17

Jesus nakfila An

                ¹ Liu tiha loron neen, Jesus bolu ketak Pedro, Tiago ho nia alin Joao hodi lori sira mesak ba foho aas ida. ² Iha neba Nia nakfila An iha sira nia oin. Nia oin nabilan hanesan loron, nia unuk sai mutin hanesan roman. ³ Iha oras neba Moises ho Elias mosu hodi koalia ho Nia. ⁴ Pedro hasa’e lia, dehan ba Jesus: “Na’i, diak liu Ita hela ona iha ne’e! Ita Boot hakarak karik, ami sei halo takabaluk tolu: ida ba Ita Boot, ida ba Moises, ida seluk ba Elias!” ⁵ Nia sei koalia hela, kalohan nabilan ida hamahan sira. Hafoin housi kalohan ne’e lia ida dehan: “Ida ne’e mak Ha’u nia Oan doben, nebe fo ksolok mai ha’u. Imi rona Nia ba!” ⁶ Rona tiha ne’e, eskolante sira monu ba rai hodi tauk teb-tebes. ⁷ Jesus hakbesik hodi kona sira, dehan: “Imi hamriik ba, keta tauk!” ⁸ Foti tiha sira matan, sira hare deit Jesus; la iha tan ema ida.

                ⁹ Wainhira sira tun dau-daun housi foho, Jesus dehan ba sira: “Imi keta haktuir ba ema ida buat nebe imi foin hare to’o Oan Mane moris hi’as fali housi mate.” ¹⁰ Eskolante sira husu ba Nia: “Tansa mak eskriba sira dehan katak Elias sei mai uluk?” ¹¹ Nia hatan: “Los duni, Elias sei mai hodi halos buat hotu. ¹² Maibe Ha’u dehan ba imi katak Elias mai tiha ona, maibe sira la hatene nia hodi halo ba nia tuir sira nia hakarak. Nune’e mos sira sei fo terus ba Oan Mane.” ¹³ Ho lia hirak ne’e, sira hatene ona katak Nia koalia ba sira kona ba Joao Baptista.

Labarik ho diabu iha laran

¹⁴ Wainhira Jesus mai hasouru ema lubun boot, mane ida hakbesik ba Nia, monu ba nia ain hodi dehan: ¹⁵ “Na’i, sadia netik ha’u nia oan mane, basa moras bibimate nian halo nia terus teb-tebes. Nia monu fila fali ba ahi no mos ba be. ¹⁶ Ha’u lori ona nia ba ita nia eskolante sira, maibe sira la bele halo nia sai diak.” ¹⁷ Jesus hatan dehan: “Imi ema fiar laek, ema aat! Ha’u sei hamutuk ho imi to’o wainhira los? Lori nia mai!” ¹⁸ Jesus koalia ho si’ak, no diabu sai tiha housi labarik. Houri oras ne’e nia sai diak kedas.

                ¹⁹ Tuir mai eskolante sira hakbesik ba Jesus mesa-mesak hodi husu ba Nia: “Tansa mak ami la bele duni sai diabu ne’e?” ²⁰ Nia hatan: “Tamba imi nia fiar namlele. Ha’u dehan los ba imi katak, imi nia fiar hanesan mustarda musan ida karik, imi sei dehan ba foho ne’e, ‘Book o an housi neba, no nia sei book an duni; buat ida sei la susar ba imi. ²¹ Diabu sira hanesan ne’e ema bele duni sai ho deit orasaun no hadera an.

Ba dala rua Jesus fo sai nia terus

                ²² Wainhira sira halibur hamutuk iha Galileia, Jesus dehan ba sira: “Sira sei saran Oan Mane ba ema sira nia liman. ²³ Sira sei oho Nia; maibe, liu tiha loron tolu, Nia sei moris hi’as.” Tan ne’e, sira laran susar teb-tebes.

Impostu Templu nian

²⁴ To’o tiha Kafarnaum, kobrador impostu sira Templu nian hakbesik ba Pedro hodi dehan ba nia: “Imi nia mestre la selu impostu?” ²⁵ Nia hatan: “Selu.” To’o tiha uma, Jesus hahu koalia, dehan: “Simao, o hanoin oin sa? Liurai sira simu impostu rai nian housi se: housi oan sira, ka housi ema seluk?” ²⁶ Nia hatan: “Housi ema seluk.” Jesus dehan ba nia: “Ne’e duni, oan sira la selu. ²⁷ Maibe, atu ema keta hanoin sala, o ba tasi, soe kail hodi kaer ikan ida nebe sai uluk. Loke tiha nia ibun, o sei hetan osan ida. Lori osan ne’e ba selu impostu, ha’u nian no mos o nian.”