5

Jesus fo isin diak ba ema nebe iha espiritu foer

                        ¹ Sira to'o rai Gerasa iha tasi nia sorin balun. ² Wainhira Nia tun housi ro, ema ida ho espiritu foer sai housi rate sira leet ba hasouru Nia. ³ Ema ne'e horik iha rate sira laran. La iha ema nebe bele tahan nia, ⁴ basa ema kesi tiha ona nia dala barak ho korente no kadeiadu, maibe nia halo kotu korente no halo aat kadeiadu sira. La iha ema nebe maka'as atu tahan nia. ⁵ Kalan loron, iha rate no mos iha foho leten, nia hakilar hodi hakanek nia an ho fatuk. ⁶ Wainhira nia hare Jesus housi dook, nia halai hasouru Nia hodi monu ain ba Nia, ⁷ no hakilar ho lia maka'as, “Ita hakarak sa ida housi ha’u, Jesus, Maromak aas liu nia Oan? Hakotu lia ba Maromak katak Ita sei la halo aat ha’u.” ⁸ Basa Jesus hateten tiha ona ba nia, “Sai housi ema ne'e, espiritu foer!” ⁹ Jesus husu, “O nia naran sa?” “Ha’u naran Lubun Boot,” nia hatan, “basa ami barak.” ¹⁰ Nia husu ho laran manas atu la bele duni sai sira housi fatin neba. ¹¹ Iha neba iha foho nia sorin, iha fahi barak nebe han dau-daun. ¹² Espiritu foer sira husu Nia: “Haruka ami tama iha fahi sira, husik ami ba sira.” ¹³ Jesus husik sira, nune'e espiritu foer sai housi ema ne’e hodi tama iha fahi sira. Fahi sira nebe sura besik rihun rua halai housi foho ba tasi laran. Iha neba sira mout hotu.

                ¹⁴ Sira nebe hein fahi halai hodi haktuir buat ne'e hotu iha fatin tomak iha neba. Ema sira mai atu hare buat nebe mosu. ¹⁵ Sira hakbesik Jesus hodi hare ema nebe uluk espiritu foer sira hela, tur hela ho hatais. Nia isin no hanoin diak ona; nia nebe uluk iha espiritu foer barak iha nia laran. Sira hotu tauk teb-tebes. ¹⁶ Sira nebe hare buat hotu ne'e haktuir kona ba ema ne'e no kona ba fahi sira. ¹⁷ Tan ne'e, ema sira hahu husu Jesus atu husik ona fatin neba. ¹⁸ Wainhira Nia atu sa'e ona ro ida, ema nebe uluk iha espiritu foer husu  Jesus atu husik nia la'o hamutuk ho Nia. ¹⁹ Jesus la husik maibe dehan ba nia, “O ba ona uma, ba o nia familia, hodi haktuir ba sira buat hotu nebe Na’i, iha Nia laran luak halo ona ba o.” ²⁰ Nune’e ema ne'e la'o ba hodi haklaken iha rai Dekapoli tomak buat hotu nebe Jesus halo ba Nia. Ema hot-hotu hakfodak.

Jairo nia oan feto

                ²¹ Wainhira Jesus hakur fali iha ro laran ba tasi nia sorin balun, ema lubun boot hakbesik hale’u Nia. Nia hamriik iha tasi ibun. ²² Na’i ulun sinagoga nian ida, naran Jairo,  to'o mai. Hare tiha Jesus, nia monu ain ²³ hodi husu nune'e, “Ha’u oan feto besik atu mate. Ita hiit an mai,  tau liman ba nia atu soi nia. Nune'e nia bele moris.” ²⁴ Jesus la'o hamutuk  ho nia. Ema lubun boot tuir Nia. Ema ida-ida buka atu hakbesik Nia.

                ²⁵ Iha neba iha feto ida nebe, ba tinan sanulu  resin rua ona mak lakon ran. ²⁶ Nia terus teb-tebes iha doutor barak  sira liman hodi halakon nia rikusoi  tomak, maibe la hetan diak ida; hetok nia sai aat liu tan. ²⁷ Nia rona kona ba Jesus. Nia mai housi kotuk iha ema lubun boot sira leet hodi kona Jesus nia hena. ²⁸ Nia dehan ba nia an rasik, “Ha’u kona deit karik Nia hena, Ha’u sei hetan isin diak,” ²⁹ Iha oras ne'e kedas, ran la suli tan. Nia isin lolon tomak hetan diak. ³⁰ Jesus hatene kedas katak kbiit ruma sai housi Nia. Nia fila oin ba ema lubun boot hodi husu, “Ema se mak kona Ha’u nia hena?” ³¹ Eskolante sira dehan ba Nia , “Ema lubun boot habit dau-daun Ita.  Ita sei husu, ‘Se mak kona Ha’u nia hena?’” ³² Maibe Nia hateke hale’u nafatin atu hare ema nebe halo buat ne'e. ³³ Feto ne'e hakat ba oin, nakdedar no tauk, tan nia  hatene  buat nebe mosu ba nia.  Nia hakneak iha Nia oin hodi dehan sai lialos hotu. ²⁴ “Ha’u oan feto,” Jesus dehan, “o nia fiar mak soi o. La'o ba iha dame laran. O hetan diak housi o nia moras ba!”

                ³⁵ Jesus sei koalia hela wainhira ema sira  housi na’i ulun sinagoga nian nia uma mosu mai hodi dehan, “Na’i, ita boot nia oan feto mate ona. Tansa ita boot  halo Mestre kole tan?” ³⁶ Maibe, rona tiha liafuan hirak ne'e, Jesus dehan ba sinagoga nia na’i ulun, “O keta tauk. Fiar deit  ba.” ³⁷ Nia la husik ema ida tuir nia. Nia lori deit Pedro, Tiago no Joao, Tiago nia alin. ³⁸  Sira to'o tiha na’i ulun sinagoga  nian nia uma,  Jesus hetan ema barak book an maka'as; balun tanis,  balun hakilar.  ³⁹  Nia tama hodi dehan ba sira, “Tansa imi book an maka'as hodi tanis? Labarik feto ne'e la mate; nia toba deit!” ⁴⁰ Sira hasara Nia. Nia haruka sira sai hotu. Nia lori labarik nia aman no inan, ho tan sira nebe mai hamutuk ho Nia ba fatin nebe labarik hela. ⁴¹ Nia kaer labarik nia liman hodi dehan ba nia, “Talitha, kumi!” katak “Labarik feto, hamriik ba.” ⁴² Labarik feto ne'e hamriik kedas hodi hahu la'o mai la'o ba, basa nia iha tinan sanulu resin rua ona. Ema hotu hakfodak. ⁴³ Jesus lia tun ba sira hodi bandu atu ema la bele hatene buat ne'e. Hafoin Nia haruka sira atu fo han ba nia.