LUCAS

1

Introdusaun

¹ Doben Teofilo, ema barak haka’as an ona atu haktuir buat hirak nebe mosu iha ita leet, ² nudar sira nebe hare ho matan rasik houri uluk no sira nebe haklaken liafuan hato’o mai ita. ³ Tan ne’e, ha’u hanoin atu, buka tiha atu hatene lo-los buat hotu houri uluk kedas, ha’u hakerek fali di-diak buat hirak ne’e ba o, ⁴ atu o bele hatene katak lia hotu nebe o simu, lia los duni.

Joao Baptista nia moris

                ⁵ Iha tempu nebe liurai Herodes ukun iha Judeia, iha am’lulik ida naran Zacarias, housi Abias nia uma-kain. Nia kaben naran Isabel mai housi Aarao nia uma-kain. ⁶ Sira na’in rua ema diak los iha Maromak futar oin. Sira halo tuir ho laran mos Na’i nia ukunfuan hotu. ⁷ Maibe sira oan la iha, basa Isabel la ko’us, no sira nia otas boot ona.

                ⁸ Wainhira Zacarias ho nia maluk am’lulik sira serbi iha Na’i futar oin, ⁹ tuir sira nia lisan, sira dada sorte, hodi fihir nia atu sunu kiarben morin iha Na’i nia santuariu. ¹⁰ Povu tomak hamulak iha liur iha oras nebe hasa’e kiarben morin. ¹¹ Na’i nia anju mosu ba Zacarias iha altar nia sorin kuana. ¹² Hare tiha ne’e, Zacarias hakfodak hodi tauk teb-tebes. ¹³ Maibe anju dehan ba nia: “Keta tauk, Zacarias, basa Maromak rona tiha o nia hamulak. O nia kaben Isabel sei ko’us oan mane ida. O sei hanaran nia Joao. ¹⁴ O sei haksolok teb-tebes; ema barak sei hetan ksolok wainhira nia moris. ¹⁵ Nia sei sai boot iha Maromak futar oin. Nia sei la hemu tua ka buat nebe halo ema lanu. Iha nia inan nia knotak kedas, nia sei sai nakonu ho Espiritu Santu. ¹⁶ Nia sei halo Israel nia oan barak fila fali ba Na’i, sira nia Maromak. ¹⁷ Nia sei la’o uluk Na’i ho Elias nia espiritu no kbiit, atu halo aman sira nia fuan fila ba sira nia oan sira, no mos halo ema fuan tos sira hatene lo-los nudar ema matenek sira, atu hadia ba Na’i povu ida nebe diak los.” ¹⁸ Zacarias hatan ba anju: “Oin sa ha’u bele hatene buat hirak ne’e? Ha’u katuas ona, no ha’u nia kaben mos ferik ona.” ¹⁹ Anju simu fali: “Ha’u mak Gabriel nebe hamriik iha Maromak futar oin. Nia haruka ha’u mai atu koalia ba o, hodi hato’o ba o lia foun diak ida ne’e. ²⁰ Maibe o sei sai monok hodi la koalia tan to’o loron nebe buat hirak ne’e sei mosu, basa o la fiar ha’u nia liafuan nebe sei sai tuir los iha nia tempu.”

                ²¹ Ema lubun boot hein Zacarias iha liur hodi hakfodak, basa nia hela kleur iha santuariu laran. ²² Wainhira nia sai, nia la bele koalia ba sira; tan ne’e sira hatene katak nia hetan visaun ida iha santuariu. Nia halo sinal oi-oin ba sira, hodi hela monok nafatin. ²³ Wainhira nia loron atu serbi hotu ona, nia fila ba uma. ²⁴ Liu tiha loron hirak ne’e, nia feen Isabel ko’us, hodi haksumik an iha fulan lima nia laran. Nia dehan: ²⁵ “Nune’e mak Na’i halo mai ha’u, hodi fase ha’u nia moe iha ema hotu nia oin.”

Anju Gabriel fo hatene Jesus atu moris

                ²⁶ Liu tiha fulan neen, Maromak haruka anju Gabriel ba knua ida Galileia nian, naran Nazare, ²⁷ ba fetoran ida nebe hakotu tiha ona ba mane ida naran Jose, housi David nia uma-kain; fetoran ne’e naran Maria. ²⁸ Tama tiha iha nia uma, anju dehan: “Rahun diak, feto kmanek wa’in tebes! Na’i ho ita!” ²⁹ Rona tiha lia ne’e, nia laran taridu hodi husu ba nia an rasik kumprimentu ne’e katak sa los. ³⁰ Anju dehan ba nia: “Keta tauk, Maria; basa o hetan rahun diak tebes iha Maromak futar oin. ³¹ O sei ko’us no tur ahi oan mane ida. O sei hanaran Nia Jesus. ³² Nia sei sai ema boot; sei hanaran An Na’i aas liu hotu nia Oan. Na’i Maromak sei haraik ba Nia nia aman David nia kadunan. ³³ Nia sei ukun Jacob nia uma-kain ba nafatin; nia ukun sei rohan laek.” ³⁴ Maria husu ba anju: “Ne’e sei sai oin sa los, basa ha’u la hola mane?” ³⁵ Anju hatan ba nia: “Espiritu Santu sei tun ba o no Na’i aas liu hotu nia kbiit sei hamahan o. Tan ne’e santu nebe atu moris sei hanaran An ‘Maromak nia Oan.’ ³⁶ O nia feto maluk Isabel mos ko’us tiha oan mane ida, maski ferik ona. ³⁷ Ida nebe ema dehan la ko’us, nia ko’us fulan neen ona; basa, ba Maromak, la iha buat ida nebe la bele.” ³⁸ Maria dehan: “Ne’e sa, Na’i nia atan oan mak ne’e. Halo tuir ita liafuan ba!” Hafoin anju husik nia.

