2₁

Jesus tama nudar liurai iha Jerusalem

¹ Wainhira sira to’o iha Betfage, iha foho oliveira, besik ona Jerusalem, Jesus haruka eskolante na’in rua, ² hodi dehan ba sira: “Imi ba knua nebe iha imi nia oin: imi sei hetan kuda burru inan ida kesi hela hamutuk ho kuda oan ida. Imi kore sira, lori mai Ha’u. ³ Ema ruma husu karik, imi sei hatan: ‘Na’i presisa sira, maibe sei fo fali kedas.’”

⁴ Buat ne’e mosu atu halo tuir lia nebe profeta uluk fo sai: ⁵ “Imi dehan ba Siao nia oan feto: O nia liurai sei mai hasouru o ho laran kmaus, sa’e kuda burru inan ho nia oan.”

                ⁶ Eskolante sira ba hodi halo nudar Jesus haruka ba sira: ⁷ Sira lori kuda inan ho oan mai, tau sira nia unuk iha kuda nia leten, hafoin Jesus tur iha leten. ⁸ Ema lubun boot nahe sira nia tais iha dalan; sira seluk tesi ai-sanak sira hodi halekar iha dalan. ⁹ Sira nebe la’o iha Jesus nia oin no sira nebe tuir Nia hakilar maka’as: “Osana ba David nia Oan! Rahun diak ba Ida nebe mai hodi Na’i nia naran! Osana leten aas ba!”

                ¹⁰ Wainhira Jesus tama iha Jerusalem, ema hotu nebe iha sidade dehan: “Se mak ne’e?” No ema lubun boot hatan: “Ne’e mak profeta Jesus housi Nazare Galileia nian.”

Duni sai kontratu na’in sira housi templu

¹² Jesus tama iha templu hodi duni sai ema sira hotu nebe fila liman iha neba; Nia taka fila ema troka osan sira nia mesa, no mos sira nebe fa’an falur nia banku sira hodi dehan ba sira: ¹³  “Hakerek tiha ona: ‘Ema sei hanaran Ha’u nia uma orasaun nian’, maibe imi halo nia sai na’okten sira nia knuuk!”

                ¹⁴ Iha mos ema matan delek no ain kudeik sira nebe hakbesik ba Nia iha templu laran. Nia fo isin diak ba sira hotu. ¹⁵ Maibe wainhira am’lulik boot sira ho eskriba sira hare buat foun hirak nebe Nia halo, ho tan labarik sira nebe hakilar iha Templu “Osana ba David nia Oan!” sira laran nakali, ¹⁶ hodi dehan ba Nia: “O rona buat nebe sira dehan?” Jesus hatan: “Ha’u rona duni. Imi seidauk lee: ‘Housi labarik no kiik oan sira nebe inan ko’us mak o hetan hahi?’ ¹⁷ Tuir mai, husik tiha sira hodi sai tiha housi sidade, Nia horik iha Betania.

Malisan ba ai figueira

¹⁸ Dadersan nakukun, sira fila ba sidade. Tuir dalan, Nia hamlaha. ¹⁹ Hare tiha ai figueira hun ida iha dalan ninin, Nia hakbesik hodi hetan deit mak ai tahan. Nia dehan: “O sei la fuan tan!” Iha duni oras ne’e, ai figueira namlaek kedas. ²⁰ Hare ida ne’e, eskolante sira hakfodak, dehan: “Oin sa mak ai figueira ne’e namlaek kedas deit?” ²¹ Jesus dehan ba sira: “Ha’u dehan lialos ba imi: “Imi fiar karik, imi nia laran la namlele karik, imi sei la halo deit buat nebe Ha’u halo ba ai figueira ne’e; maibe imi dehan karik ba foho ida ne’e: ‘Sai tiha housi ne’e, soe o an ba tasi’, sei sai duni nune’e. ²² Imi fiar karik, buat hotu nebe imi husu iha orasaun, imi sei simu.”

