13
Aiknanoik kona ba ema nebe kuda fini
1 Iha loron hirak neba Jesus sai housi uma
hodi tur iha tasi ibun. 2 Ema barak teb-tebes mai
hale’u Nia; tan ne’e Nia tur iha ro ida nia laran, ema lubun boot tur iha tasi
ibun. 3 Nia hanorin buat barak ba sira ho
aiknanoik, dehan: “To’os na’in ida ba kuda to’os. 4 Nia
kuda dau-daun, fini balun monu iha dalan ninin, manu sira mai han. 5
Fini seluk monu iha fatuk laran iha nebe rai uitoan deit; sira ne’e
moris kedas basa rai la dun klean; 6
maibe loron sa’e, sunu tiha sira tan abut la iha, hafoin sira sai maran. 7
Fini seluk monu iha ai-tarak klaran; ai-tarak sira moris mai, hanehan
sira to’o mate. 8 Fini seluk monu iha rai diak hodi
fo fuan: balun dala atus ida, seluk neen nulu; seluk fali tolu nulu. 9
Ema nebe iha tilun, rona ba!”
10
Eskolante sira hakbesik ba Nia, dehan: “Tansa Ita koalia ba sira ho
aiknanoik? 11 Nia
hatan ba sira: “Ba imi fo hatene misteriu sira reinu lalehan nian, maibe ba
sira lae. 12 Basa ba ida nebe iha ona, sei fo tan
atu nia iha liu tan; maibe ba ida nebe la iha, buat uitoan mos nebe nia iha sei
hasai tan. 13 Tan ne’e mak Ha’u koalia ba sira ho
aiknanoik, basa sira hateke dau-daun, maibe sira la hare; sira se tilun
dau-daun maibe la rona, ka hatene los. 14 Nune’e
sei sai duni tuir Profeta Isaias nia lia nebe dehan: ‘Imi rona ho tilun, maibe
la hatene los; imi hare ho matan, maibe la hare mos. 15 Basa
povu ne’e nia laran tos; sira nia tilun diuk no la bele rona; sira fuan la bele
hatene los keta sira hakribi sira nia sala hafoin Ha'u halo sira fila ba diak.’
16 Maibe rahun diak ba imi nia matan basa hare; no
ba imi nia tilun basa rona. 17 Ha'u’dehan lialos ba
imi katak profeta no ema diak barak hakarak teb-tebes hare buat nebe imi hare
dau-daun, maibe la hare; no rona buat nebe imi rona, maibe la rona.”
18
“Ne’e duni imi rona di-diak aiknanoik kona ba ema nebe kuda to’os. 19
Fini nebe monu iha dalan ninin hanesan ema nebe rona liafuan reinu nian
maibe la hatene lo-los. Ida nebe aat mai hodi hasai buat nebe kuda tiha iha nia
laran, 20 Fini nebe monu iha fatuk laran mak ida
nebe rona liafuan hodi simu kedas ho ksolok. 21 Maibe
tan abut la iha, nia mate lalais; hetan tiha susar eh terus tamba liafuan, nia
monu kedas. 22 Fini nebe monu iha ai-tarak laran
mak ida nebe rona liafuan maibe knaar sira no rikusoi mundu ne’e nian hanehan
liafuan ne’e; halo nia la fo fuan. 23 Fini nebe
monu iha rai diak mak ida nebe rona liafuan hodi hanoin di-diak: ida ne’e fo
fuan dala atus ida, ka neen nulu, ka tolu nulu.”
24 Nia dehan tan aiknanoik ida ba sira: “Reinu
lalehan nian hanesan ema ida nebe kuda fini diak iha nia to’os; 25
maibe wainhira nia emar sira toba dau-daun, nia funu balun mai kuda du’ut
aat iha trigu leet, hafoin nia ba tiha. 26 Wainhira
trigu sai boot tiha hodi fo fuan, du’ut aat mos mosu. 27 To’os
na’in nia atan sira mai buka nia hodi dehan ba nia: ‘Na’i, Ita la kuda fini
diak iha ita nia to’os? Du’ut aat mai housi nebe?’ 28 Nia
hatan: ‘Ha’u nia funu balun ruma mak halo buat ne’e.’ Atan sira dehan ba nia:
‘Ita hakarak ami ba fokit tiha nia?’ 29 ‘Lae,’ nia dehan, ‘keta halo be hodi fokit
du’ut aat, imi fokit mos trigu. 30 Imi husik sira rua moris hamutuk;
loron ko’a hare nian to’o mai mak ha’u sei dehan ba to’os atan sira: ‘Imi hili
uluk mak du’ut aat hodi futu hamutuk atu sunu; trigu fali, imi halot iha ha’u
nia hoka.’”
