16
Sira husu sinal ida
1 Ema
fariseu no saduseu sira hakbesik ba Jesus atu koko Nia. Sira husu ba Nia atu
hatudu ba sira sinal ida housi lalehan. 2 Nia hatan
ba sira: “Iha kalan imi dehan: ‘Tempu diak, basa lalehan mean.’ 3
Iha dader, imi dehan: ‘Ohin tempu la diak, basa lalehan mean nakukun.’ Imi
hatene si’ik tempu hodi hare lalehan nia oin; maibe imi la hatene si’ik sinal
tempu sira nian. 4 Derasaan aat ho laran foer ne’e
husu sinal ida, maibe sei la sinal ida ba nia; sei fo deit sinal Jonas nian.”
Tuir mai Nia husik sira hodi ba fatin seluk.
5
Wainhira eskolante sira hakur tasi ba sorin, sira haluha atu lori paun. 6
Jesus dehan ba sira: “Imi matan moris, neon na’in ho fariseu no saduseu
sira nia fermentu.” 7 Sira hanoin hodi dehan ba
malu: “Ne’e tan ita haluha lori paun.” 8 Maibe,
Jesus hatene ne’e, dehan: “Imi ema fiar namlele, tansa imi haksesuk malu tan
imi la lori paun? 9 Imi seidauk hatene lo-los? Imi
kala haluha ona paun fuan lima nebe fo han ema rihun lima. Imi halibur resin
sira iha luhu hira? 10 No mos paun fuan hitu nebe
fo han ema rihun hat. Imi tau resin sira iha luhu hira? 11
Nusa mak imi la hatene lo-los katak, wainhira Ha’u dehan ba imi ‘matan moris
neon na’in ho fariseu no saduseu sira nia fermentu’, Ha’u la koalia kona ba
paun?”
12
Nune’e mak sira foin hatene katak Jesus husu atu sira souri an la’os
hasouru fermentu paun nian, maibe hasouru fariseu no saduseu sira nia doutrina.
13
To’o tiha rai Sesareia Filipe nian, Jesus husu ba nia eskolante sira:
“Ema sira dehan Oan Mane ne’e se los?” 14
Sira hatan; “Balun dehan katak Nia mak Joao Baptista, seluk katak Elias,
seluk fali katak Jeremias ka profeta ruma.” 15 Jesus
dehan ba sira; “Imi fali dehan Ha’u se?” 16 Simao
Pedro simu hodi dehan: “Ita Boot mak Kristu, Maromak moris nia Oan.” 17
Jesus hatan ba nia : “Rahun diak ba o, Simao, Jonas nia oan, basa la’os
isin ka ran mak hanorin buat ne’e ba o, maibe ha’u nia Aman nebe iha lalehan. 18
Ha’u dehan fali ba o, ‘O Pedro, no iha fatuk ne’e nia leten Ha’u sei
harii Ha’u nia kreda, nebe infernu nia kbiit sei la bele halo buat ida hasouru
nia. 19 Ha’u sei fo siabe reinu lalehan nian ba o;
buat hotu nebe o futu iha rai, sei futu iha lalehan; no buat hotu nebe o kore
iha rai, sei kore mos iha lalehan.’” 20 Hafoin Nia
husu nia eskolante sira atu bele dehan ba ema ida katak Nia mak Kristu.
21
Houri loron ne’e, Jesus hahu fo sai ba nia eskolante sira katak Nia sei
ba Jerusalem atu hetan terus barak housi katuas no eskriba sira, no housi
am’lulik boot sira; sira sei oho Nia, hafoin, liu loron tolu, Nia sei moris
fali. 22 Pedro lori Nia ketak hodi hahu haksi’ak
Nia, dehan: “Aat ne’e la bele kona Ita, Na’i!” 23 Maibe,
fila tiha ba Pedro, Jesus dehan: “Ba dook tiha, Satanas, o teri netik ha’u
dalan; basa o la hanoin tuir Maromak nia hanoin, maibe tuir ema nian.”
24
Tuir mai Jesus dehan ba nia
eskolante sira: “Ema ruma hakarak tuir Ha’u karik, nia sei hewai nia an rasik, sei
lori nia krus hodi tuir Ha’u. 25 Tan ema nebe
hakarak soi nia moris, sei lakon moris ne’e; maibe ema nebe lakon nia moris
tamba Ha’u, sei hetan fali nia. 26 Ema ida manan
los sa wainhira nia manan mundu tomak,
maibe ikus mai lakon nia klamar? Ka, ema bele fo los sa ida atu troka ho nia
klamar? 27 Basa Oan Mane sei mai iha nia Aman nia
gloria, ho nia anju sira hodi selu ema hotu nia kolen, tuir ida-ida nia
hahalok. 28 Ha’u dehan lialos ba imi, ema balun iha
ne’e sei la mate molok sira hare Oan Mane to’o mai ho nia reinu.”
|