9

                 ¹ Nia dehan ba sira, “Tebes Ha’u dehan ba imi katak ema ida housi sira nebe iha ne'e sei la mate molok nia hare Maromak nia reinu mosu mai ho kbiit tomak.”

Jesus nakfila An

                ² Liu tiha loron ne'e, Jesus lori Pedro, Tiago no Joao mesa-mesak ba foho aas ida. Nia nakfila An iha sira nia oin. ³ Nia hena sira sai nabilan, mutin teb-tebes hanesan neve; ema ida iha rai ne'e la bele halo mutin liu tan. ⁴ Hafoin Moises no Elias mosu ba sira hodi koalia ba Jesus. ⁵ Pedro hahu koalia, dehan ba Jesus, “Mestre, diak liu ita horik ona iha ne'e! Ami halo takabaluk tolu; ida ba Ita, ida ba Moises no ida ba Elias.” ⁶ Basa nia la hatene atu dehan sa los, tan sira tauk teb-tebes. ⁷ Kalohan ida tun mai, taka sira. Housi kalohan ne'e sira rona lia ida dehan, “Ida ne'e mak Ha’u Oan doben. Imi rona Nia ba!” ⁸ Teki-teki, sira hare ba sorin sorin maibe la hare tan ema ida; Jesus mesak deit iha neba hamutuk ho sira. ⁹ Tun dau-daun housi foho, Jesus dehan sira atu keta haktuir ba ema ida buat nebe sira hare, molok Oan Mane moris hi’as housi mate. ¹⁰ Ne’e duni, sira nonok hodi husu ba sira an rasik moris hi’as housi mate ne'e katak sa. ¹¹ Sira husu ba Nia dehan, “Tan sa eskriba sira dehan katak Elias sei mai uluk knanain?” ¹² “Tebes duni,” Nia hatan ba sira, “Elias sei mai uluk atu hadia buat hotu, no oin sa Eskritura hateten kona ba Oan Mane katak Nia sei terus maka'as hodi ema hewai Nia ho laran aat? ¹³ Maibe Ha’u dehan ba imi katak Elias mai tiha ona, no ema sira trata nia nudar sira hakarak, lo-los nudar Eskritura haktuir ba Nia.”

Jesus fo isin diak ba labarik ida nebe iha espiritu foer

                ¹⁴ Wainhira Nia ba hamutuk fali ho eskolante sira seluk, Nia hare ema lubun boot hale’u sira, hamutuk ho eskriba balun nebe haksesuk malu ho sira. ¹⁵ Wainhira sira hare Jesus, ema hotu hakfodak tebes hodi halai hasouru Nia no kumprimenta Nia. ¹⁶ Nia husu, “Imi haksesuk malu kona ba se los?” ¹⁷ Ema ida housi lubun ne’e hatan ba Nia, “Mestre, ha’u lori ha’u nia oan ne'e mai Ita. Nia iha espiritu aat iha laran. ¹⁸ Wainhira espiritu aat ne'e kaer nia, nia soe nia ba rai. Kaben sai housi nia ibun. Nia ruun nehan no nia isin tos. Ha’u husu Ita nia eskolante sira atu duni sai nia maibe sira la bele.” ¹⁹ “Imi ema fiar laek!” Nia hatan. “To'o wainhira mak Ha’u sei horik ho imi? To'o wainhira los mak Ha’u sei tahan imi? Lori nia mai!” ²⁰ Sira lori labarik ba Nia. Wainhira espiritu aat hare Jesus, nia doko maka'as labarik ne'e to'o nia monu ba rai. Nia kaben nakfurin iha nia ibun. ²¹ “Houri wainhira mak buat ne'e mosu ba nia?” Jesus husu ba nia aman. “Houri kiik kedas,” aman hatan. ²² “Dala barak espiritu aat ne'e soe nia ba ahi no ba be nia laran atu halo aat nia. Ita bele halo buat ruma karik, hanoin ami no tulun ami.” ²³ “Ita bele karik?” Jesus husu. “Buat hotu bele deit ba ema nebe fiar!”  ²⁴ Labarik nia aman dehan kedas, “Ha’u fiar duni; tulun ha’u nia fiar kiik ne'e.” ²⁵ Wainhira Jesus hare ema barak nebe hakbesik Nia, Nia si’ak espiritu aat. “Espiritu tilun diuk no monok, Ha’u haruka o, sai housi nia no keta fila fali tan!” Nia dehan. ²⁶ Doko fali labarik ne'e, espiritu aat sai housi nia hodi hakilar maka'as. Labarik monu ba rai hanesan ema mate ida. Nune'e ema barak dehan, “Nia mate ona.” ²⁷ Maibe Jesus kaer nia liman no halo nia hamriik, to'o nia bele hamriik mesa-mesak.

