9

Jesus haruka apostolu sira

                ¹ Jesus haruka sira na’in sanulu resin rua, hodi fo kbiit ba sira atu duni sai diabu sira no halakon moras sira. ² Nia haruka sira atu haklaken Maromak nia reinu, no mos atu fo isin diak ba ema moras sira. ³ Nia dehan ba sira: “Keta lori buat ida iha dalan: ai-tonka ka kohe, paun ka osan ka hatais tahan rua. ⁴ Iha uma naran deit nebe imi tama, hela iha neba to’o tempu nebe imi atu sai. ⁵ Kona ba sira nebe la simu imi, wainhira imi husik fatin neba, liki rai rahun housi imi nia ain nudar sinal hasouru sira.” ⁶ Nune’e sira sai hodi la’o ba knua sira, haklaken evangeliu no fo isin diak ba ema moras sira iha fatin hot-hotu.

Herodes ho Joao

                ⁷ Rona tiha kona ba buat ne’e hotu, liurai Herodes hakfodak, basa ema balun dehan katak Joao moris hi’as ona housi mate; ⁸ ema seluk dehan katak Elias mosu fali, ema seluk tan dehan katak profeta uluk sira ida moris hi’as fali. ⁹ Maibe Herodes dehan: “Ha’u tesi tiha ona Joao nia ulun. Ne’e duni, ema ne’e se los, nebe kona ba nia ha’u rona buat hirak ne’e?” No nia buka namanas atu hare Nia.

Jesus fo han ba ema lubun boot

                ¹⁰ Wainhira apostolu sira fila fali, sira haktuir buat hotu nebe sira halo. Jesus lori sira hamutuk ho Nia ba rai ida naran Betsaida, atu hela mesa-mesak. ¹¹ Maibe wainhira ema barak hatene buat ne’e, sira ba tuir Nia. Jesus simu sira hodi koalia ba sira kona ba Maromak nia reinu. Hafoin Nia fo isin diak ba sira nebe moras. ¹² Loron monu dau-daun ona. Sira sanulu resin rua hakbesik hodi dehan ba Nia: “Ita haruka ema lubun ne’e ba knua no ba uma sira nebe besik atu buka aihan no fatin atu toba, basa rai ne’e mesa fuik.” ¹³ Maibe Nia dehan ba sira: “Imi rasik mak fo han ba sira.” Sira hatan: “Ami iha deit paun fuan lima no ikan oan rua; ami ba sosa karik aihan ba povu ne’e tomak mak bele sai los.” ¹⁴ Mane sira deit besik rihun lima ona. Jesus hateten ba nia eskolante sira: “Imi haruka sira tur hamutuk tiha, lima nulu lima nulu hamutuk.” ¹⁵ Sira halo nune’e, hodi haruka sira hotu tur tiha. ¹⁶ Jesus kaer paun fuan lima no ikan rua ne’e, foti matan ba lalehan, haraik bensa, silu hodi fo ba eskolante sira atu fahe ba ema lubun ne’e. ¹⁷ Sira hotu han to’o bosu. Tuir mai, sira halibur hamutuk baluk oan sira nebe resin, hodi hakonu luhu sanulu resin rua.

Pedro nia fiar

¹⁸ Loron ida, wainhira Nia harohan mesa-mesak ho nia eskolante sira deit, Jesus husu ba sira: ¹⁹  “Ema dehan Ha’u se los?” Eskolante sira hatan: “Joao Baptista; balun dehan, Elias; balun fali dehan, profeta ida uluk nian mak moris hi’as.” ²⁰ Jesus husu ba sira: “Imi rasik dehan Ha’u se los?” Simao Pedro simu hodi dehan: “Ita Maromak nia Messias.” ²¹ Nia bandu sira atu la bele fo sai buat ne’e ba ema ida, ²² dehan: “Oan Mane sei terus barak: katuas sira no eskriba sira sei hakribi Nia, hodi oho Nia; liu tiha loron tolu, Nia sei moris hi’as.”

Liafuan ida ba sira nebe hakarak tuir Jesus

                ²³ Jesus dehan ba sira hotu: “Ema ruma hakarak tuir Ha’u karik, nia sei husik nia an rasik, simu nia krus loron loron nian hodi tuir Ha’u. ²⁴ Basa ema nebe hakarak soi nia moris, sei lakon moris ne’e; maibe ema nebe lakon nia moris tamba Ha’u, sei soi nia moris. ²⁵ Ema manan sa ida wainhira nia manan mundu tomak, maibe lakon nia klamar? ²⁶ Ema ruma moe karik kona ba ha’u no ha’u nia hanorin, Oan Mane mos sei moe kona ba nia wainhira Nia sei mai iha nia gloria no iha gloria Aman no anju santu sira nian. ²⁷ Tebes, Ha’u dehan ba imi: imi nebe hamriik iha ne’e, balun sei la mate molok sira hare Maromak nia reinu.”

