27

Jesus iha Pilatos nia oin

¹ To’o tiha dader, am’lulik boot hotu ho katuas sira povu nian halibur hamutuk hodi futu lia atu oho Jesus. ² Sira futu Nia, hafoin lori hodi saran Nia ba emboot Pilatos.

Judas nia mate

³ Hare tiha katak sira tesi lia hasouru Jesus, Judas nebe saran Nia, hakribi nia sala no ba fo fali osan mutin tolu nulu ba am’lulik boot sira no ba katuas sira hodi dehan: ^4“ Ha’u sala hodi saran ran sala laek.” Sira hatan: “Ami iha buat ruma ho ne’e? O mak hatene.” ⁵ Soe tiha osan sira iha templu, nia sai hodi ba tara an. ⁶ Maibe am’lulik boot hili osan sira ne’e hodi dehan: “Ita la bele tau osan ne’e iha osan fatin, basa ne’e ran nia folin.”  ⁷ Koalia hamutuk tiha, sira ba sosa to’os ida atu halo rate ida ba ema la’o rai sira. ⁸ Tamba ne’e, to’o ohin loron ema hanaran to’os ne’e rai ran nian.” ⁹ Nune’e sai tuir duni lia nebe profeta Jeremias dehan nanis: “Sira simu osan mutin tolu nulu, folin nebe Israel oan sira hanoin naton atu sosa Nia, ¹⁰ hodi ba sosa rai ema halo sana nian nia to’os nudar Na’i haruka ha’u.”

¹¹ Jesus hamriik iha emboot nia oin nebe husu ba Nia: “O Judeu sira nia liurai?” Jesus hatan: “Ita rasik mak dehan.” ¹² Maibe wainhira am’lulik boot sira ho katuas sira dun Nia, Nia la hatan buat ida. ¹³ Tan ne’e, Pilatos dehan ba Nia: “O la rona buat hotu nebe sira dehan hasouru O?” ¹⁴ Maibe Nia la dehan buat ida, halo emboot hakfodak.

¹⁵ Tinan tinan iha loron festa emboot toman atu husik sai housi kadeia ema dadur ida nebe povu husu. ¹⁶ Iha tempu ne’e, iha ema dadur ida naran Barrabas nebe ema hotu hatene. ¹⁷ Wainhira povu halibur an hamutuk, Pilatos husu ba sira: “Imi hakarak ha’u husik ida nebe: Barrabas, ka Jesus nebe ema bolu Kristu?” ¹⁸ Basa Nia hatene katak sira saran Nia tan laran moras. ¹⁹ Wainhira Pilatos tur hela iha tribunal, nia feen haruka dehan ba nia: “O keta tama kahur tan ho ema diak ne’e, basa ohin ha’u terus teb-tebes tan mehi ida kona ba Nia.” ²⁰ Maibe am’lulik boot sira ho katuas sira soran povu atu husu Barrabas hodi halakon Jesus. ²¹ Ne’e duni, wainhira emboot husu ba sira: “Sira na’in rua ne’e, imi hakarak ha’u husik ida nebe los?” Sira hatan: “Barrabas!” ²² Pilatus dehan ba sira: “Ba Jesus nebe hanaran Kristu , Ha’u sei halo sa ida?” Sira hatan: “Hedi Nia ba krus!” ²³ Pilatus dehan teni: “Nia halo sala sa ida?” Maibe sira hatan ho lia maka’as liu tan: “Hedi Nia ba krus!” ²⁴ Pilatus hare Nia la bele halo tan buat ida, ema sira mos hetok haklalak liu tan, nia fase liman iha ema lubun boot nia oin hodi dehan: “Ha’u nia liman mos kona ba ema ida ne’e nia ran: buat ida ne’e imi nian. ²⁵ Povu tomak hatan: “Husik nia ran monu iha ami no ba nia oan sira leten!” ²⁶ Tuir mai Pilatos husik tiha Barrabas, hafoin haruka baku Jesus hodi saran Nia ba sira atu hedi Nia ba krus.

