1₅

Lisan sira

                ¹ Iha loron neba fariseu no eskriba balun housi Jerusalem mai koalia ba Jesus, dehan: ² “Tansa mak ita nia eskolante sira la tuir lisan bei-ala sira nian?” Basa sira la fase liman molok atu han.” ³ Nia hatan ba sira: “Imi fali, tansa imi hasouru Maromak nia ukunfuan tan deit imi nia lisan? ⁴ Basa Maromak dehan: ‘Hamtauk aman inan’, no mos: ‘Ema nebe fo malisan ba aman ka inan, nia sei mate.’ ⁵ Maibe imi dehan, ‘Ema nebe dehan ba nia aman ka nia inan: ‘Riku soi nebe ha’u bele usa atu tulun o, ne’e buat karan santu’, ⁶ ema ne’e la iha ona obrigasaun atu tulun aman inan.’ Nune’e imi hewai Maromak nia futar lia tan imi nia lisan. ⁷ Laran makerek sira! Profeta Isaias si’ik kona ba imi wainhira nia dehan: ⁸ ‘Povu ida ne’e hahi Ha’u ho ibun tutun, maibe nia laran dook housi Ha’u. ⁹ Sira adora Ha’u leet deit hodi hanorin deit ema sira nia doutrina no ukunfuan sira.’”

                ¹⁰ Tuir mai Nia bolu ema lubun boot hodi dehan ba sira: “Imi rona di-diak hodi buka hatene! ¹¹ La’os buat nebe tama housi ibun mak hafoer ema, maibe buat nebe sai housi ibun mak halo ema foer.”

                ¹² Eskolante sira hakbesik hodi dehan ba Nia: “Ita hatene katak fariseu sira hirus wainhira sira rona Ita koalia nune’e?” ¹³ Nia hatan ba sira: “Ai hotu nebe la’os Ha’u Aman lalehan mak kuda, sei fokit tiha. ¹⁴ Imi husik ema sira ne’e; sira hanesan matan delek sira nebe hatudu dalan ba matan delek sira seluk, sira na’in rua sei monu hotu iha rai kuak.”

¹⁵ Pedro hatan hodi dehan ba Nia: “Hanorin aiknanoik mai ami.” ¹⁶ Jesus dehan ba sira: “Imi neon mos seidauk nakloke? ¹⁷ Imi la hatene katak buat nebe tama housi ibun liu ba kabun, hafoin sai fali ba liur? ¹⁸ Maibe buat nebe sai housi ibun mai housi laran, ne’e mak halo foer. ¹⁹ Housi laran suli mai hanoin aat sira, oho ema, sala hasouru kaben, sala foer, na’ok, bobar lia falsu, hateten aat Maromak. ²⁰ Ne’e hotu mak hafoer ema; maibe la fase liman, ne’e la hafoer ema.”

Feto housi Kanaan

²¹ Sai tiha housi neba, Jesus liu ba rai Tiro no Sidon nian. ²² Iha oras neba feto Kanaan ida nebe mai housi rai neba hahu hakilar: “Na’i, David nia Oan, hanoin ha’u: diabu fo terus boot ba ha’u nia oan feto.” ²³ Maibe Nia la hatan lia fuan ida. Eskolante sira hakbesik ba Nia hodi husu: “Hatan tiha ba nia ba, basa nia hakilar bei-beik tuir ita.” ²⁴ Nia hatan: “Ha’u mai deit ba bibi sira nebe lakon housi uma-kain Israel nian.” ²⁵ Maibe feto ne’e mai hakneak iha Nia oin, dehan: “Na’i, tulun ha’u!” ²⁶ Nia simu: “Hola oan sira nia aihan hodi soe ba asu oan sira la diak!” ²⁷ Feto ne’e dehan fali: “Ne’e los duni, Na’i; maibe asu oan sira mos han etu mumun nebe monu housi sira na’in nia mesa.” ²⁸ Jesus hatan ba nia: “Feto, o nia fiar boot tebes! Halo duni tuir o hakarak.” Iha oras neba, nia oan feto hetan fali isin diak.

Fo isin diak ba ema moras barak

                 ²⁹ Sai tiha housi neba, Jesus liu ba to’o tasi Galileia. Nia sa’e ba foho ida hodi tur iha neba. ³⁰ Ema barak mai buka Nia. Sira lori ema ain aat sira, ema moras sira, matan delek sira no monok sira, ho tan sira barak seluk hodi tau sira iha nia ain; no Jesus fo isin diak ba sira. ³¹ Ne’e halo ema lubun boot hakfodak wainhira sira hare monok sira koalia, moras sira diak fali, ain aat sira la’o los, matan delek sira hare mos. No sira hasa’e gloria ba Israel nia Maromak.

Fo han ba ema barak

³² Bolu tiha nia eskolante sira, Jesus dehan ba sira: “Ha’u hanoin ema lubun ne’e, basa loron tolu ona mak sira la tuir Ha’u, la han buat ida. Ha’u lakohi haruka sira ba la han buat ida. Keta sira monu iha dalan karik.” ³³ Eskolante sira dehan ba Nia: “Iha rai fuik ne’e, ita ba buka paun nebe  to’o atu fo han bosu ema barak hanesan ne’e iha los nebe?” ³⁴ Jesus husu ba sira: “Imi iha paun fuan hira?” Sira hatan: “Paun fuan hitu, ho ikan oan balun.” ³⁵ Jesus haruka ema lubun boot tur hotu iha rai, ³⁶ kaer paun fuan hitu ho ikan sira, fo obrigadu, silu hodi fahe ba eskolante sira atu fo ba povu. ³⁷ Sira hotu han to’o bosu. Hafoin sira tau baluk sira nebe resin ba luhu hitu nakonu. ³⁸ Ema sira nebe han ne’e sura hamutuk mane rihun hat, la sura feto ho labarik sira. ³⁹ Haruka tiha ema sira ba uma, Jesus sa’e ba ro hodi la’o ba rai Magadan.