10

Jesus fihir apostolu sira hodi fo knaar ba sira

¹ Nia bolu nia eskolante sira na’in sanulu resin rua hodi fo kbiit ba sira atu duni sai espiritu foer sira, no mos atu fo isin diak ba sira hotu nebe terus moras oi-oin. ² Apostolu sira naran mak ne’e: ida uluk, Simao nebe hanaran Pedro, ho nia alin Andre; Tiago, Zebedeu nia oan, ho nia alin Joao; ³ Filipe ho Bartolomeu, Tome ho Mateus Publikanu, Tiago, Alfeu nia oan, ho Tadeu, ⁴ Simao Kananeu ho Judas Iscariotes, nebe saran Nia ba mate.

                ⁵ Jesus haruka ema na’in sanulu resin rua ne’e ba hodi hanorin uluk sira dehan: “Imi keta tuir gentiu sira nia dalan, keta tama iha Samaritanu sira nia sidade, ⁶ maibe imi buka uluk bibi sira nebe lakon housi Israel nia uma-kain. ⁷ Imi haklaken tuir dalan katak reinu lalehan besik ona. ⁸ Imi halo moras sira hetan isin diak, halo mate sira moris fali, halo moras lepra sira sai mos, duni sai diabu sira. Imi simu la sosa, fo mos keta hein ema selu imi. ⁹ Keta lori osan mean, osan mutin eh osan riti iha imi nia futukabun. ¹⁰ La bele lori kohe tuir dalan, hena tahan rua, sandalis, eh ai-tonka; basa serbisu na’in soi atu simu nia kolen. ¹¹ Wainhira imi tama iha sidade ka knua ruma, imi husu lai ema se mak diak hodi hela iha neba to’o imi fila. ¹² Wainhira imi tama iha uma ida, imi kumprimenta uluk hodi dehan: “Dame ba uma ne’e.” ¹³ Uma ne’e diak karik, imi nia dame sei tun ba sira; maibe ema la diak karik hodi la rona imi nia liafuan, imi sai housi uma ka sidade ne’e hodi liki rai rahun housi imi nia ain. ¹⁵ Ha’u dehan lialos ba imi katak, iha loron tesi lia nian, rai Sodoma no Gomorra sira nia kastigu sei la dun todan hanesan sidade ne’e nian.”

Apostolu sira sei hetan susar

¹⁶ “Ha’u haruka imi ba hanesan bibi sira iha asu fuik sira leet. Ne’e duni, imi neon na’in no matan moris ba hanesan samea sira, no mos laran diak hanesan manu falur sira. ¹⁷ Imi matan moris ho ema sira. Sira sei lori imi ba tribunal hodi baku imi iha sira nia sinagoga. ¹⁸ Sira sei lori imi hodi kesar imi ba emboot no liurai sira tamba Ha’u atu imi fo sasin iha sira oin no gentiu sira oin. ¹⁹ Maibe wainhira sira saran imi, imi laran keta susar kona ba buat sa ida imi atu dehan, eh atu koalia los oin sa; iha oras neba sei haraik ba imi atu dehan sa ida. ²⁰ La’os imi mak sei koalia, maibe imi Aman nia Espiritu mak sei koalia iha imi. ²¹ Maun sei saran nia alin ba mate, aman sei saran nia oan; oan sira sei foti liman hasouru aman sira hodi oho sira. ²² Ema hotu sei odi imi tan ha’u nia naran; maibe ema nebe hela metin to’o rohan sei hetan rahun diak. ²³ Wainhira ema duni imi sidade ida, imi ba sidade seluk. Basa Ha’u dehan ba imi katak molok imi liu housi sidade hotu Israel nian, Oan Mane sei mai ona. ²⁴ Eskolante la bele boot liu mestre, atan la bele boot liu na’i. ²⁵ To’o ona ba eskolante ida sai hanesan nia mestre, no mos ba atan sai hanesan nia na’in. Ema hanaran uma na’in Beelzebu, oin sa liu tan mak sira sei hanaran sira nebe hela iha nia uma! ²⁶ Ne’e duni, imi keta tauk sira, basa la iha buat nebe subar hela nebe ema sei la hatene. ²⁷ Buat nebe Ha’u dehan ba imi iha nakukun laran, imi fo sai iha naroman; buat nebe imi rona sub-subar deit, imi haklaken housi uma nia kakuluk leten.”

Tauk deit Maromak

²⁸ “Imi keta tauk ema sira nebe oho isin lolon, maibe la bele oho klamar. Maibe imi sei tauk ida nebe bele halo aat isin no klamar hotu iha ahi laran. ²⁹ Manu oan rua la fa’an ba doit ida? Maibe sira ida la monu ba rai wainhira imi aman la husik. ³⁰ Imi nia fuuk iha ulun sura hotu. ³¹ Ne’e duni, imi keta tauk, basa imi folin liu manu oan barak.”

³² “Ema ida fo sasin karik kona ba Ha’u iha ema seluk nia oin, Ha’u mos sei sasin kona ba nia iha ha’u Aman nia oin. ³³ Maibe ida nebe nega Ha’u iha ema nia oin, Ha’u mos sei nega nia iha ha’u Aman nebe iha lalehan nia futar oin.”

                ³⁴ “Imi keta hanoin katak Ha’u mai rai atu lori dame; Ha’u mai atu lori, la’os dame, maibe surik. ³⁵ Basa Ha’u mai atu haketak oan mane housi nia aman, oan feto housi nia inan no feto foun housi nia banin feto, ³⁶ hodi halo ema nia parenti sira rasik sai ninia funu balun. ³⁷ Ema nebe hadomi nia aman ka nia inan liu fali Ha’u, nia la soi atu hela ho Ha’u. ³⁸ Ema nebe la lori nia krus hodi tuir ha’u, nia la soi Ha’u. ³⁹ Ema nebe hadomi nia moris, sei lakon nia; no ema nebe lakon nia moris tamba Ha’u, sei hetan fali nia.”

                ⁴⁰ “Ema nebe simu imi, simu ha’u. Ema nebe simu Ha’u, simu ida nebe haruka Ha’u mai. ⁴¹ Ema nebe simu profeta ida tan nia profeta, ema ne’e sei simu kolen profeta nian. Ema nebe simu ema los ida tan nia ema los, ema ne’e sei simu kolen ema los nian. ⁴² Ema nebe fo hemu kiik oan sira ne’e ida, maski be malirin kopu ida deit, tan nia Ha’u eskolante, Ha’u dehan lialos ba imi; nia sei la lakon nia kolen.”