26
Judeu sira futu lia
1 Koalia hotu
tiha, Jesus dehan ba nia eskolante sira: 2 “Nudar
imi hatene, loron rua tan Paskua ona; ema sei saran Oan Mane atu hedi Nia ba
krus.”
3
Na’i ulun am’lulik sira nian ho katuas sira povu nian halibur an iha
am’lulik boot naran Kaifas nia kadunan, 4 hodi futu
lia atu kaer Nia sub-subar, hafoin oho Nia. 5 Maibe
sira dehan: “Ita keta halo buat ne’e iha loron festa, atu povu la bele
rungu-ranga.”
Mina morin iha Betania
6 Wainhira Jesus
iha Betania, iha Simao nebe moras lepra nia uma, 7 feto
ida nebe lori botil ho mina morin folin boot hakbesik ba Na’i hodi fakar ba nia
ulun wainhira Nia sei tur iha mesa. 8 Hare tiha
ne’e, eskolante sira hirus, dehan: “Tansa soe deit buat ne’e? 9
Basa mina morin ne’e bele fa’an ho folin boot no bele fo osan ne’e ba ema
kiak sira. 10 Maibe hatene tiha buat ne’e, Jesus
dehan ba sira “Tansa imi hasusar feto ne’e? Nia halo buat diak mai Ha’u. 11
Basa kiak sira imi hetan nafatin iha imi leet, maibe imi sei la hetan
Ha’u nafatin ho imi. 12 Nia fakar mina morin ne’e
ba ha’u nia isin hodi hadia ona Ha’u ba rate. 13 Ha’u
dehan lialos ba imi: iha fatin hotu iha mundu tomak nebe sei haklaken liafoun
diak ne’e, ema sei haktuir nafatin buat nebe nia foin halo hodi hanoin nia.”
Judas hasouru Jesus
14 Tuir mai, sira
na’in sanulu resin rua ne’e ida naran Judas Iscariotes, ba buka am’lulik ulun
sira 15 hodi dehan ba sira: “Ha’u saran karik Nia
ba imi liman, imi sei fo hira mai ha’u?” Sira selu ba nia osan mutin tolu nulu.
16 Houri oras ne’e, nia buka tempu diak ida atu
saran Jesus.
Han kalan ba dala ikus
17 Iha loron uluk
festa Paun fermentu laek nian, nia eskolante sira ba husu Jesus; “Ita hakarak
ami ba hadia sasan atu han Paskua iha los nebe?” 18 Nia
hatan: “Imi ba hasouru ema ida iha sidade hodi dehan ba nia: ‘Mestre dehan:
‘Ha’u nia tempu to’o tiha ona; Ha’u hakarak halo festa hamutuk ho ha’u nia
eskolante sira iha o nia uma.’” 19 Eskolante sira
halo tuir buat nebe Jesus haruka hodi hadia sasan ba Paskua. 20
To’o ona loraik Nia tur iha mesa hamutuk ho sira na’in sanulu resin rua. 21
Wainhira sira han dau-daun, Nia dehan: “Tebes Ha’u dehan ba imi; imi ida
sei saran Ha’u.” 22 Ho neon nakraik teb-tebes, sira
ida-ida hahu husu ba nia: “Keta ha’u karik, Na’i?” 23 Nia
hatan: “Ida nebe hatama nia liman hamutuk ho Ha’u iha bikan, nia mak sei saran
Ha’u. 24 Oan Mane tuir nia dalan nudar hakerek
nanis ona kona ba Nia; maibe susar boot ba ema nebe saran Oan Mane ba mate: nia
la moris karik kala diak liu!” 25 Judas, ida nebe
saran Nia, husu; “Keta ha’u karik, Mestre?” Jesus hatan ba nia: “O rasik mak
dehan.”
