14

Milagre ida tan iha loron Sabadu

                ¹ Iha loron Sabadu ida, Jesus tama iha fariseu boot ida nia uma atu han. Sira hotu hateke ba Nia. ² Ema moras ida mai hamriik iha nia oin. ³ Jesus hateten ba ukun na’in no fariseu sira: “Iha loron Sabadu bele fo isin diak ba ema moras, ka lae?” ⁴ Sira nonok deit. Tuir mai, kaer tiha ema moras nia liman, Jesus fo isin diak ba nia hodi haruka nia ba. ⁵ Hafoin nia dehan ba sira: “Iha imi nia leet, se mak la dada sai nia kuda burro ka nia karau nebe monu iha be matan, maski iha loron Sabadu?” ⁶ Sira la bele hatan buat ida kona ba ne’e.

Fatin uluk liu no ikus liu

                ⁷ Hare tiha oin sa bainaka balun fihir tur fatin diak, Jesus haktuir ba sira aiknanoik ida ne’e: ⁸ “Ema ruma konvida karik o ba festa kaben ida, keta tur iha meja ulun; keta uma na’in konvida ema boot liu o karik; ⁹ hafoin, ema nebe konvida imi na’in rua sei dehan ba o: ‘Fo lai fatin ba ema ne’e.’ Nune’e o sei moe boot, hodi ba tur iha fatin ikus liu. ¹⁰ Maibe wainhira ema konvida o, ba tur iha fatin ikus liu; nune’e, wainhira ema nebe konvida o to’o mai, nia sei dehan ba o: ‘Belun, mai tur liu leten.’ Nune’e ema hotu nebe tur hamutuk iha meja sei hahi o. ¹¹ Basa ema nebe foti an, Na’i sei hatun nia; no ema nebe haraik an, Na’i sei foti nia.”

Fihir kiak sira

                ¹² Tuir mai Jesus dehan ba ema nebe konvida Nia: “Wainhira o halo festa, keta konvida o nia belun sira, o nia maun alin sira, o nia parenti sira ka o nia maluk riku sira; keta sira ne’e konvida fali o, nune’e sira selu fali o. ¹³ Maibe, wainhira o halo festa, konvida ema kiak sira, ema kbiit laek sira, ema ain aat sira no ema matan delek sira. ¹⁴ O sei hetan ksolok, basa sira ne’e la iha buat ida atu selu fali o; o sei simu o nia kolen wainhira ema diak sira sei moris hi’as.”

Aiknanoik festa boot nian

                ¹⁵ Rona tiha buat ne’e, bainaka ida dehan ba Nia: “Rahun diak ba ema nebe sei han ho Maromak iha nia reinu!” ¹⁶ Jesus hatan ba nia: “Ema ida halo festa boot hodi konvida ema barak. ¹⁷ Iha oras atu han nia haruka nia atan atu hateten ba sira: ‘Mai ona, buat hotu hadia tiha ona.’ ¹⁸ Maibe sira hotu hahu dehan buat oi-oin. Ida uluk dehan ba nia: ‘Ha’u foin sosa rai no ha’u sei ba hare nia; ha’u husu diskulpa.’ ¹⁹ Ida seluk dehan: ‘Ha’u foin sosa karau par lima no ha’u sei koko sira; ha’u husu diskulpa.’ ²⁰ Ida seluk tan dehan: ‘Ha’u foin kaben, tan ne’e ha’u la bele ba.’ ²¹ Atan ne’e fila fali hodi haktuir buat hirak ne’e ba nia na’in. Tuir mai, uma na’in hirus, hodi dehan ba nia atan: ‘Sai lalais ba dalan no luron sira sidade nian, hodi lori mai iha ne’e ema kiak sira, ema kbiit laek, ema matan delek no ema ain aat sira.’ ²² La kleur atan ne’e fila fali, hodi dehan ba nia: ‘Na’i, buat nebe Ita haruka, halo tiha ona, maibe fatin sei iha.’ ²³ Uma na’in dehan fali ba nia atan: ‘Ba liu housi dalan no to’os sira hodi obriga ema atu tama, atu ha’u nia uma sai nakonu. ²⁴ Basa ha’u dehan ba imi katak, housi sira nebe ha’u konvida uluk, ida mos sei la koko ha’u nia festa.’”

Husik buat hotu atu tuir Jesus

                ²⁵ Ema lubun boot la’o hamutuk ho Jesus. Nia fila oin hodi dehan ba sira: ²⁶  “Ema ruma mai tuir Ha’u karik, maibe la hewai nia aman, inan, feen, oan sira, to’o nia moris rasik, ema ne’e la bele sai ha’u nia eskolante. ²⁷ Ema nebe la lori nia krus hodi tuir Ha’u, nia la bele sai ha’u nia eskolante. ²⁸ Imi ida nebe mak, atu halo uma aas ida, la tur uluk lai atu sura buat nebe kuran, hodi hare nia iha osan ka lae atu halo to’o hotu? ²⁹ Keta halo be, foin hahu harii, nia la iha kbiit atu halo to’o rohan. Hafoin sira nebe hare, hahu hamoe nia, dehan: ³⁰  ‘Ema ne’e hahu harii, maibe la bele halo to’o rohan!’”

^{31 “} Eh liurai ida nebe mak ba funu hasouru liurai seluk, la tur uluk lai hodi hanoin di-diak nia bele ka lae ho deit soldadu rihun sanulu ba hasouru ida nebe mai hasouru nia ho soldadu rihun rua nulu? ³² La bele karik, wainhira ida seluk sei dook hela, nia haruka kedas manu-ain atu ba husu dame. ³³ Nune’e mos imi hotu nebe la husik imi nia rikusoi tomak, la bele sai ha’u nia eskolante.”

³⁴  “Masin diak duni; maibe masin ne’e lakon nia mer karik, oin sa bele halo nia mer fali? ³⁵ Ba rai no ba foer fatin mos la diak ona, maibe ema soe deit ba liur. Ema nebe tilun iha atu rona, rona ba!”