19
Lia kona ba divorsiu
1 Koalia hotu tiha, Jesus husik Galileia hodi
ba iha rai Judeia, iha Jordaun nia sorin balun ba. 2 Ema
lubun boot la’o tuir Nia. Iha fatin neba Nia fo isin diak ba sira. 3
Fariseu balun hakbesik atu koko Nia hodi dehan: “Tan naran lia ruma mak
mane ida bele soe nia feen, ka lae?” 4 Nia hatan:
“Imi la lee katak houri uluk kedas Maromak halo mane ho feto hodi dehan; 5
‘Tan ne’e mak mane sei husik nia aman ho nia inan hodi moris hamutuk ho
nia feen; sira na’in rua sei sai isin ida deit?’ 6 Sira
la’os na’in rua ona, maibe isin ida deit. Ne’e duni buat nebe Maromak tau
hamutuk, ema la bele haketak.”
7
Sira husu ba Nia: “Tansa Moises haruka fo surat soe malu nian ba mane
nebe hakarak soe nia feen?” 8 Nia hatan ba sira:
“Tan imi nia laran tos mak Moises husik imi soe imi nia feen; maibe uluk la’os
hanesan ne’e. 9 Ha’u dehan ba imi katak ema ruma
soe karik nia feen wainhira feto ne’e la sala foer hodi hola fali feto seluk,
ema ne’e halo sala adulteriu.”
10
Eskolante sira dehan ba Nia: “Mane ho feto hola malu hanesan ne’e karik,
diak liu lalika kaben.” 11 Maibe Nia hatan: “La’os
ema hotu bele simu liafuan ida ne’e, maibe sira deit nebe simu tiha grasa ne’e.
12 Ema balun la kaben tamba moris mai nune’e kedas
ona; balun fali la kaben tamba ema halo sira hanesan ne’e, no balun la kaben
tamba sira rasik halo An nune’e tan reinu lalehan. Ema nebe bele simu ne’e,
simu ba.”
13 Ema lori labarik
sira atu Jesus tau liman hodi harohan ba sira. Eskolante sira haksi’ak sira. 14
Maibe Jesus dehan: “Husik labarik oan sira hakbesik Ha'u, keta bandu
sira, basa reinu lalehan nian sei fo ba ema hotu nebe hanesan sira.” 15
Hafoin, tau liman ba sira, Nia la’o tuir nia dalan.
16 La kleur mane klosan ida hakbesik ba Nia
dehan: “Mestre, ha’u sei halo buat diak sa atu hetan moris rohan laek?” 17
Jesus husu ba nia: “Tansa o husu Ha’u kona ba buat nebe diak? Ida deit
mak diak. Maibe, o hakarak tama ba moris karik, halo tuir ukunfuan sira ba.” 18
Nia husu fali: “Ukunfuan nebe?” Jesus hatan: “Keta oho, keta sala ho ema
nia kaben, keta na’ok, keta foti lia falsu; 19 hamtauk
o nia aman ho inan, hadomi o nia maluk hanesan o an rasik.” 20
Klosan ne’e dehan ba Nia: “Ha’u halo tuir ona buat ne’e hotu: ha’u sei
halo tan sa ida?” 21 Jesus dehan ba nia: “O hakarak
sai ema santu karik, ba fa’an tiha buat hotu nebe o iha hodi fo osan tomak ba
ema kiak sira, nune’e o sei hetan murak ida iha lalehan; hafoin mai tuir Ha’u.”
|