31 Jesus haktuir tan aiknanoik ida ba sira:
“Reinu lalehan nian hanesan mustarda musan ida nebe ema kuda iha nia to’os. 32
Musan ne’e kiik liu ai musan sira hotu; maibe boot mai, nia moris boot
liu hotu, to’o sai ai-hun nebe lalehan nia manu sira mai tur iha nia sanak
sira.”
33
Nia dehan tan aiknanoik seluk ba sira: “Reinu lalehan nian hanesan
fermentu nebe feto ida kahur ho farina sasukat tolu, to’o nia sa’e di-diak.”
34 Buat ne’e hotu Jesus dehan ba ema lubun boot
ho aiknanoik sira; la ho aiknanoik, Nia la koalia ba sira. 35
Nune’e sai tuir duni buat nebe uluk profeta dehan: “Ha’u sei loke ha’u
ibun ho aiknanoik, Ha’u sei haklaken buat sira nebe susar houri mundu hahu.”
36
Tuir mai, husik tiha ema lubun boot ne’e, Jesus ba fali uma. Nia
eskolante hakbesik ba Nia hodi dehan: “Hanorin mai ami aiknanoik kona ba du’ut
aat iha to’os.” 37 Nia hatan ba sira: “Ida nebe
kuda fini diak, ne’e Oan Mane. 38 To’os mak mundu.
Fini diak mak reinu nia oan sira. 39 Funubalu nebe
kuda fini aat mak diabu. Loron ko’a nian mak loron ikus mundu ne’e nian. Sira
nebe ko’a mak anju sira. 40 Ne’e duni, hanesan sira
futu du’ut aat hodi sunu iha ahi, nune’e mos sei mosu wainhira mundu sei to’o nia rohan. 41 Oan
Mane sei haruka nia anju sira atu hasa’e tiha housi nia reinu sira hotu nebe fo
esemplu aat no sira hotu nebe halo aat, 42 hodi soe
sira ba ahi lakan iha neba sira sei tanis no ruun nehan. 43
Ema diak sira sei nabilan hanesan loron iha sira Aman nia reinu. Ema nebe
tilun iha, rona ba!”
44 “Reinu lalehan nian hanesan murak ida nebe
subar hela iha to’os laran, nebe ema ida hetan hodi haksumik fali. Ho ksolok
boot nia fa’an buat hotu nebe nia iha hodi sosa to’os ne’e.”
45
“Reinu lalehan nian hanesan kontratu na’in ida nebe buka murak diak sira. 46 Hetan
tiha ida nebe folin boot, nia fa’an tiha buat hotu nebe nia iha hodi sosa murak
ne’e.”
47
“Reinu lalehan nian hanesan rede ida nebe ema soe ba tasi hodi dada ikan
sira, kiik no boot. 48 Nia nakonu ona, kail na’in
sira dada ba tasi ibun; tur tiha, sira hili ikan diak sira tau hamutuk iha
lafatik, sira nebe aat soe tiha. 49 Sei sai nune’e
mos wainhira mundu to’o nia rohan: anju sira sei mosu hodi haketak ema aat sira
hodi ema diak sira. 50 Hafoin sira sei soe ema aat
sira ba ahi lakan manas: iha neba sira sei tanis no ruun nehan.”
51
“Imi rona los buat hirak ne’e hotu?” Sira hatan: “Ami rona.” 52
Nia dehan tan ba sira: “Tan ne’e, eskriba sira nebe matenek kona ba reinu
lalehan nian hanesan aman ida nebe hasai buat foun no tuan housi nia rikusoi.”
53 Hanorin hotu tiha ho aiknanoik sira ne’e,
Jesus husik rai neba. 54 To’o tiha ninia rai, Nia
hanorin iha sinagoga, halo ema hotu hakfodak hodi dehan: “Nia matenek ho nia
kbiit hodi halo milagre hirak ne’e mai los housi nebe? 55
Nia la’os badaen ai nia oan? Nia inan la naran Maria, no mos nia maun
alin la naran Tiago, Jose, Simao ho Judas? 56 Nia
feton la hela hamutuk ho ita? Ne’e duni, buat hirak ne’e hotu, Nia hetan los
housi nebe?” 57 No sira lakohi simu Nia. Maibe
Jesus dehan ba sira: “Ema hanai profeta ida iha fatin hotu; iha nia rai deit no
iha nia uma mak ema hewai nia.” 58 Nia la halo
milagre barak iha neba, tan ema sira neba la fiar.
|