23

Hasouru eskriba no fariseu sira

¹ Tuir mai Jesus koalia ba ema lubun boot no ba nia eskolante sira, dehan: ² “Eskriba no fariseu sira tur iha Moises nia kadeira. ³ Ne’e duni, imi simu hodi halo tuir buat hotu nebe sira dehan ba imi; maibe keta tuir sira nia hahalok, basa sira koalia maibe la halo. ⁴ Sira futu naha todan nebe susar atu foti hodi tau ba ema sira nia kabas, maibe sira rasik la book nia ho liman fuan ida. ⁵ Sira halo buat hotu atu ema hare sira. Nune’e, sira kesi fita boot ida ba sira nia rentos hodi hanaruk sira nia tais ninin; ⁶ sira kaan tur iha fatin uluk iha festa sira hodi buka tur iha oin iha sinagoga laran; ⁷ Sira hakarak ema kumprimenta sira iha prasa hodi bolu sira ‘Rabbi.’ ⁸ Imi fali, keta husik ema hanaran imi ‘Rabbi’, basa imi nia Mestre ida deit, no imi hotu mesa maun alin. ⁹ Keta bolu ema ida aman iha rai, basa imi nia Aman ida deit, nebe iha lalehan. ¹⁰ Keta husik ema hanaran imi doutor, basa imi nia doutor ida deit: Kristu. ¹¹ Imi ida nebe boot liu sei sai imi nia atan. ¹² Ida nebe foti an, Na’i sei hatun nia; ida nebe haraik an, Na’i sei hahi nia.”

¹³ “Susar boot ba imi, eskriba no fariseu sira, laran makerek, basa imi taka reinu lalehan nian ba ema sira; imi la tama, mos la husik ema seluk nebe hakarak tama. ¹⁴ Susar boot ba imi, eskriba no fariseu sira, laran makerek. Imi han mohu feto faluk sira nia uma hodi lohi sira ho imi nia orasaun nar-naruk; tan ne’e iha loron tesi lia nian, imi sei hetan kastigu boot. ¹⁵ Susar boot ba imi eskriba no fariseu sira, laran makerek. Imi hakur tasi la’o lemo rai hodi dada ema hotu tuir imi nia fiar no wainhira ida monu iha imi nia liman, imi halo nia infernu nia oan, aat liu imi dala rua. ¹⁶ Susar boot ba imi, matadalan sira nebe matan delek! Imi dehan: ‘Ema jura karik ba templu, ne’e la iha buat ida; maibe ema jura karik ba osan mean templu nian, nia sei halo tuir.’ ¹⁷ Beikten no matan delek sira! Ida nebe mak folin liu: osan mean, ka Templu nebe halo santu osan mean? ¹⁸ Imi dehan tan: ‘Ema ruma jura karik ba altar, ne’e la iha buat ida; maibe nia jura karik ba buat karan nebe iha altar leten, nia sei halo tuir.’ ¹⁹ Matan delek sira! Ida nebe  mak folin liu; buat karan, ka altar nebe halo santu buat karan? ²⁰ Ne’e duni, jura ba altar ne’e katak jura ba nia no mos ba buat nebe iha nia leten. ²¹ Jura ba Templu, ne’e katak jura ba nia no mos ba Ida nebe horik iha nia. ²² Jura ba lalehan, ne’e katak jura ba Maromak nia tur fatin no mos ba Ida nebe tur iha nia. ²³ Susar ba imi, eskriba no fariseu sira nebe laran makerek! Imi selu du’ut morin sira nia impostu hodi tau ba sorin buat hirak nebe boot liu iha ukunfuan: justisa, laran luak no laran mos. Tuir lo-los, imi sei halo tuir buat hirak ne’e hodi la hewai buat seluk. ²⁴ Imi matadalan matan delek sira ba ema matan delek sira. Imi tais susuk maibe tolan kuda kamelu!.

                ²⁵ Susar boot ba imi, eskriba no fariseu sira, laran makerek! Imi hamos kopu no bikan sira housi liur, maibe iha laran nakonu ho na’ok no buat aat. ²⁶ Fariseu matan delek sira, hamos uluk kopu no bikan laran atu bele sai mos iha liur. ²⁷ Susar boot ba imi, eskriba no fariseu sira, laran makerek! Imi hanesan rate sira nebe pinta mutin, furak iha liur, maibe iha laran nakonu ho mate ruin no buat foer oi-oin. ²⁸ Nune’e mos imi, ema sira hare imi mos iha liur, maibe iha laran nakonu ho lia bosok no hahalok aat. ²⁹ Susar boot ba imi, eskriba no fariseu sira, laran makerek, basa imi hada rate ba profeta sira hodi hafutar ema diak sira nia rate, ³⁰ dehan: ‘Ita moris karik iha ita bei-ala sira nia tempu, ita liman la foer hanesan sira nian ho profeta sira nia ran’. ³¹ Nune’e imi hatudu katak imi nia bei-ala sira mak oho profeta sira! ³² Ne’e duni, imi halo to’o rohan buat nebe imi nia bei-ala sira hahu!”

                ³³ “Imi samea sira, samea nia oan sira! Oin sa mak imi bele halai housi kastigu infernu nian? ³⁴ Tan ne’e Ha’u haruka ba imi profeta no ema matenek no eskriba sira. Sira balun, imi sei oho hodi hedi ba krus; sira seluk imi sei baku iha imi nia sinagoga sira, imi sei duni sira housi sidade ida ba sidade seluk. ³⁵ Nune’e sei nakfakar ba imi leten ema sala laek nia ran nebe uluk nakfakar iha rai, hahu housi Abel sala laek nia ran, to’o Zacarias, Baraquias nia oan, nebe imi oho iha santuariu no altar nia klaran. ³⁶ Ha’u dehan lialos ba imi, buat ne’e hotu sei fo todan ba derasaun ne’e.”

                ³⁷ “Jerusalem, Jerusalem, o nebe oho profeta sira, o nebe tuda ho fatuk ema sira nebe Na’i haruka ba o! Dala hira ona mak Ha’u hakarak halibur hamutuk o nia oan sira, hanesan manu inan halibur nia oan sira iha nia liras okos, maibe o lakohi! ³⁸ Tan ne’e imi nia uma sei sai mamuk. ³⁹ Basa Ha’u dehan ba imi katak imi sei la hare tan Ha’u to’o loron nebe imi dehan: ‘Rahun diak ba ida nebe mai hodi Na’i nia naran.’”