4

Aiknanoik kona ba fini

                ¹ Nia hahu hanorin fali iha tasi ibun.  Ema lubun boot mai atu rona nia. Tan ne'e Nia tur iha ro ida  iha tasi laran. Ema sira hela iha tasi ibun, iha rai maran. ² Nia hanorin sira buat barak ho aiknanoik. Nia hanorin dehan  ³ “Rona di-diak ba. Ema ida ba kari fini. ⁴ Nia kari fini dau-daun, fini balun monu iha dalan. Manu sira mai hodi  han sira hotu. ⁵ Balun monu iha fatuk leten. Iha neba rai uitoan deit. Fini sira ne'e moris lalais, basa rai la klean, ⁶ maibe wainhira loron sa'e hamanas sira, sira namlaek, basa sira abut la iha. ⁷ Fini balun monu iha ai-tarak laran. Ai-tarak moris maka'as hodi hanehan sira. Fini sira ne'e la fo fuan ida. ⁸ Fini balun monu iha rai diak, hodi moris buras no fo fulin maka’as, balun dala tolu nulu, balun neen nulu, no balun dala atus ida.” ⁹ Nia dehan tan, “Ema nebe iha tilun, rona ba!”

                 ¹⁰ Wainhira Nia mesa-mesak ona, sira sanulu resin rua no mos sira seluk nebe tuir Nia husu aiknanoik ne'e katak sa. ¹¹ Nia hatan ba sira: “Misteriu Maromak  nia reinu nian fo sai tiha ona  ba imi, maibe ba sira nebe hela iha liur buat hotu mai deit housi aiknanoik sira,¹² atu sira hare fila fila maibe la hare mos; sira rona fila fila maibe la hatene los, keta sira fila ba diak karik no hetan perdua.

Jesus fo hatene sai aiknanoik  fini nian katak sa

                ¹³ Hafoin Nia dehan ba sira, “Imi komprende aiknanoik ida ne'e? Oin sa imi bele komprende aiknanoik sira seluk? ¹⁴ Fini nebe ema kari mak liafuan. ¹⁵ Sira nebe monu iha dalan mak ema sira nebe, rona tiha liafuan, Satanas mai kedas hodi hasai housi sira liafuan nebe foin kari. ¹⁶ Nune'e mos, sira nebe simu fini iha fatuk leten mak sira nebe, wainhira sira foin rona liafuan, simu nia ho ksolok, ¹⁷ maibe sira nia abut la iha. Sira la tahan. Susar ruma mosu karik, eh terus ruma tamba liafuan mai hasouru karik, sira monu lalais. ¹⁸ Hafoin sira seluk nebe simu fini iha ai-tarak laran, sira ne'e rona tiha liafuan, ¹⁹ maibe hanoin mundu ne'e nian no mos babeur housi  rikusoi no babeur sira seluk hanehan liafuan ne'e. Nune'e nia la fo fuan ida. ²⁰ Sira nebe  simu liafuan iha rai diak, sira rona liafuan  hodi simu nia no fo fuan barak; balun dala tolu nulu, balun dala neen nulu eh dala atus ida.”

Lilin iha balde okos

                ²¹ Jesus dehan tan ba sira, “Imi sunu lakan lilin ida hodi tau nia iha balde okos eh iha tobafatin okos?  Lo-los, imi sei tau nia  iha lilin fatin! ²² La iha buat ida nebe bele subar nebe ema sei la fo sai; la iha buat ida nebe haksumik nebe ema sei la fo hatene. ²³ Ema nebe iha tilun  atu rona, rona ida ne'e ba.”

                 ²⁴ Nia dehan mos ba sira, “Rona di-diak buat nebe imi rona dau-daun. Sasukat nebe imi usa sei usa mos ba imi, no barak liu tan, ²⁵ basa ba ema nebe iha ona sei fo tan; housi ema nebe la iha, buat nebe nia iha sei hasai tan housi nia.”

Aiknanoik musan nia

                ²⁶ Nia dehan mos, “Maromak nia reinu hanesan ne'e: Ema ida kuda musan ida iha rai. ²⁷ Kalan loron, nia toba ka hader, musan ne'e moris no sai boot; oin sa los, nia la hatene. ²⁸ Housi nia kbiit rasik, rai fo uluk dikin, hafoin fulin, no ikus mai trigu nebe tasak ona.²⁹ Wainhira trigu tasak ona, ema ne'e kaer tudik, basa tempu atu ko'a trigu to'o ona mai.”

Aiknanoik mustarda musan nian

                ³⁰ Jesus dehan tan; “Ita sei usa ilas ida nebe atu hatudu Maromak nia reinu? Ho aiknanoik ida nebe mak ita sei hatudu nia? ³¹ Nia hanesan mustarda musan ida nebe wainhira ema kari iha rai mak kiik liu musan sira hotu iha  raiklaran, ³² maibe kuda tiha, nia moris no sai boot liu hodi hatubun sanak bo-boot atu nune'e manu sira iha lalehan bele subar an iha nia mahon.”

                ³³ Ho aiknanoik barak hanesan ne'e, Nia haklaken ba sira tuir buat nebe sira bele komprende. ³⁴ Ba sira, Nia koalia ho aiknanoik deit, maibe ba eskolante sira, wainhira sira mesa-mesak deit, Nia fo hatene mo-mos buat hotu.

Jesus halo tasi hakmatek                 

                ³⁵ Iha loron ne'e rasik, wainhira loraik ona, Nia dehan ba sira, “Ita hakur tiha ba tasi sorin balun ba.”  ³⁶ Sira husik ema lubun boot hodi lori deit Nia iha ro laran. Ro seluk mos ba hamutuk ho Nia. ³⁷ Tuir mai, anin hahu sai boot. Laloran baku maka'as ro, halo be tama iha ro laran, besik atu nakonu. ³⁸ Jesus iha ro ikun, toba hela ho Nia ulun iha somasu leten. ³⁹ Sira fanu Nia hodi dehan, “Mestre, Ita la hare katak ita atu mate ona?” Nia hamriik. Ho lia maka'as, Nia koalia ba anin no dehan ba tasi, “Nonok! Hakmatek ba!” Anin nonok kedas; buat tomak hakmatek. ⁴⁰ Hafoin Nia lia tun ba sira, “Tan sa imi tauk hanesan ne'e? Nusa imi fiar laek?”  ⁴¹ Sira tauk teb-tebes hodi dehan ba malu, “Ema ne'e se los? Anin no tasi mos halo tuir Nia!”