20
Aiknanoik serbisu na’in
sira nian
1 “Reinu lalehan
nian hanesan to’os na’in ida nebe sai iha dader atu halo kontratu ho ema
serbisu na’in sira ba nia to’os. 2 Nia halo
kontratu ho sira loron ida denariu ida hodi haruka sira ba nia to’os. 3
Tuku sia, nia sai fali hodi hare ema sira seluk iha luron la halo buat
ida. 4 Nia dehan ba sira: ‘Imi mos ba ha’u nia
to’os, ha’u sei selu imi nia kolen.’ 5 Sira ba. Nia
sai fali iha loron fahe rua, no mos tuku tolu loraik hodi halo nune’e nafatin. 6
Tuku lima loraik, nia hetan tan ema seluk iha neba. 7
Nia husu ba sira: ‘Tan sa imi hamriik loron tomak iha ne’e la halo
serbisu ruma?’ Sira hatan, ‘Ema la bolu ami.’ Nia dehan ba sira: ‘Imi mos ba
ha’u nia to’os.’ 8 Iha loraik, to’os na’in dehan ba
mandor: ‘Bolu serbisu na’in sira hodi selu sira nia kolen, hahu housi sira ikus
to’o sira uluk.’ 9 Sira nebe mai tuku lima loraik
hakbesik hodi simu ida-ida denariu ida. 10 Wainhira
sira nebe uluk mai, sira hanoin atu simu liu maibe sira mos simu ida-ida
denariu ida. 11 Simu tiha osan, sira hamuun hasouru
to’os na’in hodi dehan: 12 ‘Sira nebe ikus ne’e
serbisu oras ida deit, o selu sira hanesan ami, nebe terus kole ho manas loron
tomak.’ 13 Nia hatan ba sira: ‘Ha’u belun, ha’u la
hasouru ha’u lia ba o: ita la halo kontratu denariu ida ba loron ida? 14
Ne’e duni, simu buat nebe o nian hodi ba ona. Ha’u hakarak fo ida ikus
ne’e hanesan ha’u fo ba o. 15 Ha’u la bele halo ho
ha’u nia rikusoi nudar ha’u hakarak? Ka o laran moras tamba ha’u laran diak?”
16
Nune’e sira nebe ikus sei sai uluk, sira nebe uluk sei sai ikus.
Ba dala tolu Jesus fo sai
kona ba nia terus
17 Sa’e dau-daun ba
Jerusalem, Jesus bolu ketak sira na’in sanulu resin rua hodi dehan ba sira: 18
“Ita sa’e ba Jerusalem. Ema sei saran Oan Mane ba am’lulik boot no
eskriba sira, nebe sei tesi lia atu Nia mate. 19 Hafoin
sira sei saran Nia ba gentiu sira atu hamoe Nia, baku Nia hodi hedi Nia ba
krus. Liu loron tolu, Nia sei moris hi’as.”
Zebedeu nia oan sira
20
Tuir mai Zebedeu oan sira nia inan hakbesik Jesus hamutuk ho nia oan
sira, monu iha nia ain hodi husu buat ida. 21 Jesus
husu ba nia: “Ita hakarak sa ida?” Nia hatan: “Ita boot haruka atu atan nia oan
mane rua ne’e ida tur iha ita sorin kuana, ida iha ita sorin karuk iha ita boot
nia reinu.” 22 Jesus dehan: “Imi la hatene buat
nebe imi husu ne’e. Imi bele hemu housi kalis nebe Ha’u atu hemu?” Sira hatan:
“Ami bele.” 23 Nia dehan fali ba sira: “Tebes duni,
imi sei hemu housi ha’u nia kalis; maibe tur iha ha’u nia sorin kuana eh karuk,
ne’e la’os Ha’u mak fo; ne’e ba sira nebe ha’u Aman hadia hela.”
24
Rona tiha ne’e, sira na’in sanulu hirus maun alin rua ne’e. 25
Jesus bolu sira hodi dehan ba sira: “Imi hatene katak na’i ulun gentiu
sira nian ukun povu hodi kroat. 26 Imi sei la halo
hanesan ne’e; maibe iha imi leet se mak hakarak sai boot, nia sei sai imi nia
atan; 27 no ida nebe hakarak sai uluk, nia sei
serbi sira seluk; 28 Hanesan Oan Mane mai la’os atu
ema serbi Nia, maibe atu serbi hodi saran nia moris atu soi ema barak.”
Ema Matan delek hare fali
29 Wainhira Jesus
sai housi Jeriko, ema lubun boot la’o tuir Nia. 30 Iha
oras neba ema matan delek rua tur hela iha dalan ninin. Rona tiha katak Jesus
liu dau-daun, sira hakilar. “Na’i, David nia Oan, hanoin ami!” 31
Ema lubun boot si’ak sira hodi haruka sira nonok, maibe sira hakilar liu
tan: “Na’i, David nia Oan, hanoin ami!” 32 Jesus
hamriik, bolu sira hodi husu ba sira: “Imi hakarak Ha’u halo sa ida ba imi?” 33
Sira dehan ba Nia: “Na’i, ami hakarak hare.” 34 Jesus
hanoin teb-tebes sira hodi kona sira nia matan. Sira matan diak kedas no ema
sira ne’e tuir Nia.