₁₂

Silu batar, fo isin diak iha loron Sabadu

                ¹ Iha loron Sabadu ida Jesus liu housi to’os batar ida. Nia eskolante sira hamlaha; tan ne’e sira hahu silu batar hodi han. ² Hare tiha ne’e, fariseu sira dehan ba Nia; “O nia eskolante sira halo dau-daun buat nebe bandu atu halo iha loron Sabadu!” ³ Nia hatan ba sira: “Imi la lee buat nebe David halo, wainhira nia hamlaha. Nia ho sira nebe hamutuk ho nia? ⁴ Oin sa nia tama iha Maromak nia uma hodi han paun sakrifisiu nian, nebe  nia no mos sira nebe hamutuk ho nia la bele han; am’lulik sira iha deit mak bele?  ⁵ Imi seidauk lee iha Ukunfuan katak am’lulik sira iha Templu la halo tuir Sabadu, no sira la hetan sala? ⁶ Maibe Ha’u dehan ba imi katak iha ne’e iha Ida nebe boot liu Templu. ⁷ Imi hatene karik lia ne’e katak sa, ‘Ha’u hakarak laran luak liu fali sakrifisiu,’ imi sei la fo todan ba sira ne’e nebe sala laek. ⁸ Basa Oan Mane mos Sabadu nia na’in.”

                ⁹ Housi neba Nia liu ba sinagoga. ¹⁰ Iha neba iha ema ida ho liman maran. Sira husu ba Nia; “Bele fo isin diak ba ema moras iha loron Sabadu, ka lae?” Sira husu ne’e atu bele dun Nia. ¹¹ Maibe Nia husu ba sira: “Imi sira ne’e se mak iha karik bibi ida nebe monu ba rai kuak iha loron Sabadu, la ba buka nia hodi dada sai? ¹² Maibe, ema ida la folin liu bibi ida? Ne’e duni, bele halo diak iha loron Sabadu.” ¹³ Hafoin Nia dehan ba ema moras: “Lolo o nia liman!” Nia lolo nia liman moras no liman ne’e sai diak hanesan ida seluk. ¹⁴ Sai tiha ba liur, fariseu sira tesi lia hasouru Nia, halo oin sa atu halakon Nia.

Jesus, Maromak nia Atan

¹⁵ Tan  hatene ne’e, Jesus hadook An tiha housi neba. Ema barak tuir Nia. Ba sira hotu Nia fo isin diak, ¹⁶ hodi hameno ba sira atu keta fo sai ba ema ida. ¹⁷ Nune’e sai tuir duni buat nebe profeta Isaias dehan nanis: ¹⁸ “Ha’u nia atan mak ne’e, nebe Ha’u fihir, ha’u nia doben. Iha Nia Ha’u haksolok teb-tebes. Ha’u sei haraik ha’u nia Espiritu ba Nia, Nia sei haklaken fiar los ba nasaun sira. ¹⁹ Nia sei la haksesuk, sei la hakilar; ema ida sei la rona nia lia iha luron sira. ²⁰ Nia sei la silu tohar tan fafulu nebe tohar ona, sei la hu’u mate ahi-oan nebe suar, sei haka’as an atu halo justisa manan. ²¹ Nasaun sira sei tau laran metin ba Nia.”

 Jesus ho diabu

²² Tuir mai, sira lori ba Nia ema matan delek no monok ida nebe diabu tama iha laran. Jesus bali nia hodi halo nia koalia no hare. ²³ Ema hotu hakfodak, dehan: “Ema ne’e kala mak David nia Oan.” ²⁴ Maibe, rona tiha ne’e, fariseu sira dehan: “Nia duni sai diabu sira hodi Beelzebu, diabu sira nia ulun.” ²⁵ Tan hatene sira nia hanoin, Jesus hatan ba sira: “Reinu nebe fahe an hodi funu hasouru nia an, reinu ne’e sei mohu. Sidade ka uma-kain nebe fahe an hodi funu hasouru nia an rasik sei la hamriik metin. ²⁶ Ne’e duni Satanas duni sai karik Satanas, nia fahe an hodi funu hasouru nia an rasik: oin sa mak nia reinu bele hamriik metin? ²⁷ Ha’u duni sai karik diabu hodi Beelzebu hodi se los mak imi nia ema sira duni sai diabu sira? Tan ne’e, sira rasik mak sei tesi lia hasouru imi. ²⁸ Maibe, Ha’u duni sai karik diabu sira hodi Maromak nia Espiritu, ne’e dehan katak Maromak nia reinu to’o ona iha imi leet. ²⁹ Eh oin sa ema ida bele tama iha ema maka’as ida nia uma atu na’ok nia rikusoi, wainhira nia la futu lai ema ne’e? Nune’e deit mak nia bele na’ok  housi ema ne’e nia uma.”

