24

Templu sei naksobu rahun

¹ Jesus sai dau-daun housi Templu no nia eskolante sira hakbesik Nia hodi hatudu ba Nia uma kreda boot ne’e. ² Nia hatan ba sira dehan: “Imi hare buat ne’e? Ha’u dehan lialos ba imi katak iha ne’e fatuk ida sei la hela iha fatuk seluk nia leten, sei naksobu hotu.”

                ³ Hafoin, wainhira Nia tur iha foho oliveira nian, eskolante sira hakbesik Nia hodi husu mesa-mesak ba Nia; “Dehan mai ami wainhira buat ne’e hotu sei mosu, sinal ida nebe mak sei hatudu ita nia hiit an mai, no mundu ne’e atu hotu.”

Tempu susar no terus nian

⁴ Jesus hatan ba sira: “Imi matan moris neon na’in, atu ema keta lohi imi. ⁵ Basa ema barak sei mai hodi ha’u nia naran dehan; ‘Ha’u mak Kristu.’ Ho ne’e, sira sei lohi ema barak. ⁶ Imi sei rona koalia kona ba funu, kona ba lia funu nian: keta hakfodak, basa buat ne’e sei mosu duni, maibe rohan seidauk to’o. ⁷ Povu sei hamriik hasouru povu, reinu hasouru reinu; rai sei hamlaha, sei iha moras peste, rai sei nakdoko iha fatin oi-oin. ⁸ Ne’e hotu sei hatudu katak terus foin hahu. ⁹ Iha tempu ne’e sira sei haterus imi to’o mate; povu hotu sei odi imi tan ha’u nia naran. ¹⁰ Ema barak sei monu ba aat; sira sei bobar lia ba malu, sei rai odi ba malu. ¹¹ Profeta falsu barak sei mosu nebe sei lohi ema barak. ¹² Tamba hahalok aat sira sei sai wa’in liu tan, ema barak nia domin sei namlaek. ¹³ Maibe ema nebe fiar metin to’o rohan sei hetan moris rohan laek. ¹⁴ Lia foun reinu nian ne’e sei haklaken iha mundu tomak hodi fo sasin ba povu hotu. Iha oras ne’e sei to’o mai buat hotu nia rohan. ¹⁵ Ne’e duni, wainhira imi hare terus aat teb-tebes nebe Profeta Daniel dehan nanis mosu iha fatin santu (ema nebe lee buka hatene), ¹⁶ iha oras ne’e ema sira nebe iha Judeia sei halai ba foho; ¹⁷ ema nebe iha uma nia kakuluk, keta tun atu foti buat ida iha uma laran; ¹⁸ ida nebe iha to’os keta fila atu foti nia tais. ¹⁹ Susar boot ba feto sira nebe isin rua no sira nebe fo susu ba nia oan iha loron hirak ne’e! ²⁰ Imi harohan ba, atu imi lalika halai iha tempu malirin ka iha loron Sabadu. ²¹ Basa iha loron ne’e terus sei sai boot teb-tebes: houri mundu hahu to’o ohin seidauk mosu terus hanesan ne’e, aban bainrua mos sei la iha tan. ²² Loron ne’e la sai badak karik, ema hotu sei lakon, maibe loron ne’e sei sai badak duni tamba sira nebe Na’i fihir ona. ²³ Wainhira ema ida hateten ba imi, ‘Kristu mak ne’e’, ‘Mak neba’, imi keta fiar. ²⁴ Basa Kristu falsu no profeta falsu sira sei mosu hodi hatudu sinal no milagre sira hodi lohi, bele karik, sira hotu nebe Na’i fihir. ²⁵ Keta haluha, Ha’u fo hatene ne’e nanis ona.”

