10

Jesus hanorin kona ba haketak malu

                ¹ Housi neba, Nia la'o ba rai Judeia hodi hakur ba Jordao nia sorin balun. Dala ida tan ema lubun boot hakbesik Nia. Tuir Nia lisan, Nia hanorin sira. ² Tuir mai, fariseu balun mai atu koko Nia hodi husu: “Mane ida bele soe nia kaben ka lae?” ³ Maibe Nia hatan ba sira, “Moises fo ukun sa los?” ⁴ Sira hatan, “Moises husik katak kaben na'in ida hakerek surat haketak malu nian hodi soe malu.” ⁵ Jesus dehan, “Nia hakerek ukunfuan ne'e ba imi basa imi fuan tos. ⁶ Houri uluk kedas,  Maromak halo sira mane ho feto; ⁷ tan ne'e, mane ida husik nia aman no inan sira hodi ba hamutuk ho nia kaben. Sira Na’i rua sai isin ida deit. ⁸ Ne’e duni, sira la'os tan ema na’in rua, maibe isin ida deit. ⁹ Tan ne'e, buat nebe Maromak tau hamutuk ona, ema ida  haketak fali^.”

                ¹⁰ Wainhira sira to'o ona uma, eskolante sira husu fali kona buat ida ne'e. ¹¹ Nia dehan ba sira, “^'Mane ida nebe soe nia kaben no hola feto seluk halo adulteriu hasouru nia; ¹² no mos feto ida nebe soe nia laen hodi hola fali mane seluk halo adulteriu.”

Jesus fo bensa ba labarik sira

                 ¹³ Ema lori labarik sira ba atu Nia tau liman sira. Maibe eskolante sira haksi’ak sira nebe lori labarik sira ne'e. ¹⁴ Wainhira Nia hare sira, Nia hirus hodi dehan ba sira, “Husik labarik sira hakbesik Ha’u; keta hadook sira. Lo-los, reinu lalehan mak ba sira nebe hanesan sira ne'e. ¹⁵ Tebes Ha’u dehan ba imi: Ema nebe la simu Maromak Nia reinu hanesan labarik oan sira ne'e, nia sei la tama iha neba.” ¹⁶ Hafoin, Nia hakoak labarik sira, tau liman ba sira hodi fo bensa ba sira.

Foinsa’e ida nebe riku

                ¹⁷ Wainhira Nia atu la'o ona, ema ida halai hasouru Nia, tuku tur ba rai hodi husu Nia, “Mestre diak, Ha’u sei halo sa atu bele hetan moris rohan laek?” ¹⁸ Jesus hatan ba nia, “Tan sa o dehan katak Ha’u diak? Maromak deit mak diak. ¹⁹ O hatene Maromak nia ukunfuan sira hotu: keta halo adulteriu, keta oho, keta na’ok, keta foti lia bosok hasouru ema, keta lohi ema, hamtauk ho nia aman no inan.” ²⁰ Nia hatan hodi dehan ba Nia, “Mestre, Ha’u moris tuir sira ne'e hotu houri kiik kedas.” ²¹ Jesus fihir nia di-diak, hadomi nia hodi dehan ba nia, “Buat ida deit mak o sei kuran: fila ba uma, fa'an o nia sasan tomak, fahe ba ema kiak sira no o sei hetan rahun diak iha lalehan. Halo tiha ne'e, mai tuir Ha’u.” ²² Rona tiha liafuan hirak ne'e , nia neon sala tebes; nia fila ba uma ho neon nakraik, basa nia iha rikusoi barak.

                ²³ Jesus hateke ba sira nebe hale’u Nia hodi dehan ba Nia eskolante sira, “Susar tebes duni ba ema riku ida atu tama iha Maromak nia reinu.” ²⁴ Eskolante sira hakfodak ho lia fuan sira ne’e. Maibe Jesus dehan tan ba sira, “Oan doben sira, tama iha Maromak nia reinu susar tebes duni ba sira nebe tau sira nia laran ba rikusoi sira. ²⁵ Kuda kamelu ida atu tama iha daum nia kuak lalais liu fali ema riku ida atu tama iha Maromak nia reinu.” ²⁶ Sira hakfodak liu tan hodi hateten ba malu, “Nune'e karik, ema se mak bele hetan maksoin?” ²⁷ Jesus hateke ba sira hodi dehan, “Ba ema la bele, maibe la'os ba Maromak, basa ba Maromak buat hotu bele deit.” ²⁸ Pedro simu dehan ba Nia, “Ami husik buat hotu hodi tuir Ita.” ²⁹ Jesus hatan dehan, “Tebes Ha’u dehan ba imi; la iha ema nebe husik uma, feto naan, maun alin, inan, aman oan ka to'os tamba liafuan diak, ³⁰ nebe sei la simu uma, maun alin, inan, oan no to'os sira dala atus ida liu fali uluk nian iha tempu ne'e hamutuk ho susar oi-oin, no iha tempu nebe atu mai, moris rohan laek. ³¹ Maibe, ema barak nebe mai uluk sei sai ikus, sira nebe mai ikus sei sai uluk.”

