6

Ema hewai Jesus iha Nazare

                ¹ Sai tiha housi fatin ne'e, Jesus fila fali ba Nia rai. Nia eskolante sira la'o hamutuk ho Nia.  ² Too tiha  loron Sabadu, Nia tama iha sinagoga atu hanorin. Ema sira nebe rona Nia koalia hakfodak hodi dehan ba malu, “Nia simu buat hirak ne'e hotu housi los nebe? Oin sa mak Nia bele halo milagre bo-boot hirak ne'e?  ³ Nia la'os badaen ai nian, Maria nia oan; Tiago, Jose, Judas no Simao nia maun alin? Nia feton sira la horik iha ita leet?  ⁴ Sira sai bilan kona ba nia. ⁵ Jesus lia tun ba sira dehan, “Iha deit nia rai, iha deit nia uma no parenti sira leet mak profeta ida la hetan naran boot.” Tan ne'e, nia la bele halo milagre iha neba; Nia fo isin diak ba ema moras balun deit hodi tau liman ba sira. ⁶ Nia hakfodak tamba sira fiar laek liu. Nune'e Nia la'o tiha ba knua sira nebe besik hodi hanorin iha neba.

Sira sanulu resin rua

                ⁷ Nia bolu sira sanulu resin rua hodi haruka sira na'in rua rua no haraik mos ba sira kbiit atu ukun espiritu foer sira. ⁸ Nia haruka sira lori deit iha dalan ai-tonka ida; la bele lori bukae eh kohe, ka doit iha futukabun. ⁹ Sira bele usa sandalis maibe la bele lori hatais tahan rua. ¹⁰ Nia dehan ba sira, “Tama tiha iha uma ida, imi sei horik iha neba to'o imi fila. ¹¹ Fatin ruma la rona eh la simu imi karik, sai tiha housi neba hodi liki rai rahun housi imi nia ain nudar sasin hasouru sira.” ¹² Sira sai ba dau-daun hodi hanorin atu hakribi sala. ¹³ Sira duni sai diabu barak no kose  mina ba ema moras barak hodi halo sira hetan isin diak.

Liurai Herodes

                ¹⁴ Liurai Herodes rona kona ba Jesus, basa iha tempu ne'e Nia naran boot ona teb-tebes. ¹⁵ Nia dehan katak Joao Baptista moris hi’as housi mate, tan ne'e Nia iha kbiit atu halo milagre sira. Ema dehan, “Nia Elias,” ema seluk dehan, “Nia profeta ida hanesan profeta sira uluk nian.” ¹⁶ Maibe, wainhira Herodes rona sira ne'e, nia dehan, “Nia mak Joao Baptista duni. Ha’u tesi tiha nia ulun Nia moris hi’as housi mate.”

Herodes haruka Joao nia ulun

                ¹⁷ Herodes rasik haruka atu kaer Joao Baptista, hodi hatama nia iha dadur laran tamba Herodiade, Herodes nia alin Filipe nia kaben nebe nia hola fali. ¹⁸ Basa Joao lia tun ba Herodes dehan, “Tuir ukunfuan, o la bele hola fali o nia alin kaben!” ¹⁹ Herodiade hirus nia teb-tebes hodi hakarak oho nia, maibe nia la bele, ²⁰ basa Herodes tauk Joao, nebe nia hatene nudar ema diak no santu ida. Herodes tau matan ba nia; Wainhira nia rona nia koalia, nia laran taridu barak, maibe nia haksolok atu rona nia.

                ²¹ Tempu diak ida mosu mai wainhira Herodes halo tinan. Nia halo festa boot ida ba soldadu sira nia na’i ulun sira no mos ba ema boot sira rai Galileia nian. ²² Wainhira Herodiade nia oan feto mai dansa,  nia fo ksolok boot ba Herodes ho nia maluk sira. Tan ne'e, liurai dehan ba feto ne'e, “Husu buat naran deit nebe o hakarak, Ha’u sei fo ba o.” ²³ Nia dehan tan hodi jura, “Ha’u sei fo buat naran  deit  nebe o sei husu, maski ha’u nia reinu nia sorin balun ida.” ²⁴ Feto ne'e sai hodi husu nia inan, “Ha’u sei husu sa los?” Nia hatan, “Joao Baptista nia ulun.” ²⁵ Feto ne'e halai kedas ba liurai hodi hateten, “Ha’u hakarak katak ita boot fo mai ha’u ohin kedas Joao Baptista nia ulun iha bandeja ida.” ²⁶ Liurai laran susar teb-tebes maibe tamba hanoin liafuan nebe nia hakotu tiha ona no mos tamba nia maluk sira, nia lakohi la halo tuir nia liafuan. ²⁷ Nune’e, liurai haruka kedas soldadu ida atu  lori Joao nia ulun. Ema ne’e la’o ba hodi tesi Joao nia ulun iha dadur laran. ²⁸ Tuir mai, nia lori fali ulun ne'e iha bandeja ida nia laran hodi fo nia ba feto. Feto ne'e fo fali nia ba nia inan.

