28

Jesus moris hi'as

¹ Liu tiha loron Sabadu iha dadersan nakukun loron uluk semana nian, Maria Madalena no Maria, ida seluk ba hare rate. ² Teki-teki rai nakdoko maka'as, basa Na’i nia Anju ida tun housi lalehan, hakbesik mai, duir tiha fatuk hodi tur iha nia leten. ³ Nia oin hanesan neve. ⁴ Guarda sira nakdedar ho tauk ba nia, to'o sai hanesan mate. ⁵ Maibe anju koalia hodi dehan ba feto sira: “Imi keta tauk. Ha’u hatene imi buka Jesus, nebe ema hedi Nia iha krus. ⁶ Nia la iha ne'e, basa nia moris hi'as tiha ona nudar uluk Nia dehan. Imi hare fatin nebe sira hatoba Nia ba. ⁷ Imi ba hodi dehan ba nia eskolante sira: 'Nia moris hi'as ona housi mate.’ Nia sei ba uluk liu imi iha Galileia. Imi sei hare Nia iha neba. Ha’u fo sai ona ba imi.”

⁸ Feto sira husik lalais rate. Ho tauk no ksolok boot sira halai ba fo hatene ba eskolante sira. ⁹ Teki-teki Jesus mai hasouru sira, dehan: “Salve!” sira hakbesik, hakoak nia ain hodi adora Nia. ¹⁰ Jesus dehan ba sira: “Keta tauk; imi ba dehan ba Ha’u nia maun alin atu ba Galileia; iha neba sira sei hare Ha’u.”

¹¹ Wainhira sira la'o tuir dalan, guarda balun ba sidade laran hodi fo hatene ba am'lulik boot sira buat hotu nebe mosu. ¹² Sira ne'e halibur hamutuk ho katuas sira. Hafoin, sira lia tuir malu hotu tiha, sira fo osan barak ba soldadu sira ¹³ hodi dehan ba sira: “Imi sei dehan ba povu: ‘Nia eskolante sira mai iha kalan hodi na’ok Nia wainhira ami toba dau-daun.’ ¹⁴ Lia ne'e monu karik ba emboot nia tilun, ami mak sei koalia ho nia, atu imi la bele hetan susar.” ¹⁵ Simu tiha osan, sira halo tuir lia nebe sira rona. Lia bosok ne'e namkari iha Judeu sira leet to'o ohin loron.

Jesus nia lia menon ikus

¹⁶ Eskolante sanulu resin ida ne'e la'o ba Galileia, ba foho nebe uluk Jesus hatudu ba sira. ¹⁷ Hare tiha Nia, sira adora Nia; maibe sira balun nia laran sei namlele hela. ¹⁸ Jesus hakbesik hodi koalia ba sira, dehan: “Kbiit tomak iha lalehan no rai fo tiha ona mai Ha’u. ¹⁹ Ne'e duni, imi ba hanorin nasaun hot-hotu; sarani sira hodi Aman, Oan no Espiritu Santu nia naran, ²⁰ hanorin sira atu halo lo-los buat hotu nebe Ha’u haruka ba imi. Ha’u sei hela nafatin hamutuk ho imi, to'o mundu nia rohan.”