Jesus nakfila an

                ²⁸ Loron ualu liu tiha Nia koalia liafuan hirak ne’e, Jesus lori Pedro, Joao no Tiago hamutuk no Nia, hodi sa’e ba foho ida atu harohan. ²⁹ Nia sei harohan hela, nia oin nakfila an; nia unuk nabilan teb-tebes. ³⁰ Teki-teki mane na’i rua mosu mai, koalia ho Nia: sira mak Moises no Elias, ³¹ nebe mosu ho kmanek wa’in; sira koalia kona ba mate nebe Nia sei hetan iha Jerusalem. ³² Pedro ho nia maluk sira matan dukur liu; maibe, hader tiha, sira hare nia gloria no mos mane na’in rua nebe hela ho Nia. ³³ Wainhira na’in rua ne’e sai dau-daun, Pedro dehan ba Jesus: “Mestre, diak tebes katak ita iha ne’e; husik ami halo taka balun tolu: ida ba Ita, ida ba Moises no ida ba Elias.” Nia la hatene buat nebe nia hateten. ³⁴ Nia sei koalia hela, kalohan ida mosu mai hodi falun sira. Wainhira sira tama iha kalohan laran, sira tauk. ³⁵ Housi kalohan, lia ida dehan: “Ida ne’e mak ha’u nia Oan doben; imi rona Nia ba!” ³⁶ Lia ne’e koalia tiha, Jesus hela mesak. Eskolante sira nonok no iha loron hirak neba sira la dehan ba ema ida buat nebe sira hare.

Labarik nebe moras bibi-mate

                ³⁷ Liu tiha loron ida, wainhira sira tun tiha housi foho, ema lubun boot ba hasouru sira. ³⁸ Teki-teki, housi sira leet ema ida hakilar: “Mestre, ha’u husu ba Ita atu hare ha’u nia oan mane: nia mak ha’u nia oan mesak. ³⁹ Espiritu aat ida tama iha nia, hakilar fila fila hodi doko nia maka’as, halo nia ibun nakfurin; no la husik nia, hodi halo nia kbiit laek. ⁴⁰ Ha’u husu ona Ita nia eskolante sira atu duni sai nia, maibe sira la bele.” ⁴¹ Jesus simu, dehan: “Ema laran aat no fiar laek! To’o wainhira Ha’u sei hela hamutuk ho imi, hodi tahan imi? Lori o nia oan mai!” ⁴² Wainhira labarik hakbesik, diabu soe nia ba rai hodi doko nia. Maibe Jesus si’ak espiritu aat ne’e, fo isin diak ba labarik, hodi fo fali nia ba nia aman.

Jesus koalia ba dala rua kona ba nia mate

                ⁴³ Ema hotu hakfodak ho Maromak nia kmanek. Maibe wainhira povu sira hakfodak ho buat nebe Jesus halo tiha, Nia dehan ba nia eskolante sira: ⁴⁴ “Rona di-diak liafuan hirak ne’e: sira sei saran Oan Mane ba ema sira liman.” ⁴⁵ Maibe sira la komprende lia ne’e katak sa, hanesan buat ida taka metin sira neon; no sira tauk atu husu kona ba buat ne’e.

Se mak boot liu

                ⁴⁶ Tuir mai sira hahu haksesuk malu kona ba se mak boot liu. ⁴⁷ Hatene tiha sira nia hanoin, Jesus kaer labarik ida, tau nia iha Nia sorin, ⁴⁸ hodi dehan ba sira: “Ema nebe simu labarik ne’e iha Ha’u nia naran, simu Ha’u; no ema nebe simu Ha’u, nia simu Ida nebe haruka Ha’u mai. Basa ida nebe kiik liu iha imi nia leet, nia mak boot liu.”

⁴⁹ Joao hahu koalia, dehan: “Mestre, ami hare ema ida nebe duni sai diabu iha Ita nia naran maibe ami bandu nia, basa nia la tuir Ita.” ⁵⁰ Maibe, Jesus hateten ba nia: “Imi keta bandu nia, basa ema nebe la hasouru imi, nia hamutuk ho imi.”

Samaritanu sira la simu Jesus

                ⁵¹ Wainhira tempu atu husik rai ne’e besik dau-daun ona, Jesus, hodi hakarak, hahu la’o ba Jerusalem. ⁵² Nia haruka manu-ain sira atu ba uluk. Sira ne’e la’o ba, hodi tama iha ema Samaria sira nia knua ida, atu hadia fatin ba Nia. ⁵³ Maibe sira la simu Nia basa Nia sa’e ba Jerusalem. ⁵⁴ Hare tiha ne’e, eskolante sira, Tiago no Joao, dehan ba Nia: “Na’i, Ita hakarak ami hamulak atu ahi tun housi lalehan, hodi han sira?” ⁵⁵ Maibe Nia fila oin hodi si’ak sira. ⁵⁶ Tuir mai, sira la’o fali ba knua seluk.

Susar atu tuir Jesus

                ⁵⁷ Tuir dalan ema ida dehan ba Nia: “Ha’u sei la’o tuir Ita ba fatin hotu!” ⁵⁸ Jesus hatan ba nia, “Asu fuik iha luhan, manu sira iha lalehan iha knuuk; maibe Oan Mane la iha fatin atu hatoba nia ulun.” ⁵⁹ Ba ida seluk Nia dehan: “O Tuir Ha’u mai!”  Maibe ema ne’e simu: “Na’i, husik ha’u ba hakoi lai ha’u nia aman.” ⁶⁰ Jesus hatan ba nia: “Husik matebian sira hakoi matebian sira; maibe o fali, ba hodi haklaken Maromak nia reinu.” ⁶¹ Ema seluk dehan, “Ha’u sei tuir Ita, Na’i; maibe husik ha’u despede lai ho sira nebe iha ha’u nia uma laran.” ⁶² Jesus hatan ba nia, “Ema nebe tau ona liman ba sarua, hafoin fila oin ba kotuk, nia la soi ba Maromak nia reinu.”