3

Ema ho liman aat

                ¹ Jesus ba fali sinagoga ida. Iha neba iha ema nebe liman aat. ² Sira hateke ba Nia atu hare keta Nia fo isin diak ba nia iha loron Sabadu, hodi hein atu foti lia ruma hasouru Nia . ³ Nia dehan ba ema ho liman aat: “Hamriik iha klaran mai!”  ⁴ Tuir mai, Nia husu sira: “Tuir ukunfuan, ida nebe mak bele halo iha loron Sabadu, halo diak eh halo aat: soi ema nia moris eh halo aat nia?” Maibe sira  nonok deit.  ⁵ Laran nakali tebes tamba Nia hetan katak sira  laran tos, Nia hateke ba ema hotu nebe hale’u Nia, hodi dehan ba ema ne'e, “Lolo o nia liman.” Nia lolo nia liman, no nia liman diak kedas.  ⁶ Fariseu sira sai ba liur no hahu kedas atu la'o hamutuk ho Herodes nia emar sira hodi buka oin sa sira bele halo aat Nia.

Jesus iha tasi ibun

                ⁷ Jesus la’o ba tasi ibun Galileia nian ho Nia eskolante sira. Ema lubun boot housi Galileia la'o tuir Nia.  ⁸ Housi Judeia, housi Jerusalem, housi Jordao nia sorin no housi rai Tiro no Sidon nia sorin sorin, ema lubun boot nebe  rona kona ba buat hotu nebe Nia halo mai buka nia. ⁹ Nia haruka nia eskolante sira atu hadia ro ida ba Nia atu ema lubun boot ne'e la bele hanehan Nia, ¹⁰ basa Nia fo isin diak ba ema barak, no sira hotu nebe moras buka atu hakbesik no kona Nia. ¹¹ Espiritu foer sira nebe  hare Nia, monu iha Nia ain hodi hakilar ho lia maka'as, “Ita Maromak nia Oan!” ¹² Maibe Jesus bandu sira ho oin tos atu la bele fo hatene Nia se.

Jesus fihir nia emar sanulu resin rua

                ¹³ Jesus sa'e ba foho no bolu  sira nebe Nia hakarak. Atu la'o ho Nia. ¹⁴ Nia fihir ema na'in sanulu resin  rua atu la'o hamutuk ho Nia no haruka sira atu hanorin ¹⁵ hodi fo kbiit ba sira atu duni sai diabu sira. ¹⁶ Nia hili sira sanulu resin rua ne'e: Simao, nebe Nia hanaran Pedro: ¹⁷ Tiago, Zebedeu nia oan, no Joao, Tiago nia alin. Sira ne'e Nia hanaran Boanerges, katak rai tarutu nia oan: ¹⁸ Andre, Filipe, Bartolomeu, Mateus, Tome, Tiago, Alfeu nia oan, Simao  Zeloso  ¹⁹ no Judas Iscariotes, nebe sei saran Nia.

Jesus no diabu sira nia na’i ulun

                ²⁰ Jesus fila fali ba uma, no dala ida tan, ema lubun boot buka Nia.  Tan ne'e Nia la bele han.  ²¹ Wainhira Nia parenti sira rona kona ba ida ne'e, sira sai atu kaer Nia, basa sira dehan katak Nia bulak ona. ²² Eskriba sira nebe mai housi Jerusalem  dehan, “Nia iha diabu,” no “Nia  duni sai diabu sira hodi diabu sira nia Na’i ulun nia naran.” ²³ Ne’e duni Jesus bolu sira hodi haktuir aiknanoik ida ba sira dehan, “Oin sa mak diabu bele duni sai diabu? ²⁴ Reinu ida la tuir malu karik, reinu ne'e la bele tahan. ²⁵ Uma-kain ida la iha unidade karik, uma-kain ne'e la bele hela kleur; ²⁶ nune’e mos Satanas hamriik hasouru nia an karik, nia fahe  malu ona;  nia la bele tahan; nia rohan to'o ona ²⁷ Ema ida la bele tama iha ema maka'as nia uma hodi na’ok nia rikusoi molok nia, uluk knanain, kaer ema maka'as ne'e. Foin mak nia bele na’ok rikusoi sira.”

                ²⁸ “Tebes Ha’u ba imi: ema sira nia sala no sira nia lia aat hasouru Maromak sei hetan perdua, maibe ema nebe hateten aat Espiritu Santu sei la hetan perdua. Nia halo sala rohan laek nian.”  ²⁹ Ne'e tamba sira dehan, “Nia iha diabu.”

Jesus Nia inan no maun alin

                ³¹ Nia inan no maun alin sira to'o iha neba. Sira hamriik iha liur hodi hameno lia atu fo hatene ba Nia. ³² Iha tempu nebe lia hirak ne'e to'o ba Nia, “O nia inan no maun alin sira hela iha liur hodi buka O,” ema lubun boot tur hale’u Nia. ³³ Nia hatan: “Se mak Ha’u nia inan no maun alin sira?” ³⁴ Hodi hateke ba sira nebe hale’u Nia, Nia dehan, “Sira ne'e mak Ha’u nia inan no maun alin sira. ³⁵ Ema nebe halo tuir Maromak nia hakarak, ema ne'e mak Ha’u nia maun alin, bin feton no inan.”