                ²⁸ Wainhira Nia tama ona iha uma laran, eskolante sira husu Nia, “Tan sa ami la bele duni sai nia?” ²⁹ Jesus hatan ba sira, “Buat sira hanesan ne'e bele duni sai deit hodi hamulak no hadera an.”

Jesus koalia fali kona ba Nia mate

                ³⁰ Nia ho nia eskolante sira hakat liu ba Galileia nia sorin. Nia lakohi katak ema hatene ne'e. ³¹ Tuir mai, Nia hanorin Nia eskolante sira hodi dehan, “Ema sei saran Oan Mane ba ema sira liman, no ema sira ne'e sei oho Nia. Maibe mate tiha, liu tiha loron tolu, Nia sei moris hi’as fali.” ³² Sira la komprende lia hirak ne'e katak sa, maibe sira tauk atu husu Nia.

Se mak boot liu

                ³³ Too tiha Kafarnaum, Jesus tama iha uma laran no husu Nia eskolante sira, “Imi haksesuk malu kona sa los iha dalan?” ³⁴ Sira nonok deit basa sira haksesuk malu kona ba sira ida nebe mak boot liu. ³⁵ Hafoin Jesus tur tiha, bolu sira na'in sanulu resin rua hodi dehan ba sira, “Ema se mak hakarak sai boot liu sira seluk nian, nia sei sai ikus liu hotu hodi sai ema hotu nia atan.” ³⁶ Tuir mai, kaer tiha labarik oan ida hodi tau nia iha sira nia klaran no hakoak nia, Nia dehan, ³⁷ “Ema nebe simu labarik oan ida ne'e hodi Ha’u nia naran, nia simu Ha’u rasik; no ema nebe simu Ha’u, la simu Ha’u maibe simu ida nebe haruka Ha’u mai.”

Ema nebe la funu hasouru Nia

                ³⁸ Joao hasa’e lia ba Nia, “Mestre, ami hare ema ida nebe duni sai diabu hodi Ita nia naran. Nia la la'o ho ita, tan ne'e ami bandu tiha nia.” ³⁹ Maibe Jesus hatan, “Imi keta halo nune'e, basa ema ida la bele halo milagre hodi Ha’u nia naran hafoin hateten aat kedas Ha’u. ⁴⁰ Ema nebe la halo aat hasouru ita, nia ita nian. ⁴¹ Ema nebe fo be kopu ida ba imi tan imi Kristu nian, Ha’u hateten kedas ba imi, ema ne'e sei la lakon nia kolen.”

Ema nebe dada labarik ba sala

                ⁴² “Ema ruma dada karik ba aat labarik oan ida nebe fiar Ha’u, diak liu tara fatuk hadulas batar nian ba ema ne'e nia kakorok, hafoin soe nia ba tasi laran. ⁴³ O nia liman dada karik o ba sala, tesi tiha nia; hetan moris ho liman ida deit diak liu fali tama iha inferno ho liman rua tomak. ⁴⁴ Iha neba ular sira sei la mate, ahi mos la mate. ⁴⁵ O nia ain lori karik o ba sala, tesi tiha nia. Tama ba moris rohan laek ho ain ida deit diak liu fali tama iha infernu ho ain rua. ⁴⁶ Iha neba ular sira la mate, ahi mos la mate. ⁴⁷ O nia matan ida dada karik o ba sala, losu tiha nia. Tama iha Maromak nia reinu ho matan ida deit diak liu fali tama iha infernu ho matan rua. ⁴⁸ Iha neba ular sira la mate, ahi mos la mate. ⁴⁹ Ema hotu sei hamer an ho ahi. ⁵⁰ Masin diak, maibe wainhira masin lakon nia mer, oin sa mak o bele halo nia mer fali? Imi iha masin iha imi nia an ba, hodi moris ho dame ho imi nia maluk sira.”