Ema moras isin mate hetan diak
1
Liu tiha ne’e, Nia sa’e ba ro,
hakur tasi hodi ba iha ninia sidade. 2 Sira mai hatudu
ba Nia ema isin mate ida, latan hela iha hadak ida. Hare tiha sira nia fiar,
Jesus dehan ba ema moras: “Oan, laran metin ba, o nia sala sira hetan ona
perdua.” 3 Eskriba sira balun dehan iha sira nia
laran: “Ema ne’e hateten aat Maromak” 4 Hatene tiha
sira nia hanoin, Jesus dehan ba sira: Tansa imi hanoin aat iha imi nia laran? 5
Ida nebe mak la susar, dehan: ‘O nia sala sira hetan tiha perdua’, ka
dehan ‘O hamriik, la’o ba’? 6 Diak, atu imi hatene
katak iha rai Oan Mane iha kbiit atu kasu sala, Nia dehan ba ema isin mate; “O
hamriik tiha, foti o nia hadak, la’o ba o nia uma. 7 Nia
hamriik duni hodi la’o ba nia uma. 8 Hare tiha
ne’e, ema lubun hakfodak ho tauk hodi hasa’e gloria ba Maromak nebe fo ba ema
kbiit ida hanesan ne’e.
9 Sai tiha housi neba Jesus hare ema ida naran
Mateus tur hela iha kobra impostu fatin. Jesus dehan ba nia: “O tuir Ha’u mai!”
Nia Hamriik hodi tuir Jesus. 10 Tur tiha iha uma
laran, ema publikanu no maksalak barak mai tur ho Nia, hamutuk ho nia eskolante
sira. 11 Hare tiha ne’e, fariseu dehan ba eskolante
sira: “Nusa mak imi nia Mestre han hamutuk ho publikanu no maksalak sira? 12
Rona tiha sira, Jesus dehan: “La’os sira nebe isin diak mak kuran doutor,
maibe sira moras. 13 Imi buka hatene liafuan ne’e
katak sa: ‘Ha’u hakarak laran luak liu fali sakrifisiu.’ Basa Ha’u mai la’os
atu bolu ema diak sira, maibe ema maksalak sira.’
14
Liu tiha ne’e, Joao nia eskolante sira hakbesik ba Nia, dehan: “Tansa mak ami ho fariseu sira hadera an,
maibe o Nia eskolante sira lae?” 15
Jesus hatan ba sira: “Laen nia belun sira bele laran susar wainhira laen
sei hela ho sira? Loron sei to’o, wainhira ema sei hasai laen housi sira leet;
iha loron ne’e mak sira sei hadera an.”
16
“Ema ida la bele taka hena tuan nia kuak ho hena foun, basa hena foun les
hena tuan nia baluk, halo kuak sai boot liu. 17 Ema
la tau tua foun iha kusi tuan; lae karik, kusi nakfera, tua nakfakar no kusi
aat hotu. Tau tua foun iha kusi foun; nune’e buat rua ne’e ida la lakon.”
Feto moras ran suli sai. Jairo nia oan feto.
18 Wainhira Jesus koalia dau-daun ba sira,
sinagoga nia ulun ida hakbesik ba Nia hodi monu iha nia oin, dehan: “Ha’u nia oan feto foin mate; maibe Ita boot
hiit An mai tau liman ba nia, nia sei moris.”
19 Jesus hamriik hodi la’o tuir nia hamutuk
ho eskolante sira.
20
Iha oras ne’e, feto ida nebe ran suli sai tinan sanulu resin rua ona,
hakbesik ba Nia housi kotuk hodi kona nia tais ninin, 21 basa nia dehan iha nia laran:
“Ha’u kona karik ninia tais, ha’u sei hetan isin diak.” 22
Fila tiha ba kotuk, Jesus hare nia hodi dehan: “Ha’u oan, laran metin ba,
o nia fiar soi ona o.” Iha oras ne’e kedas, feto ne’e hetan fali isin diak.
23 Wainhira Nia to’o na’i ulun nia uma, hare
tiha ema haklalak no barak seluk hakilar maka’as. Nia dehan; 24
“Imi sai tiha. Labarik la mate; nia toba deit.” Sira hamnasa Nia. 25
Wainhira ema lubun sai ona, Nia tama ba laran, kaer labarik feto nia
liman, no labarik hamriik. 26 Lia kona ba buat ne’e
naklekar iha rai tomak neba.
27 Jesus sai housi neba, ema matan delek na’in
rua tuir Nia hodi hakilar, dehan: “David nia Oan, sadia ami.” 28
To’o tiha uma, matan delek sira hakbesik ba Nia. Jesus dehan ba sira:
“Imi fiar, katak Ha’u bele halo buat ne’e?” Sira hatan ba Nia: “Ami fiar,
Na’i!” 29 Nia kona sira nia matan, dehan: “Sai diak
ba tuir imi fiar ba!” 30 Sira nia matan nakloke.
Jesus hateten ba sira ho lia maka’as; “Keta fo hatene buat ne’e ba ema ida.” 31
Maibe, sai tiha, sira halo Nia naran boot iha rai neba tomak.
32
Sira foin sai tiha, ema lori ba Nia ema monok ida ho diabu iha laran. 33
Jesus duni sai diabu no ema monok ne’e koalia ona. Ema lubun hakfodak
hodi dehan: “Ema ida seidauk hare buat
ruma hanesan ne’e iha Israel.” 34
Maibe fariseu sira dehan: “Hodi diabu sira nia ulun mak Nia duni sai
diabu sira.”
35 Jesus la’o lemo sidade ho knua sira hodi
hanorin iha sinagoga sira no haklaken liafoun diak reinu nian; fo mos isin diak
ba ema moras sira no ba sira hotu nebe terus. 36 Hare
tiha ema lubun boot, Nia hanoin teb-tebes sira, basa sira kole no neon nakraik,
hanesan bibi sira nebe bibi-atan la iha. 37 Tan
ne’e Nia dehan ba eskolante sira: “To’os boot duni, maibe to’os atan uitoan. 38
Ne’e duni imi harohan ba to’os na’in atu haruka to’os atan sira ba nia
to’os.”
|