Eukaristia ba dala uluk
26 Wainhira sira
han dau-daun, Jesus kaer paun, haraik bensa, silu hodi fahe ba nia eskolante
sira, dehan: “Simu ba hodi han: ne’e Ha’u nia isin.” 27 Hafoin
nia kaer kalis, fo agradese hodi fo ba sira, dehan: “Imi hotu hemu ba: 28
ne’e ha’u nia ran, ran moruk foun nian nebe sei nakfakar atu kasu ema
barak nia sala. 29 Ha’u dehan ba imi katak Ha’u sei
la hemu tan tua uvas to’o loron nebe Ha’u sei hemu fali nia hamutuk ho imi iha
ha’u Aman nia reinu.”
Pedro sei heli lia
30 Hananu tiha
knananuk ida, sira sai hodi ba Foho Ai Oliveira nian. 31 Jesus
dehan ba sira: “Kalan ne’e imi nia fiar iha Ha’u sei namlele, basa hakerek
nanis ona; ‘Ha’u sei hakanek bibi atan, bibi sira sei namkari.’ 32
Maibe moris hi’as tiha housi mate, Ha’u sei ba Galileia uluk liu imi.” 33
Pedro hatan ba Nia: “Maski ema hotu husik Ita Boot, ha’u lae!” 34
Jesus dehan ba nia: “Ha’u dehan lialos ba o: iha kalan ne’e kedas, molok
manu kokorek, o sei nega Ha’u dala tolu.” 35 Pedro
simu fali: “Ha’u bele mate ho Ita Boot, maibe ha’u sei la nega Ita.” Eskolante
sira hotu mos dehan nune’e.
Orasaun iha to’os
36 Liu tiha ne’e,
Jesus ba ho sira iha to’os ida naran Getsemane. Nia dehan ba eskolante sira:
“Imi hela lai iha ne’e. Ha’u sei ba iha neba halo orasaun. 37
Nia lori Pedro ho Zebedeu nia oan rua. La kleur. Nia hahu oin nakraik,
neon susar. 38 Nia dehan ba sira: “Ha’u laran susar
to’o mate; imi hela iha ne’e hodi hader ho Ha’u.” 39 La’o
uitoan ba oin, Nia monu taka oin ba rai hodi harohan: “Ha’u Aman, bele karik,
hadook tiha kalis ne’e housi Ha’u; maibe halo tuir Ita hakarak ba, la’os ha’u
nian.”
40
Fila tiha ba eskolante sira, Nia hetan sira toba hela. Nia dehan ba
Pedro: “Imi la bele hader netik ho Ha’u oras ida deit? 41
Imi matan moris neon na’in ba hodi harohan, atu imi keta monu ba babeur.
Espiritu hakarak, maibe isin kbiit laek.”
42
Nia hadook An ba dala rua hodi harohan: “Ha’u Aman, Ha’u sei simu karik
kalis ne’e hodi kbiit, ne’e sa halo tuir ita hakarak ba!” 43
Hafoin Nia fila fali hodi hetan sira toba hela, matan dukur. 44
Husik tiha sira, Nia hadook An ba dala tolu atu harohan hodi dehan teni
liafuan sira uluk. 45 Tuir mai Nia fila fali ba nia
eskolante sira hodi dehan ba sira: “Oras ne’e imi bele toba hodi deskansa. Oras
besik ona atu Oan Mane monu ba ema maksalak sira liman. 46
Imi hamriik ba! Ita la’o ona! Ema nebe atu saran Ha’u besik ona mai!”
Sira kaer Jesus
47 Jesus sei koalia
hela wainhira Judas, sira na’in sanulu resin rua ida, mosu mai ho ema lubun
boot nebe kaer surik no ai-dona: sira ne’e, am’lulik boot sira no katuas sira
povu nian mak haruka mai. 48 Ida nebe atu saran Nia
fo tiha sinal ida ba sira, dehan: “Ida nebe Ha’u rei, Nia mak ne’e, imi kaer
Nia! 49 Nia hakbesik kedas ba Jesus hodi dehan ba
nia: “Salve, Mestre!” Hafoin nia rei Jesus. 50 Jesus
dehan nia: “Belun, o mai atu halo sa ida?” Tuir mai sira hakat ba oin, kaer
hodi futu Nia. 51 Teki-teki Jesus nia eskolante ida
losu nia surik, ta am’lulik boot nia atan ida hodi tesi tiha nia tilun ida. 52
Jesus dehan ba nia: “Hatama o nia surik ba nia fatin, basa ema hotu nebe
kaer surik, sei mate ho surik. 53 O hanoin katak
Ha’u la bele harohan ba ha’u Aman atu haruka kedas mai Ha’u anju lubun sanulu resin rua? Maibe oin sa
mak sei sai tuir Eskritura sira nebe dehan katak buat hotu sei sai tuir
nune’e?” 55 Iha oras ne’e, Jesus dehan ba ema lubun
boot: ‘Imi mai hanesan atu kaer na’okten ruma, ho surik no ai-dona atu kaer
Ha’u. Loron loron Ha’u tur iha Templu hodi hanorin, imi la kaer Ha’u. 56
Buat sira ne’e hotu mosu atu halo tuir Profeta sira nia lia iha Eskritura
sira.” Ho ne’e, eskolante sira hotu husik Nia hodi halai lakon.
