1₄

Joao Baptista nia mate

                ¹ Iha tempu neba liurai Herodes rona kona ba Jesus nia naran boot. ² Herodes dehan ba nia ema sira: “Tebes, ema ne’e Joao Baptista nebe moris fali ona! Tan ne’e nia iha kbiit atu halo milagre sira.”

                ³ Herodes kaer duni Joao hodi futu no hatama nia iha kadeia tamba Herodiade, nia maun Filipe nia kaben; ⁴ basa Joao dehan ba nia: “O la bele hola nia.” ⁵ Herodes hakarak oho Joao maibe nia tauk povu nebe hare Joao nudar profeta. ⁶ Maibe iha loron nebe Herodes halo tinan, Herodiade nia oan feto dansa iha ema hotu nia oin hodi fo ksolok ba Herodes. ⁷ Tan ne’e Herodes hakotu lia ho juramentu atu fo ba fetoran ne’e buat hotu nebe nia husu. ⁸ Rona tiha nia inan, nia hatan: “Fo mai ha’u Joao Baptista nia ulun iha bikan boot ida.” ⁹ Liurai neon susar, maibe tamba nia jura iha bainaka sira oin, ¹⁰ nia haruka ema atu tesi Joao nia ulun iha kadeia hodi lori mai. ¹¹ Sira lori ulun mai iha bikan ida hodi fo ba fetoran nebe fo fali ba nia inan. ¹² Joao nia eskolante sira mai foti nia isin hodi ba hakoi; hafoin sira ba fo hatene ba Jesus.

Jesus fo han ba ema barak

¹³ Rona tiha buat ne’e, Jesus sa’e ba ro ida hodi ba mesak iha fatin dook ida; maibe hatene tiha ne’e, ema lubun boot husik sidade sira hodi la’o tuir Nia. ¹⁴ Tun housi ro hodi hare ema barak ne’e, Jesus hanoin teb-tebes sira hodi fo isin diak ba sira nebe moras. Loraik dau-daun ona, eskolante sira hakbesik ba Nia hodi dehan: ¹⁵ Fatin ne’e rai fuik, oras loraik ona; haruka ema sira ne’e ba ona, atu sira ba sosa aihan iha knua sira.” ¹⁶ Jesus dehan ba sira: “Sira lalika ba; imi fo han sira.” ¹⁷ Sira hatan ba Nia: “Iha ne’e ami iha deit paun fuan lima no ikan rua.” ^18“ Imi lori sira mai,” Nia dehan. ¹⁹ Hafoin Nia haruka ema lubun boot tur iha du’ut leten. Nia kaer paun fuan lima no ikan rua ne’e, foti matan ba lalehan hodi fo bensa. Tuir mai Nia silu paun sira ne’e hodi fo ba eskolante sira; hafoin sira fo fali ba ema lubun boot. ²⁰ Sira hotu han to’o bosu; baluk sira nebe resin, sira tau ba luhu sanulu resin rua nakonu! ²¹ Ema sira nebe han hamutuk mane rihun lima, la sura labarik no feto sira.

Jesus la’o iha be leten

²² Tuir mai Jesus haruka eskolante sira sa’e ro hodi ba uluk tasi sorin ba, wainhira Nia despede ema lubun. ²³ Despede tiha sira, Nia sa’e ba foho atu harohan mesa-mesak. To’o kalan, Nia mesak deit iha neba. ²⁴ Ro iha ona tasi klaran, laloran baku maka’as, basa anin hu’u hasouru. ²⁵ To’o kalan fahe ba hat, Jesus hakbesik ba sira hodi la’o iha tasi leten. ²⁶ Hare tiha Nia la’o iha tasi leten, eskolante sira hakfodak hodi dehan: “Rai na’in ida!” Sira hakilar ho tauk. ²⁷ Jesus koalia kedas ba sira, dehan: “Hakmatek ba! Ne’e mak Ha’u: imi keta tauk!” ²⁸ Pedro hatan, dehan: “Na’i, Ita Boot mak ne’e karik, haruka ha’u ba to’o Ita housi be leten.” Jesus simu: “Mai!” ²⁹ Pedro tun housi ro hodi la’o iha be leten atu ba to’o Jesus. ³⁰ Maibe, hare anin hu’u maka’as, nia tauk hodi hahu mout. Nia hakilar. “Na’i, soi ha’u!” ³¹ Jesus lolo liman ba nia hodi kaer nia, dehan: “Ema fiar kiik, tansa o laran rua-rua?” ³² Sira tama tiha ba ro laran, anin kmaus tiha. ³³ Sira nebe iha ro laran monu iha Jesus nia oin hodi dehan: “Tebes duni, Ita Boot mak Maromak.” ³⁴ Hakur tiha tasi, sira tun ba rai Genesare. ³⁵ Hatene tiha Nia, ema sira rai neba nian ba fo hatene ba maluk sira iha fatin hotu. Sira lori ba Nia moras sira hotu, ³⁶ hodi husu ba Nia atu husik netik sira kona nia tais ninin. No sira nebe kona duni, hetan isin diak.