Jesus nia kbiit

²³ Tuir mai Nia tama iha Templu. Nia hanorin dau-daun, am’lulik boot sira no katuas sira povu nian hakbesik Nia hodi dehan, “Ho kbiit nebe mak o halo buat ne’e? Se mak fo ba o kbiit ida ne’e?” ²⁴ Jesus hatan ba sira: “Ha’u mos sei husu buat ida ba imi: imi hatan karik, Ha’u sei dehan ba imi ho kbiit nebe mak Ha’u halo buat ne’e. ²⁵ Joao nia baptismu mai housi nebe: housi lalehan, ka housi ema sira?” Maibe sira hahu hanoin iha sira laran: “Ita hatan karik ‘Mai housi lalehan,’ Nia sei dehan mai ita: ‘Tansa imi la fiar nia?’ ²⁶ Ita hatan karik ‘Mai housi ema sira, ita tauk ema lubun, basa hot-hotu fiar katak Joao profeta ida.” ²⁷ Ne’e duni, sira hatan ba Jesus: “Ami la hatene.” Nia dehan fali ba sira: “Ha’u mos sei la dehan ba imi ho kbiit nebe mak Ha’u halo ne’e.”

Aiknanoik maun alin na’in rua nian

                ²⁸ “Imi hanoin oin sa? Ema ida iha oan mane na’in rua. Nia ba ida uluk hodi dehan: ‘Oan, ohin o ba serbisu iha to’os,’ ²⁹ Oan ne’e hatan: ‘Ha’u lakohi.’ Maibe, la kleur, nia hakribi hodi ba. ³⁰ Nia ba fali ida seluk hodi dehan ba nia hanesan nia dehan ba ida uluk Ida ne’e hatan; ‘Ha’u ba, Na’i.’ Maibe nia la ba. ³¹ Sira na’in rua ne’e, ida nebe mak halo tuir nia aman nia hakarak?” Sira hatan: “Ida uluk.” Jesus dehan ba sira: “Ha’u dehan lialos ba imi: ema publikanu no feto moris aat sira sei la’o uluk imi ba Maromak nia reinu. ³² Joao mosu ba imi hodi hatudu dalan moris diak nian, imi la fiar, maibe ema publikanu no feto moris aat sira fiar nia. Maski imi hare ona ida ne’e, imi lakohi hakribi sala hodi fiar iha nia.”

To’os atan aat

                ³³ “Rona aiknanoik ida ne’e tan. Ema ida kuda uvas iha to’os ida. Hale’u tiha ho lutu, nia ke’e fatin sama uvas ida iha to’os laran hodi harii uma aas ida; nia aluga ba ema sira, hafoin nia ba rai dook ida. ³⁴ To’o tempu atu ku’u uvas nian, nia haruka nia atan atu ba husu buat nebe monu ba nia. ³⁵ Maibe ema sira ne’e kaer atan sira, baku ida, oho ida seluk, tuda tan sira seluk. ³⁶ Tuir mai nia haruka tan atan sira seluk, barak liu fali sira uluk, maibe ema sira halo mos nune’e ba sira. ³⁷ Ikus mai nia haruka nia oan rasik hodi dehan: ‘Sira sei hamtauk ha’u nia oan.’ ³⁸ Maibe hare tiha nia oan, ema sira dehan ba malu: ‘Ida ne’e mak liman rohan na’in.’ ³⁹ Ne’e duni, sira kaer nia, soe ba to’os liur hodi oho nia. ⁴⁰ Wainhira to’os na’in mai, nia sei halo sa los ba ema sira ne’e?” ⁴¹ Sira hatan: “Nia sei haruka oho ema aat sira ne’e hodi saran to’os ba ema sira seluk nebe, to’o los tempu, sei hatama ai-fuan ba nia.” ⁴² Jesus dehan ba sira: “Imi seidauk lee Eskritura sira, ‘Fatuk nebe badaen sira hewai nakfila an ba fatuk inan? Ne’e, buat nebe Na’i halo, kmanek tebes duni ba ita matan.’”

                ⁴³ “Tan ne’e Ha’u dehan ba imi: ‘Maromak nia reinu sei hasai tiha housi imi hodi fo fali ba povu ida nebe sei fo fuan.” ⁴⁴ (Ema nebe monu ba fatuk ne’e sei rahun hotu; fatuk ne’e monu ba ema ruma karik, nia sei rahun hotu.) ⁴⁵ Rona tiha aiknanoik hirak ne’e, am’lulik boot sira no eskriba sira hatene lo-los katak nia koalia kona ba sira. ⁴⁶ Sira hakarak kaer Nia, maibe sira tauk povu nebe hare Nia nudar profeta.