Maria ba hare Isabel

                ³⁹ Iha loron hirak neba Maria hiit an lalais ba foho, ba knua ida iha Juda. ⁴⁰ To’o tiha Zacarias nia uma, nia kumprimenta Isabel. ⁴¹ Wainhira Isabel rona Maria nia lia, kosok oan book an iha nia knotak ho ksolok. Nakonu ho Espiritu Santu, ⁴² Isabel hahu koalia, dehan: “Ita boot diak liu feto hot-hotu! Ita boot nia oan diak liu! ⁴³ Be ha’u se los atu ha’u Na’i nia inan hiit an mai ha’u nia uma? ⁴⁴ Basa, ita lia to’o tiha iha ha’u tilun, kosok oan book an kedas iha ha’u knotak. ⁴⁵ Rahun diak ba ida nebe fiar katak lia nebe Na’i hateten sei sai tuir los duni.” ⁴⁶ Maria hatan:

Maria nia knananuk

“Ha’u klamar hahi Na’i,

⁴⁷ ha’u neon haksolok

    iha Maromak ha’u Maksoin.

⁴⁸ Basa Nia hare nia atan feto nebe folin laek.

    Tebes duni, houri ohin ba oin

    Ema hotu sei dehan ha’u rahun diak.

⁴⁹ Basa Ida nebe bele buat hotu

    halo buat kmanek wa’in tebes mai ha’u.

    Nia naran santu.

⁵⁰ Nia laran luak houri otas

    ba sira nebe hamtauk Nia.

⁵¹ Nia hatudu nia liman nia kbiit,

    hodi halakon ema loko an sira.

⁵² Nia hamonu ukun na’in sira

    housi sira nia tur fatin,

    hodi foti fali ema kiik sira.

⁵³ Nia haraik buat diak hotu ba mukit sira,

    hodi haruka riku sira

    ba ho liman mamuk.

⁵⁴ Nia tau matan ba nia atan Israel

    hodi hanoin fali nia laran luak,

⁵⁵ tuir lia menon nebe Nia hakotu ona

    ba ita nia bei-ala sira,

    ba Abraao no nia bei-oan sira ba nafatin.”

⁵⁶ Maria hela ho Isabel besik fulan tolu, hafoin fila fali ba nia uma.

Joao nia moris

                ⁵⁷ Wainhira tempu to’o ona ba Isabel, nia tur ahi oan mane ida. ⁵⁸ Rona tiha katak Na’i hatudu laran luak boot ba nia, nia maluk no parenti sira haksolok ho nia. ⁵⁹ Liu tiha loron ualu, sira mai atu halo sirkunsisaun kosok oan nian. Sira hakarak hanaran nia Zacarias, hanesan nia aman; ⁶⁰ maibe nia inan dehan: “Lae, nia naran mak  Joao.” ⁶¹ Sira dehan fali ba nia: “Iha imi nia parenti sira leet la iha ema ida ho naran ne’e.” ⁶² Tan ne’e, ho sinal oi-oin, sira husu ba nia aman oin sa nia hakarak hanaran nia oan. ⁶³ Nia husu surat tahan ida hodi hakerek: “Nia naran Joao.” Sira hotu hakfodak. ⁶⁴ Zacarias nia ibun nakloke kedas, nia nanal mamar fali, nia koalia hodi hawelok ba Maromak. ⁶⁵ Sira hotu nebe hela besik neba tauk teb-tebes. Lia hirak ne’e hotu naklekar iha foho rai Judeia tomak. ⁶⁶ Sira hotu nebe rona buat hirak ne’e rai hela iha sira nia laran hodi dehan ba sira an rasik: “Labarik ne’e sei sai sa los?” Basa, tebes duni, Na’i nia liman hela ho nia.

Zacarias nia knananuk

⁶⁷ Tuir mai, nia aman Zacarias, nakonu ho Espiritu Santu si’ik, dehan:

⁶⁸  “Rahun diak ba Na’i, Israel nia Maromak,

    basa Nia mai hare hodi soi nia povu.

⁶⁹ Nia foti Maksoin maka’as ida mai ita

    iha nia atan David nia uma,

⁷⁰ nudar Nia hakotu tiha ona

    housi nia profeta santu uluk sira ibun.

⁷¹ atu soi ita housi ita nia funubalun sira

    no housi sira hotu nebe hirus ita sira liman,

⁷² atu hatudu nia laran luak ba ita nia bei-ala sira

   hodi hanoin nia moruk santu:

⁷² katak, juramentu nebe Nia halo tiha ba ita nia aman Abraao,

⁷⁴ hodi haraik mai ita atu,

    sai tiha housi ita nia funubalun sira liman,

    ita serbi Nia ho aten berani,

⁷⁵ ho moris los no santu,

    iha nia futar oin iha ita nia moris tomak.

⁷⁶ O, kosok oan, ema sei hanaran o

    Na’i Aas liu hotu nia profeta,

    Basa o sei ba uluk Na’i

    Atu hadia dalan ba Na’i,

⁷⁷ hodi fo hatene ba nia povu nia maksoin,

    atu sira hetan perdua ba sira nia sala.

⁷⁸ Tamba ita nia Maromak laran luak teb-tebes,

     mak naroman housi leten aas sei mai visita ita,

⁷⁹ atu leno sira nebe tur iha nakukun laran

    no iha mate nia ukun,

    hodi lori ita nia ain tuir dalan dame nian.”

                 ⁸⁰ Labarik sai boot, nia laran metin liu tan. Nia horik iha rai fuik maran to’o loron nebe nia hatudu an ba Israel.