                ³⁰ “Ema nebe la hamutuk ho Ha’u, nia hasouru Ha’u; no ema nebe la hamutuk ho Ha’u, nia sei namkari”

Lia aat hasouru Espiritu Santu

³¹ “Tan ne’e Ha’u dehan ba imi: Sala hotu no lia aat hotu hasouru Maromak sei simu perdua. ³² Ema ruma hateten karik lia hasouru Oan Mane, nia sei hetan perdua. Maibe ema nebe koalia hasouru Espiritu Santu, nia sei la hetan perdua iha mundu ne’e no mos iha mundu seluk. ³³ Ai-hun diak fo fuan diak, ai-hun aat fo fuan aat: ema hatene ai housi nia fuan. ³⁴ Imi samodok oan sira! Oin sa mak imi bele koalia buat diak, imi nebe aat? Basa ibun fakar sai buat nebe rai hela iha laran. ³⁵ Ema nebe diak lori sai buat diak housi nia laran diak, maibe ema aat fakar sai buat aat housi nia laran aat. ³⁶ Ha’u dehan ba imi katak ema sira sei hatan iha loron justisa nian kona ba lia folin laek hotu nebe sira dehan. ³⁷ Basa, tuir o nia liafuan sira mak o sei hetan kolen eh kastigu.”

Sinal Jonas nian

³⁸ Iha oras ne’e eskriba no fariseu balun dehan ba Nia: “Mestre, ami hakarak hare sinal ida housi Ita.” ³⁹ Nia hatan ba sira: “Ema laran aat husu sinal ida; maibe sei la fo sinal ida ba nia; sei fo deit sinal profeta Jonas nian. ⁴⁰ Hanesan Jonas hela iha ikan boot nia kabun laran loron tolu no kalan tolu, nune’e mos Oan Mane sei hela iha rai laran loron tolu no kalan tolu. ⁴¹ Iha loron justisa nian, ema Ninive sira sei hamriik hasouru derasaun ne’e hodi tesi lia ba nia, basa sira halo penitensia wainhira sira rona Jonas nia liafuan; maibe iha ne’e iha Ida nebe boot liu fali Jonas. ⁴² Iha loron justisa nian, liurai feto reinu tasi mane nian sei hamriik hasouru derasaun ne’e hodi tesi lia ba nia, basa nia mai housi rai ikun atu rona Salomao nia matenek; maibe iha ne’e iha Ida nebe boot liu fali Salomao!”

Diabu fila fali

⁴³ “Wainhira espiritu foer sai housi ema ida, nia la’o lemo rai fuik maran hodi buka hakmatek, maibe nia la hetan. ⁴⁴ Tuir mai nia dehan: ‘Ha’u sei fila fali ba uma nebe ha’u husik tiha.’ To’o tiha neba, nia hetan uma mamuk, sar mos no aruma di-diak hela. ⁴⁵ Tuir mai nia ba lori espiritu hitu seluk nebe aat liu fali nia. Sira tama iha uma laran hodi hela iha neba, halo ema ne’e sai aat liu uluk.”

Jesus nia parenti los

⁴⁶ Nia sei koalia dau-daun ba ema lubun boot wainhira nia inan ho nia maun alin sira to’o mai iha liur hodi buka atu koalia ho Nia. ⁴⁷ Ema ida dehan ba Nia: “Ita nia inan no ita nia maun alin sira hakarak koalia ho Ita”. ⁴⁸ Jesus hatan ba ida nebe koalia ba Nia: “Se mak ha’u nia inan, se mak ha’u nia maun alin sira?” ⁴⁹ Hafoin Nia lolo liman ba nia eskolante sira hodi dehan: “Sira ne’e mak ha’u nia inan no ha’u nia maun alin sira. ⁵⁰ Basa ema hotu nebe halo tuir ha’u Aman lalehan nia hakarak, ema ne’e mak ha’u nia maun, ha’u nia feton no ha’u nia inan.”