8

Jesus fo han ema rihun hat

                ¹ Iha tempu neba, ema lubun boot ida halibur an. Sira aihan la iha. Tan ne'e, Jesus bolu Nia eskolante sira hodi dehan ba sira, ² “Ha’u hanoin ema sira ne'e. Sira hela ona ho Ha’u loron tolu no sira aihan la iha. ³ Ha’u haruka sira ba uma karik, sira sei monu iha dalan. Balun mai housi dook.” ⁴ Eskolante sira simu: “Ita bele hetan aihan ba sira ne'e hotu housi los nebe iha fatin fuik ne'e?” ⁵ Nia husu ba sira, “Imi iha paun fuan hira?” “Hitu,” sira hatan. ⁶ Tuir mai Nia haruka sira atu tur iha rai. Nia kaer paun fuan hitu ne'e  fo agradese, silu hodi fo ba eskolante sira atu fahe. Sira fahe duni ba ema sira hotu. ⁷ Iha mos ikan kiik balun. Nia fo bensa ba sira ne'e, no haruka atu fahe ba ema sira. ⁸ Sira han to'o bosu. Sira halibur hamutuk paun rahun resin luhu hitu nakonu. ⁹ Ema sira ne'e besik rihun hat. ¹⁰ Nia haruka sira ba uma. Tuir mai, Nia sa'e kedas ro ida ho Nia eskolante sira hodi la'o ba rai Dalmanutha.

Fariseu sira husu sinal ida 

                ¹¹ Fariseu sira hakbesik Jesus hodi hahu haksesuk malu ho Nia. Sira husu sinal ida housi lalehan atu koko Nia. ¹² Ho laran susar, Nia dehan, “Tan sa ema sira otas ne'e nian husu sinal ida? Tebes Ha’u dehan imi katak sei la fo sinal ida ba ema sira otas ne'e nian.” ¹³ Nia husik sira, hodi sa'e ro atu hakur ba tasi nia sorin balun.

Fariseu no Herodes nia fermentu

                ¹⁴ Eskolante sira haluha lori paun. Sira iha paun fuan ida deit iha ro laran. ¹⁵ Jesushateten ba sira, “Matan moris neon na'in ba kona ba fariseu no Herodes sira nia fermentu.” ¹⁶ Sira haksesuk malu hodi dehan , “Nia dehan ne'e tamba paun la iha.” ¹⁷ Wainhira Jesus hatene sira nia hanoin, Nia dehan ba sira, “Tan sa imi hanoin katak Ha’u hateten ne'e tamba paun la iha? Imi seidauk hare no komprende? Imi nia fuan sei la hatene? ¹⁸ Imi matan iha maibe la hare? Tilun iha maibe la rona? Imi la hanoin hetan? ¹⁹ “Wainhira Ha’u fahe paun fuan lima ba ema rihun lima, imi halibur paun rahun luhu hira?” Sira hatan, “Sanulu resin rua.” ²⁰ Wainhira Ha’u fahe paun fuan hitu ba ema rihun haat, imi halibur fali paun rahun luhu hira?” Sira hatan, “Hitu." ²¹ Nia dehan teni ba sira, “Imi seidauk komprende?”

Jesus halo ema matan delek hare

                ²² Sira to'o rai Betsaida. Ema lori ba Nia ema matan delek ida. Sira husu Nia atu tau liman ba nia. ²³ Nia kaer ema matan delek ne'e nia liman hodi lori nia ba knua nia liur. Nia tafui ba ema ne'e nia matan hodi tau liman ba nia. Nia husu, “O bele hare buat ruma?” ²⁴ Ema ne'e nebe hahu hare, hatan, “Ha’u hare ema sira nudar ai-hun nebe la'o ba la'o mai.” ²⁵ Tuir mai Nia tau fali Nia liman ba ema nia matan. Nia hare di-diak ona. Nia bele hare mo-mos buat hotu. ²⁶ Nia haruka ema ne'e ba uma hodi dehan, “Keta tama iha knua nia laran, keta fo hatene ba ema ruma.”

Pedro nia lia sasin

                ²⁷ Jesus no Nia eskolante sira la'o ba knua sira Sesareia Filipe nian. Tuir dalan Jesus husu ba Nia eskolante sira, “Ema sira dehan katak Ha’u se los?” ²⁸ Sira hatan, “Joao Baptista; balun Elias, seluk fali ema duina ida.” ²⁹ Hafoin Nia husu ba sira, “Imi dehan Ha’u se los?” Pedro hatan ba Nia, “Ita boot mak Messias.” ³⁰ Jesus bandu sira atu la bele hateten sai ba ema ida kona ba Nia.

Jesus koalia kona ba Nia terus no mate

                ³¹ Tuir mai, Jesus hahu hanorin sira katak Oan Mane sei terus barak. Katuas sira no am’lulik  boot sira ho eskriba sira sei hakribi Nia, sei oho Nia, maibe liu loron tolu Nia sei moris hi’as. ³² Nia fo hatene sai mo-mos ida ne'e kedas ba sira. Pedro hadook Nia uitoan housi sira nia maluk hodi haksi’ak Nia. ³³ Maibe Nia fila ba kotuk, hateke ba Nia eskolante sira no haksi’ak Pedro dehan, “Hadook an tiha housi Ha’u , Satanas, basa o la buka Maromak nia hakarak maibe o buka deit ema nia hakarak.” ³⁴ Hafoin Jesus bolu fali ema lubun boot ho Nia eskolante sira hodi dehan ba sira, “Ema nebe hakarak tuir Ha’u, nia sei hakribi nia an rasik, simu nia krus hodi la'o tuir Ha’u. ³⁵ Basa, ema nebe hakarak soi nia moris sei lakon nia; maibe ema nebe lakon nia moris tamba Ha’u no tan liafuan diak sei soi nia.³⁶ Ema manan sa los wainhira nia manan mundu tomak maibe halo aat nia klamar? ³⁷ Eh ema sei troka sa los ba nia klamar? ³⁸ Basa ema nebe moe kona ba Ha’u no Ha’u nia liafuan iha otas maksalak no foer ne'e nian, Oan Mane mos sei moe kona ba nia wainhira Nia mosu mai iha Nia Aman nia kmanek ho Nia anju santu sira.”