Jesus koalia kona ba Nia mate ba dala tolu

                ³² Sira sa'e dau-daun ba Jerusalem. Jesus la'o iha sira oin. Sira bilan deit. Sira nebe tuir Nia tauk. Dala ida tan, haketak tiha ema sanulu resin rua housi sira seluk, Nia hahu hateten ba sira buat nebe sei mosu ba Nia. ^{33 “}Ohin ita sa'e ba Jerusalem, ema sei saran Oan Mane ba am’lulik boot no eskriba no katuas sira. Sira sei tesi lia ba Nia hodi haruka ema atu oho Nia. Sira sei saran Nia ba ema gentiu sira, ³⁴ nebe sei hasara Nia no tafui ba Nia no baku Nia no oho Nia; liu loron tolu Nia sei moris hi’as.”

Tiago no Joao husu buat ida

                ³⁵ Tiago no Joao, Zebedeu nia oan sira, hakbesik Nia dehan, “Mestre, ami hakarak katak Ita halo buat nebe ami husu.” ³⁶ Nia dehan ba sira, “Imi hakarak katak Ha’u halo sa los ba imi?” ³⁷ Sira hatan, “Halo ami tur, ida iha Ita nia sorin kuana, ida iha Ita nia sorin karuk, iha Ita nia kmanek.” ³⁸ “Imi la hatene buat nebe imi husu,” Jesus dehan ba sira.  “Imi bele hemu kopu nebe Ha’u sei hemu, eh simu baptismu nebe Ha’u sei simu?” ³⁹ Sira hatan, “Ami bele.” Jesus dehan ba sira, “Kopu nebe Ha’u sei simu, imi sei simu duni; no baptismu nebe Ha’u  sei simu imi sei simu duni ; ⁴⁰ maibe kona ba tur iha Ha’u nia sorin kuana eh sorin karuk, buat ne'e la iha Ha’u nia kbiit atu fo ba imi, maibe rai hela ba sira nebe Maromak hadia tiha ona.”

⁴¹ Wainhira sira na'in sanulu seluk rona ne'e, sira hirus Tiago no Joao, ⁴² maibe Jesus bolu sira hotu hodi dehan, “Imi hatene katak iha gentiu sira leet, Na’i ulun sira ukun ho liman todan hodi halo sira nia emar sira halo tuir duni. ⁴³ Maibe iha imi leet, la'os hanesan ne'e. Ema se hakarak sai boot, nia sei sai ema nia atan; ⁴⁴ no ida nebe hakarak sai uluk liu iha imi leet, nia sei sai imi nia atan; ⁴⁵ basa Oan Mane rasik la mai atu ema serbi Nia, maibe atu serbi ema, no atu saran Nia moris atu soi ema hotu.”

Jesus halo Bartimeu hare fali

                ⁴⁶ Sira ba to'o Jeriko. Wainhira Nia atu sai ona housi neba ho Nia eskolante sira ho ema lubun boot, ema matan delek ida, Bartimeu, Timeo nia oan, tur iha dalan ninin, husu esmola.  ⁴⁷ Wainhira nia rona katak Jesus Nazare liu housi neba, nia hahu hakilar hodi dehan, “Jesus, David nia Oan, sadia ha’u!” ⁴⁸ Ema barak si’ak nia hodi haruka nia atu nonok, maibe nia hakilar maka'as liu tan, “David nia Oan, sadia ha’u!” ⁴⁹ Jesus hamriik hodi haruka atu lori nia mai. Ne'e duni sira bolu ema matan delek ne'e. “Aten berani,” sira dehan, “Hamriik ba. Nia bolu o.” ⁵⁰ Nia soe nia lipa, hamriik kedas hodi la'o lalais ba Jesus. ⁵¹ Jesus lia tun ba nia dehan, “O hakarak Ha’u sei halo sa los ba o?” “Mestre,” ema matan delek ne'e hatan, “Halo Ha’u hare!” ⁵² Jesus lia tun, dehan, “Ba, o nia fiar soi o!” Nia matan nakloke kedas no nia la'o hamutuk ho Jesus iha dalan.