8

Ema moras lepra hetan diak

¹ Wainhira Nia tun housi foho, ema lubun boot ida la’o tuir Nia, ² Iha oras neba, ema moras lepra ida mai monu iha nia oin hodi dehan ba Nia: “Na’i, Ita boot hakarak karik, bele hamos atan oan.” ³ Jesus lolo liman, kona nia, dehan: “Ha’u hakarak, sai mos ba!” Iha oras neba kedas nia moras lakon. ⁴ Maibe Jesus hateten ba nia: “O keta dehan ba ema ida, maibe ba hatudu an ba am’lulik hodi hasa’e buat karan nebe Moises haruka nudar sasin ba sira.”

Senturiaun nia atan

                ⁵ Tama tiha Kafarnaum, senturiaun ida hakbesik ba Nia hodi harohan: ⁶ “Na’i, ha’u nia atan latan iha uma, isin mate, terus aat liu.” ⁷ Jesus dehan ba nia; “Ha’u sei ba halo nia sai diak.” Senturiaun simu fali ⁸ “Na’i, ha’u la soi Ita boot tama iha ha’u nia uma laran, maibe Ita boot koalia lia ida deit, ha’u nia atan sei hetan isin diak; ⁹ basa ha’u mos tuir sira nebe ukun ha’u, no mos iha soldadu sira nebe tuir ha’u. Ha’u dehan ba ida, ‘O ba,’ nia ba; ba ida seluk, ‘Halo ne’e,’ nia halo.” ¹⁰ Rona tiha nia,  Jesus hakfodak hodi dehan ba sira nebe tuir Nia: “Tebes Ha’u dehan ba imi, Ha’u seidauk hetan ema ida ho fiar boot hanesan ne’e iha Israel. ¹¹ Ha’u dehan ba imi katak housi lorosa’e no loromonu ema barak sei mai tur iha mesa ho Abraao, Isaac no Jacob iha reinu lalehan nian; ¹² maibe reinu nia oan sira sei soe ba nakukun iha liur, iha neba sira sei tanis hodi ruun nehan.”  ¹³ Hafoin Nia dehan ba senturiaun: “Ita la’o ona ba, buat hotu sei sai tuir ita nia fiar.” Iha duni oras neba, atan hetan fali isin diak.

Pedro nia banin feto

¹⁴ Tuir mai, tama tiha iha Pedro nia uma hodi hare nia banin feto nebe moras toba hela. ¹⁵ Jesus kaer nia liman, isin manas husik tiha nia. Nia hamriik  mai hodi hahu serbi sira.

                ¹⁶ Iha loraik, sira lori mai to’o Nia ema barak ho diabu iha laran. Nia duni sai lulik sira ho nia liafuan hodi fo isin diak ba sira hotu nebe moras. ¹⁷ Ne’e atu halo tuir buat nebe profeta Isaias dehan: ‘Nia sei simu ita nia moras hodi lori ita nia moras hodi lori ita nia terus.’ ¹⁸ Hare tiha ema lubun boot hale’u Nia, Jesus hakotu atu hakat liu ba sorin balun ba.

Atu tuir Jesus, husik buat hotu

¹⁹ Eskriba ida mai hasouru Nia, dehan: “Mestre, ha’u sei tuir Ita ba fatin hotu nebe Ita ba.” ²⁰ Jesus dehan ba nia; “Laku sira kuak iha, manu sira lalehan nian knuuk iha; maibe Oan Mane fatin la iha atu tau nia ulun.”

²¹ Eskolante ida fali hateten ba Nia: “Na’i, husik ha’u ba uluk lai hakoi ha’u nia aman.” ²² Maibe Jesus hatan ba nia: “O mai tuir Ha’u; husik mate sira hakoi sira nia mate.”

Tasi boot hakmatek

²³ Tuir mai Jesus sa’e ba ro hamutuk ho Nia eskolante sira. ²⁴ Teki-teki, tasi hahu si’ak maka’as, laloran taka ro tomak, maibe Nia toba dukur hela. ²⁵ Eskolante sira hakbesik ba Nia hodi fanu Nia, dehan: “Na’i, soi ami, ami atu mate.” ²⁶ Jesus dehan ba sira: “Tansa imi tauk, imi sira nebe fiar namlele?” Hafoin Nia hamriik hodi haruka anin ho tasi, no buat hotu hakmatek. ²⁷ Ema sira hakfodak hodi dehan: “Ema ne’e se los, nebe anin ho tasi mos halo tuir deit.

Ema sira ho diabu iha laran sai diak fali

²⁸ To’o tiha sorin balun ba, iha rai Gadara, ema na’in rua diabu iha laran mai housi rate hasouru Nia. Sira si’ak la diak, halo ema ida la bele liu housi dalan neba. ²⁹ Teki-teki sira hakilar. “O hakarak sa ida housi ami, Jesus, Maromak Oan? Tempu seidauk to’o, O mai iha ne’e haterus ami?”

³⁰ Besik iha neba fahi lubuk ida han du’ut dau-daun. ³¹ Diabu sira husu ba Nia: “O duni sai karik ami, haruka ami ba fahi sira ne’e.” ³² Nia dehan ba sira: imi ba! Sira sai ba tama iha fahi sira, nebe haksoit housi rai tatinis ba tasi hodi mate hotu iha nebe laran. ³³ Fahi atan sira halai ba sidade, tomak sai mai hasouru Jesus. Hare sira diabu iha laran. ³⁴ Sidade tomak sai mai hasouru Jesus. Hare tiha Nia, sira husu ba Nia atu sai tiha housi sira nia rain.