 Jesus to’o mate iha krus

²⁷ Emboot nia soldadu sira lori Jesus ba pretoriu. Iha neba soldadu sira hale’u Nia. ²⁸ Sira kolu nia hatais hodi taka fali ho unuk mean ida. ²⁹ Hafoin sira leu ai-tarak hamutuk hodi tau iha nia ulun; sira halo nia kaer fafulu ida ho nia liman los. Sira hakneak iha nia oin hodi hamoe Nia, dehan: “Salve, Judeu sira nia liurai!” ³⁰ Tuir mai sira tafui ba Nia, kaer fafulu ne’e hodi baku nia ulun.  ³¹ Hamoe tiha Nia, sira kolu unuk mean hodi fo fali nia hatais. Hafoin sira lori Nia atu hedi iha krus. ³² Wainhira sira sai ona, sira hetan mane ida housi rai Sirene, naran Simao hodi obriga nia atu lori Jesus nia krus. ³³ To’o tiha fatin ida naran Golgota, katak “fatin ulun ruin nian,” ³⁴ sira fo tua kahur naan horun ba Nia; maibe koko tiha, Nia lakohi hemu. ³⁴ Hedi tiha Nia iha krus, sira fahe ba malu nia hatais sira hodi koko sorte; ³⁶ hafoin sira tur iha neba hodi hein Nia. ³⁷ Iha Nia ulun leten sira hakerek lia nebe fo sai tansa Nia mate: “Ne’e Jesus, Judeu sira nia liurai.” ³⁸ Hamutuk ho Nia, sira hedi mos iha krus ema ahu na’in rua, ida iha sorin los, ida iha sorin karuk. ³⁹ Sira nebe liu dau-daun, hateten aat Nia, doko ulun, dehan: ⁴⁰ “O nebe dehan katak o bele sobu Templu hodi harii fali nia iha loron tolu nia laran, soi o nia an ba! O Maromak nia Oan karik, tun housi krus ba, atu ami bele fiar O! ⁴¹ Na’ilulik boot no eskriba sira ho katuas sira mos hamoe Nia hodi dehan: ⁴² “Nia soi ema seluk, maibe la bele soi Nia an rasik! Nia liurai Israel nian karik, tun lai housi krus, hafoin ita sei fiar nia! ⁴³ Nia tau laran metin ba Maromak : Maromak hakarak Nia karik, husik Maromak soi Nia, basa Nia dehan, ‘Ha'u Maromak nia Oan.” ⁴⁴ Ahu-na’in sira nebe hedi ho Nia iha krus mos hateten aat Nia nune’e.

⁴⁵ Hahu loron fahe rua to'o tuku tolu loraik, rai tomak sai nakukun. ⁴⁶ Besik tuku tolu Jesus hakilar ho lia maka'as: “Eli, Eli lama sabaktani?” katak, “Maromak, Ha’u nia Maromak tansa Ita husik Ha’u?” ⁴⁷ Rona tiha ne'e, ema balun nebe iha neba dehan: “Nia bolu Elias!” ⁴⁸ Sira ida halai kedas, hola hena nebe habokon iha tua sin, tau iha fafulu ida hodi fo hemu Nia. ⁴⁹ Maibe sira seluk dehan: “Husik ba! Hare to'ok Elias mai soi Nia, ka lae!” ⁵⁰ Tu'ir mai, hakilar maka'as dala ida tan, Jesus iis kotu.

⁵¹ Teki-teki hena templu nian nakles fahe ba rua, housi leten to'o kraik. Rai nakdoko, fatuk sira nakfera; ⁵² rate sira nakloke. Ema santu sira barak nia isin mate moris fali, ⁵³ ema sira ne'e, liu tiha Jesus nia moris hi'as, sai housi rate no tama iha sidade santa hodi mosu ba ema barak. ⁵⁴ Hare tiha rai nakdoko ho tan buat hotu nebe mosu dau-daun, kapitaun ho soldadu sira nebe hein Jesus tauk teb-tebes hodi dehan: “Los duni, ida ne'e Maromak oan.”

⁵⁵ Hamri'ik mos iha neba hodi hateke housi dook, feto barak nebe tuir Jesus housi Galileia hodi serbi Nia. ⁵⁶ Sira ne'e balun mak Maria Madalena, Maria, Tiago ho Jose nia inan; ho tan Zebedeu oan sira nia inan.

Sira hakoi Jesus

⁵⁷ Besik kalan, ema riku ida housi Arimateia, naran Jose, nebe mos Jesus nia eskolante ida, to'o mai^{.  58} Nia ba koalia ho Pilatos hodi husu Jesus nia isin. ⁵⁹ Jose falun nia isin iha lensol mos ida, ⁶⁰ hodi tau Nia iha ninia rate foun ida nebe nia ke'e tiha iha fatuk. Hafoin nia duir netik fatuk boot iha rate ibun hodi ba tiha. ⁶¹ Maria Madalena ho Maria ida seluk hela iha neba, tur hela iha rate oin. ⁶² Liu tiha loron ida, katak liu tiha loron hadia Paskua nian, am’lulik boot sira no fariseu sira ba hamutuk hare Pilatos hodi dehan ba nia: ⁶³ “Na’i, ami la haluha buat nebe ema aat ne’e dehan wainhira  Nia sei moris hela: ‘Liu iha loron tolu, Ha’u sei moris fali.’ ⁶⁴ Ne'e duni, haruka ema atu hein netik rate to'o loron tolu; keta eskolante sira mai na’ok nia, hafoin dehan ba povu: ‘Nia moris fali housi mate.’ Lia bosok ne'e sei sai aat liu fali ida uluk.” ⁶⁵ Pilatus hatan ba sira: “Imi iha guarda sira; ba hodi hein nudar imi hatene.” ⁶⁶ Sira ba taka metin rate ho fatuk ida hodi tau guarda sira.