MARCOS

1

Joao Baptista

                ¹ Liafuan diak kona ba Jesus Kristu, Maromak nia Oan Mane, hahu nune'e: ² Hakerek tiha iha livru profeta Isaias nian: “Ha’u haruka Ha’u manu ain ba uluk O, atu hadia dalan ba O.  ³ Lia ida nebe hakilar iha rai fuik  maran, ‘Hadia Na’i nia dalan, halos Nia dalan terik.’” ⁴ Nune'e mak Joao Baptista mosu iha rai fuik maran, hodi haklaken baptismu ida penitensia nian atu kasu sala. ⁵ Ema rai Judeia tomak, ema Jerusalem hotu ba hasouru nia, no wainhira sira simu baptismu housi nia iha mota Jordao, sira konfesa sira sala. ⁶ Joao hatais kuda kamelu nia fulun, no han lalaek no baniben. ⁷ Nia hanorin hodi dehan, “Tuir Ha’u sei to'o mai ida nebe maka'as liu ha’u.  Ha’u la soi atu hakru'uk hodi kore Nia sandalis tali. ⁸ Ha’u sarani imi ho be, maibe Nia sei sarani imi ho Espiritu Santu.”

Jesus nia baptismu. Diabu babeur Nia

                ⁹ Iha loron hirak ne'e duni mak Jesus mai housi Nazare Galileia nian, hodi simu baptismu housi Joao iha Jordao. ¹⁰ Wainhira Nia sai housi be, ema hare  kedas lalehan nakloke; no Espiritu, hanesan manu falur ida, tun ba Nia leten. ¹¹ Housi lalehan rona lia ida: “O Ha’u nia Oan doben tebes. Ha’u domin tomak  tau iha O.” ¹² Ne'e hotu tiha Espiritu Santu lori kedas Jesus ba rai fuik maran.¹³ Nia hela iha neba loron haat nulu. Satanas babeur Nia. Nia hela ho balada fuik sira, no anju sira serbi Nia. 

Jesus bolu ema kail ikan na'in sira

                ¹⁴ Wainhira ema dadur ona Joao, Jesus ba Galileia hodi hanorin Maromak nia liafuan diak. ¹⁵ “Tempu to'o ona,” Nia dehan, “Maromak nia reinu besik ona. Hakribi imi nia sala hodi fiar liafoun diak.”  ¹⁶ Liu housi tasi ibun Galileia nian, Nia hare Simao ho nia alin Andre soe sira nia dai ba tasi, basa sira kail ikan na'in. ¹⁷ Jesus dehan ba sira, “Imi tuir Ha’u mai; Ha’u sei halo imi kail na'in ema nian.” ¹⁸ Sira husik kedas dai hodi tuir Nia. ¹⁹ Liu tan uitoan ba oin, Nia hare Tiago, Zebedeu nia oan, ho nia  alin Joao iha sira nia  ro laran, hadia hela dai.  ²⁰ Nia bolu sira kedas. Sira husik  sira nia aman Zebedeu iha ro laran ho nia emar sira hodi tuir Jesus.

Ema ida ho espiritu foer

                ²¹ Sira ba to'o Kafarnaum. Wainhira loron Sabadu to'o, Nia ba sinagoga hodi hahu hanorin. ²² Ema hotu hakfodak ho Nia hanorin, basa nia hanorin hanesan ema nebe iha kbiit, la'os hanesan eskriba sira. ²³ Lo-los iha tempu neba iha sinagoga, mane ida ho diabu iha nia laran mosu. Nia dehan ho lia maka’as, ^{24 “}O hakarak sa ida housi ami, Jesus Nazare? O mai atu halakon ami? Ami hatene O se los: O Maromak nia  santu!” ²⁵ Maibe Jesus lia tun ba nia hodi si’ak: “Nonok! sai housi nia!” ²⁶ Diabu doko maka'as ema ne'e hodi hakilar, hafoin sai housi nia. ²⁷ Ema hotu hakfodak teb-tebes. Nune'e, sira hahu husu malu buat hirak ne'e katak sa. “Ne'e hanorin foun ida,” sira dehan, “no ho kbiit tan! Nia haruka diabu sira, sira halo tuir.” ²⁸ Nia naran sai boot lalais kedas iha fatin hotu iha Galileia tomak.

Jesus fo isin diak ba ema barak

                       ²⁹ Wainhira  Jesus sai housi sinagoga, Nia hamutuk ho Tiago no Joao, ba los Simao no Andre nia uma. ³⁰ Simao nia banin feto moras isin manas, toba hela. Sira fo hatene kedas ba Jesus kona ba nia. ³¹ Jesus hakbesik nia, kaer nia liman hodi tulun nia atu hamriik. Isin manas lakon kedas no nia hahu fo han sira. ³² Iha loraik, loron monu tiha, ema hahu lori ba Nia ema moras sira no sira nebe iha diabu iha laran. ³³ Ema hotu sidade nian mai halibur an hamutuk iha odamatan. ³⁴ Nia fo isin diak ba ema barak nebe terus moras oi-oin, hodi duni sai diabu barak. Maibe Nia la husik diabu sira koalia, basa sira hatene Nia se.

Jesus hanorin iha Galileia

                ³⁵ Dadersan nakukun, Nia hamriik, sai ba fatin fuik ida hodi harohan. ³⁶ Simao ho nia maluk sira buka tuir Nia. ³⁷ Hetan tiha Nia, sira dehan, “Ema hotu buka ita.” ³⁸ Maibe Nia hatan ba sira, “Ita ba knua sira iha sorin balun ba atu Ha’u hanorin mos iha neba, basa tan ne’e mak Ha’u mai.” ³⁹ Nia hanorin iha sinagoga sira Galileia tomak nian hodi duni sai diabu sira.

Jesus fo isin diak ba ema moras lepra ida

                ⁴⁰ Ema moras lepra ida mai buka Nia, hakneak iha rai hodi husu Nia, “Ita hakarak karik, Ita bele fo isin diak mai Ha’u.” ⁴¹ Jesus hanoin nia, lolo nia liman hodi kaer nia dehan, “Ha’u hakarak; hetan isin diak ba!” ⁴² Iha oras ne'e kedas, lepra lakon. Nia diak ona. ⁴³ Jesus haruka nia ba, hodi dehan ho oin maka'as,  ^{44 “}Keta fo hatene ba ema ida, maibe la'o ba, hatudu o nia an ba am’lulik hodi hasa'e buat nebe Moises haruka atu fo hatene katak o hetan ona isin diak.”  ⁴⁵ Maibe ema ne'e sai hodi fo hatene kedas buat ne'e iha fatin hotu; nune'e Jesus la bele hatudu Nia An iha sidade sira. Nia la'o deit iha liur, iha rai fuik. Maibe housi fatin hotu ema mai buka Nia.