                ²⁹ Wainhira Joao nia eskolante sira rona kona ba buat hirak ne'e, sira mai hodi lori nia isin mate atu hakoi.

Milagre uluk paun ninian

                ³⁰ Apostolu sira fila mai no tur hale’u Jesus, hodi haktuir ba Nia buat hotu nebe sira halo no hanorin.³¹ Nia lia tun ba sira dehan, “Imi mai, ita la'o mesak ba fatin fuik ida atu tur halimar uitoan.” Ne'e tamba ema nebe la'o mai la'o ba barak tebes. Sira la biban atu han. ³² Tan ne'e, sira sa'e ro hodi hadook an ba fatin fuik ida. ³³ Ema hare sira dada an, no ema barak hatene kedas. Nune'e, housi knua sira hotu, ema barak halai housi rai, no to'o uluk liu sira iha fatin neba. ³⁴ Wainhira Jesus tun housi ro, Nia hetan ema lubun boot ida. Nia hanoin ema sira ne'e teb-tebes, basa sira hanesan bibi nebe bibi atan la iha. Nia hahu hanorin sira buat barak.

                ³⁵ Wainhira kalan besik ona, Nia eskolante sira hakbesik Nia hodi dehan, “Fatin ne'e fuik, no mos kalan besik ona. ³⁶ Ne’e duni, haruka sira ba atu sira bele la'o ba uma sira nebe besik hodi sosa buat ruma atu han.”  ³⁷ Nia hatan, “Imi rasik fo han sira.” Sira simu, “Ami atu sosa paun osan atus rua nia folin ba sira ne'e?” ³⁸ Nia husu sira, “Imi iha paun fuan hira? Ba, hare ba!” Sira ba, no wainhira hatene ona, sira dehan, “Iha paun fuan lima no ikan rua.” ³⁹ Tuir mai, Nia haruka sira atu halo ema sira tur hamutuk iha grupu iha du’ut modok nia leten. ⁴⁰ Sira tur, ema atus ida atus ida eh lima nulu lima nulu. ⁴¹ Tuir mai, Nia kaer paun fuan lima no fo ba Nia eskolante sira atu fahe ba ema sira. Nune'e mos Nia fo ikan ba sira. ⁴² Ema hot-hotu han to'o bosu. ⁴³ Sira halibur hamutuk paun no ikan nia resin, luhu sanulu resin rua nakonu. ⁴⁴ Sira nebe han besik rihun lima.

Jesus la'o iha be leten

                ⁴⁵ Ne’e hotu tiha, Nia haruka Nia eskolante sira atu sa'e ro hodi ba uluk Betsaida. Nia rasik haruka ema lubun boot ne'e ba ona uma. ⁴⁶ Sira ba tiha ona, Nia sa'e ba foho tutun atu resa. ⁴⁷ Wainhira kalan ona, ro dook ona iha tasi laran, Nia mesak hela iha rai. ⁴⁸ Nia hare katak sira kbiit la to'o atu hean, basa anin hu’u hasouru sira. Besik rai hun mutin, Nia hakbesik sira hodi la'o iha be leten. Nia halo sira hanoin katak Nia atu liu deit, ⁴⁹ maibe wainhira sira hare Nia la'o iha be leten, sira hanoin katak Nia mate klamar ida. ⁵⁰ Sira hakilar maka'as, basa sira hotu hare Nia. Sira hotu tauk teb-tebes. Maibe Nia koalia kedas ba sira dehan, “Aten berani ba. Ha’u mak ne'e, keta tauk!” ⁵¹ Tuir mai , Nia tama ba ro laran. Anin hakmatek ona. ⁵² Sira bilan deit, basa sira la komprende milagre paun nian katak sa. Sira nia hanoin sei nakukun hela.

Jesus fo isin diak ba moras sira

                ⁵³ Wainhira sira hakur tiha ona ba tasi nia sorin balun, Jesus ho Nia eskolante sira la'o ba Genesare. Sira kesi ro iha neba. ⁵⁴ Wainhira sira tun tiha housi ro, ema barak hatene kedas sira. ⁵⁵ Sira halai ba knua nebe besi-besik hodi lori fali ema moras sira iha sira nia tobafatin ka biti, ba fatin nebe sira rona katak Jesus horik hela. ⁵⁶ Wainhira Nia tama iha knua eh sidade ruma, ka la'o iha dalan, sira tau ema moras sira iha fatin luan ida hodi husu Nia atu husik sira kona Nia hatais nia ninin. Sira hotu nebe kona nia hetan isin diak.