Jesus iha tribunal
57
Ema sira nebe kaer Jesus lori Nia ba am’lulik boot Kaifas nia uma; iha
neba eskriba sira ho katuas sira povu nian halibur an hamutuk. 58
Pedro tuir housi dook to’o am’lulik boot nia kadunan. Tama tiha, nia tur
hamutuk ho atan sira atu hare buat hirak ne’e sei sai oin sa los.
59
Am’lulik ulun sira nia maluk hotu buka namanas lia bosok hasouru Jesus
atu saran nia ba mate; 60 maibe la hetan, maski
mosu sasin falsu barak. Ikus mai mosu sasin rua nebe dehan: 61
“Ema ne’e hateten: ‘Ha’u bele sobu tiha Maromak nia Templu hodi harii
fali iha loron tolu nia laran.’” 62 Am’lulik boot
hamriik hodi husu ba Nia: “O la hatan buat ida ba lia hirak ne’e hasouru O?” 63
Maibe Jesus nonok hela. Am’lulik dehan teni ba Nia: “Hodi Maromak moris nia
naran ha’u husu ba O atu dehan los; O mak Kristu, Maromak Oan, ka lae?” Jesus
hatan ba nia: “Ita rasik mak dehan buat ne’e. 64 Maibe
Ha’u dehan ba imi katak loron ida imi sei hare Oan Mane tur iha kbiit Na’in nia
sorin kuana, hafoin tun mai housi lalehan iha kalohan leten.” 65
Ho ne’e, am’lulik boot les nia hatais hodi dehan: “Nia koalia aat hasouru
Maromak! Ita buka tan sasin sa ida? Imi rasik mak rona nia lia aat. 66
Imi hanoin oin sa?” Sira hatan: “Nia soi atu mate!”
67
Tuir mai sira tafui ba nia oin hodi tuku Nia. Sira seluk basa Nia hodi
dehan: 68 “Kristu, si’ik to’ok! Se mak baku o?”
Pedro nega Jesus
69 La kleur,
wainhira Pedro tur dau-daun iha uma oin, atan feto ida hakbesik ba nia hodi
dehan; “O mos hamutuk ho Jesus Galileia nian.” 70 Maibe
nia heli lia iha ema hotu nia oin, dehan; “Ha’u la hatene o koalia kona ba sa
ida!” 71 Nia sai tiha ba odamatan, atan feto seluk
hare nia hodi dehan ba sira nebe iha neba: “Ida ne’e mos hamutuk ho Jesus
Nazare nian.” 72 Dala ida tan nia heli lia ho
juramentu: “Ha’u la hatene ema ne’e.” 73 La kleur,
sira nebe iha neba hakbesik ba Pedro hodi dehan: “Los duni, o mos nia emar sira
ida, basa o nia lia hatudu o nune’e.” 74 Nia hahu
hotar ho juramentu hodi dehan, “Ha’u la hatene ema ne’e!” Iha oras ne’e kedas,
manu kokorek. 75 Pedro hanoin kona liafuan nebe
Jesus uluk dehan: “Molok manu kokorek, o sei nega Ha’u dala tolu.” Hafoin, sai
tiha ba liur, nia tanis ho neon sala.
|