Oan Mane sei mai fali

²⁶ “Ne’e duni, sira dehan karik ba imi: ‘Nia iha rai fuik maran,’ imi keta ba neba. Ka: ‘Nia iha uma laran,’ imi keta fiar. ²⁷ Basa Oan Mane sei mai hanesan railakan nabilan housi loromonu to’o lorosa’e. ²⁸ Basa  iha fatin nebe isin mate hela, iha neba manu makikit sei halibur hamutuk. ²⁹ Liu tiha susar boot loron hirak ne’e nian, teki-teki loron sei nakukun, fulan sei la nabilan tan, fitun sira sei monu housi lalehan, lalehan nia kbiit sei nakdoko. ³⁰ Hafoin Oan Mane nia sinal sei mosu iha lalehan, povu sira iha raiklaran sei tanis, no sira sei hare Oan Mane iha kalohan leten ho kbiit no kmanek wa’in. ³¹ Nia sei haruka nia anju sira ho trombeta maka’as atu halibur sira nebe Nia fihir housi anin hat, housi lalehan nia hun to’o nia rohan.”

Aiknanoik ai figueira nian

³² “Imi buka hatene aiknanoik ai figueira nian: wainhira nia sanak sira sai nurak no hatubun  tahan sira, imi hatene  katak bainloron besik ona. ³³ Nune’e mos, wainhira imi hare buat ne’e hotu, imi hatene katak Nia besik to’o ona, iha duni odamatan ona. ³⁴ Ha’u dehan lialos ba imi: molok derasaun ne’e liu ona, buat sira ne’e hotu sei mosu mai. ³⁵ Lalehan no rai sei liu, maibe ha’u nia liafuan sei la liu.

Hein  loron ikus

³⁶ “Kona ba loron no oras ne’e, ema ida la hatene:  anju sira iha lalehan mos la hatene, Oan mos lae; Aman deit mak hatene. ³⁷ Hanesan uluk iha Noe nia loron, nune’e mos sei mosu, wainhira Oan Mane hiit An mai. ³⁸ Iha loron hirak neba, molok udan boot tau, ema sira han, hemu, kaben no fo kaben, to’o loron nebe Noe tama ba ro; ³⁹ sira la hatene buat ida to’o udan boot mai hodi taka sira hotu. Sei mosu mos nune’e wainhira Oan Mane sei hiit An mai. ⁴⁰ Iha loron ne’e mane na’in rua sei iha to’os laran: ida ema sei lori, ida seluk sei husik hela; ⁴¹ feto na’in rua sei fai aihan iha lesun; ida ema sei lori, ida seluk sei husik hela. ⁴² Ne’e duni, imi matan moris neon na’in ba basa imi la hatene loron wainhira imi nia Na’i sei hiit An mai. ⁴³ Imi buka hatene ida ne’e: uma na’in hatene karik tuku hira ahu-na’in sei mai, nia sei matan moris neon na’in, sei la husik sobu nia uma. ⁴⁴ Tan ne’e imi mos hein hela ba, basa Oan Mane sei mai iha oras nebe imi la hanoin.”

Aiknanoik atan badinas nian

⁴⁵ “Ne’e duni, se los mak ema matenek no badinas nebe Na’i haruka atu tau matan ba nia atan sira hodi fo han sira iha tempu lo-los? ⁴⁶ Rahun diak ba ema nebe, wainhira Na'i fila mai, nia sei hetan nia badinas nune’e. ⁴⁷ Ha’u dehan lialos ba imi, Na’i sei tau nia rikusoi tomak iha nia liman.  ⁴⁸ Maibe, ema ne’e aat karik hodi dehan ba nia an: ‘Ha’u nia Na’i sei kleur.’ Hafoin hahu baku nia maluk sira hodi han no hemu ho lanuten sira; ⁵⁰ atan ne’e nia Na’i sei mai iha loron nebe nia la hein, iha oras nebe nia la hatene. ⁵¹ Na’i sei fo kastigu todan ba nia hodi tau nia hamutuk ho ema laran makerek sira iha fatin nebe ema sei tanis no ruun nehan.