5

Jesus fihir nia eskolante sira

¹ Loron ida ema lubun boot ida hale’u Jesus atu rona Maromak nia liafuan. Nia hamriik iha tasi Genesare nia ibun. ² Nia hare ro rua kesi hela iha tasi ibun. Husik tiha ro, tiha na’in sira fase hela dai. ³ Sa’e tiha ba Simao nia ro, Jesus husu ba nia atu hadook ro uitoan housi tasi ibun. Hafoin, Nia tur tiha iha ro laran, hodi hanorin ema sira. ⁴ Koalia hotu tiha, Nia dehan ba Simao: “Tama liu ba tasi laran no tiha ba!” ⁵ Simao hatan, “Mestre, ami serbisu tiha kalan tomak, la kaer buat ida. Maibe, tan Ita mak dehan, ha’u sei soe duni dai.” ⁶ Wainhira sira halo nune’e, sira kaer ikan barak teb-tebes, dai besik atu nakles. ⁷ Sira leok liman hodi bolu maluk sira iha ro seluk atu mai tulun sira. Sira mai duni, hodi halo ro rua nakonu di-diak besik atu mout. ⁸ Hare tiha ne’e, Simao Pedro monu ain ba Jesus, hodi dehan: “Na’i, hadook n housi ha’u, tan ha’u ema maksalak ida!” ⁹ Tebes duni, nia ho nia maluk sira seluk hakfodak tamba ikan barak nebe sira kaer. ¹⁰ Simao nia maluk sira, katak Joao no Tiago, Zebedeu nia oan sira, sira mos hakfodak. Jesus dehan Simao: “Keta tauk; houri ohin ba oin o sei tiha ema.” ¹¹ Dada tiha ro ba tasi ibun, sira husik buat hotu hodi la’o tuir Jesus.

Ema moras lepra hetan isin diak

                ¹² Wainhira Jesus hela iha sidade ida, ema moras lepra ida ba hasouru Nia. Tuku tur tiha ba rai, nia husu ho laran: “Na’i, Ita hakarak karik, Ita bele hamos ha’u.” ¹³ Jesus lolo nia liman hodi kona nia, dehan: “Ha’u hakarak, sai mos ba!” Moras lepra lakon kedas. ¹⁴ Jesus bandu nia atu la bele fo hatene buat ne’e ba ema ida, dehan: “La’o ba, hatudu o nia an ba am’lulik, hodi hasa’e buat nebe Moises haruka nudar sasin ba sira tan o hetan isin diak.” ¹⁵ Maibe Jesus nia naran boot naklekar liu tan. Ema barak mai atu rona Nia, no mos atu hetan isin diak. ¹⁶ Maibe Nia hadook an ba fatin fuik ida, hodi hela mesa-mesak atu harohan.

Ema isin tos ida hetan isin diak

                ¹⁷ Loron ida, wainhira Jesus tur hodi hanorin, fariseu no doutor ukunfuan nian balun tur hamutuk. Sira mai housi knua hotu Galileia nian, housi Judeia no mos housi Jerusalem. Maromak nia kbiit atu fo isin diak hela ho Nia. ¹⁸ Iha oras neba, ema balun mai lori ema isin tos ida iha nia tobafatin. Sira hakarak hatama nia to’o Jesus nia oin; ¹⁹ maibe, tamba ema barak taka dalan, sira sa’e ba uma nia kakuluk hodi loke kuak ida no hatun nia iha nia tobafatin ba Jesus nia oin iha ema sira leet. ²⁰ Hare tiha sira nia fiar, Jesus dehan: “Belun, o nia sala sira kasu tiha ona.” ²¹ Eskriba no fariseu sira hahu hanoin: “Ema ne’e se los atu koalia aat Maromak? Se mak bele perdua sala sira? Maromak deit mak bele!” ²² Maibe Jesus hatene sira nia hanoin. Tan ne’e Nia hatan ba sira, dehan: “Imi hanoin sa ida iha imi nia laran? ²³ Ida nebe mak lalais liu, hateten ‘O nia sala kasu tiha ona’, eh hateten ‘Hamriik, la’o ba’? ²⁴ Ne’e duni, atu imi bele hatene katak Oan Mane iha kbiit iha rai atu kasu sala,” Nia dehan ba ema isin tos:  “Ha’u haruka o: hamriik ba, foti o nia biti hodi ba o nia uma!” ²⁵ Ema ne’e hamriik kedas iha sira nia oin, foti tobafatin iha nebe nia uluk toba hela no la’o ba uma hodi hahi Maromak. ²⁶ Sira hotu hakfodak no hahi Maromak. Sira tauk teb-tebes, dehan: “Ohin ita hare buat kmanek boot teb-tebes!”

Jesus bolu Levi

                ²⁷ Tuir mai wainhira Jesus sai housi fatin ne’e, Nia hare ema ida naran Levi, tur dau-daun iha kobra osan fatin. Jesus dehan ba nia: “Mai, tuir Ha’u!” ²⁸ Husik tiha buat hotu, nia hamriik hodi tuir Jesus.

Jesus ho ema maksalak sira

                ²⁹ Levi halo festa boot ba Jesus iha nia uma. Publikanu barak no ema selu-seluk tan tur hamutuk ho sira iha meja. ³⁰ Fariseu no eskriba sira hamuu eskolante sira, dehan: “Tansa imi han hemu hamutuk ho publikanu no ema maksalak sira?” ³¹ Jesus hatan ba sira, dehan: “La’os ema isin diak sira mak kuran doutor, maibe ema moras sira. ³² Ha’u la mai atu bolu ema diak sira, maibe ema maksalak sira atu hakribi sala.”

Kona ba hadera an

                ³³ Sira dehan ba Nia: “Joao nia eskolante sira hadera an hodi hamulak. Fariseu sira nia eskolante sira halo mos nune’e. Maibe, O nian sira fali han hemu.” ³⁴ Jesus hatan ba sira: “Imi bele haruka noivu nia belun sira atu hadera an wainhira noivu sei hela ho sira? ³⁵ Loron sei to’o mai, wainhira ema sei hasai noivu housi sira; foin mak sira sei hadera an.”

                ³⁶ Nia haktuir tan aiknanoik ida ne’e ba sira: “Ema ida la les hena foun ida atu taka hena tuan nia kuak; halo nune’e karik, hena foun nakles tiha, nia la los ho hena tuan. ³⁷ Ema ida la rai hela tua foun iha tua fatin kulit tuan; nia halo nune’e karik, tua foun sei halo fera tua fatin kulit tuan hodi tua nakfakar deit, tan tua fatin kulit aat ona. ³⁸ Maibe tua foun sei tau iha tua fatin kulit foun, no sira rua sei la lakon. ³⁹ La iha ema ida nebe, hemu tiha tua tuan, hakarak hemu tan tua foun, basa nia dehan: ‘Tua tuan mak diak.’”