imi keta hanoin aat ema, atu ema la bele hanoin aat imi. ² Basa imi hanoin aat ema karik, ema mos sei hanoin aat imi: hanesan imi sukat ema, nune'e mos ema sei sukat imi. ³ Tansa o hare du’ut lahan ida iha o nia maluk nia matan, maibe la hare ai-kabelak ida iha o nia matan rasik? ⁴ Oin sa o bele dehan ba o nia maluk: ⁵  ‘Husik ha'u hasai tiha du’ut lahan housi o nia matan,’ wainhira ai-kabelak ida sei hela o nia matan laran? O laran makerek, hasai uluk lai ai-kabelak housi o nia matan, hafoin mak o sei hare hodi hasai du’ut lahan housi o nia maluk matan.”

                ⁶ “Imi keta fo buat nebe santu ba asu sira, keta soe imi nia murak ba fahi sira, keta sira ne'e sama imi nia murak, hafoin fila hasouru imi hodi tata les imi.”

Orasaun nia folin boot

⁷ “Imi husu, imi sei simu; buka, sei hetan: tuku odamatan, odamatan sei nakloke. ⁸ Basa ema nebe husu, simu; ema nebe buka, hetan; no ema nebe baku, odamatan sei nakloke. ⁹ Imi ida nebe, nia oan husu karik paun, sei fo fatuk ba nia? ¹⁰ Ka, husu karik ikan, sei fo samea ida ba nia? ¹¹ Ne'e duni, imi sira, nebe ema aat, hatene fo buat diak ba imi nia oan sira, imi nia Aman iha lalehan sei fo fali buat diak liu tan ba sira nebe husu ba Nia.”

                ¹² “Ne'e duni, buat hotu nebe imi hakarak ema halo ba imi, imi mos sei halo buat ne'e ba sira; basa ida ne'e mak ukunfuan no Profeta sira.”

Dalan rua

¹³ “Imi tama housi odamatan kloot; basa odamatan boot no dalan luan mak lori ema ba malisan, no ema barak liu housi ne'e. ¹⁴ Maibe odamatan kloot tebes no dalan kiik duni mak lori ema ba moris, no ema uitoan deit mak hetan nia.”

Profeta bosok sira

¹⁵ “Imi matan moris kona ba profeta bosok sira nebe mosu ba imi nudar bibi sira, maibe iha laran sira asu fuik nehan kroat. ¹⁶ Imi sei hatene sira housi sira nia fuan. Ema ku'u uvas housi ai fuik, ka figueira housi ai-tarak? ¹⁷ Lo-los, ai hotu nebe diak fo fuan diak, no ai nebe aat fo fuan aat. ¹⁸ Ai diak la bele fo fuan aat, no ai aat la bele fo fuan diak. ¹⁹ Ai sira nebe la fo fuan diak sei tesi tiha hodi soe ba ahi. ²⁰ Ne'e duni, housi sira nia fuan mak imi sei hatene sira.”

Eskolante diak los

                ^21“ La’os ema nebe dehan mai  Ha’u: ‘Na’i, Na’i!’ mak sei tama iha reinu lalehan, maibe ema nebe halo tuir Ha’u Aman iha lalehan nia hakarak. ²² Ema barak sei dehan mai Ha’u iha loron neba: ‘Na’i, Na’i, la’os hodi Ita Boot nia naran mak ami koalia lia profeta nian, duni sai tiha diabu sira, no mos halo milagre barak?’ ²³ Iha oras neba Ha’u sei hatan ba sira: ‘Ha’u la hatene imi; hadook an tiha housi Ha’u,  imi sira nebe halo aat.’”

²⁴ “Ema nebe rona Ha’u nia liafuan hirak ne’e hodi  moris tuir, nia hanesan ema matenek nebe harii nia uma iha fatuk leten; ²⁵ udan tau, mota suli, anin hu’u hasouru uma ne’e, maibe uma la monu basa hamriik iha fatuk leten. ²⁶ Ema nebe rona Ha’u nia liafuan hirak ne’e, maibe la halo tuir, nia hanesan ema beikten nebe harii nia uma iha rai henek leten. ²⁷ Udan tau, mota suli, anin hu’u hasouru hodi sobu uma ne’e; sobu duni aat liu.”

                ²⁸ Wainhira Jesus koalia hotu tiha, ema lubun hakfodak ho nia doutrina, ²⁹ basa Nia hanorin sira hanesan ema nebe iha kbiit, la’os hanesan eskriba no fariseu sira.