15

Bibi nebe lakon

                ¹ Publikano no maksalak sira hakbesik Jesus atu rona Nia. ² Fariseu no eskriba sira hamuu, dehan: “Ema ne’e simu maksalak sira hodi han hamutuk ho sira.” ³ Tan ne’e, Nia haktuir ba sira aiknanoik ida ne’e: ⁴ “Imi ida nebe mak, iha karik bibi atus ida no lakon tiha ida, la husik sia nulu resin sia seluk iha rai fuik maran, hodi ba buka to’o hetan ida nebe lakon? ⁵ Hetan tiha, nia tau bibi ne’e ho ksolok iha nia kbaas. ⁶ To’o tiha uma, nia bolu belun no maluk sira, hodi dehan ba sira: ‘Haksolok ho ha’u ba, basa ha’u hetan fali ona ha’u nia bibi nebe lakon.’ ⁷ Ha’u dehan ba imi katak iha lalehan mos sei iha ksolok tamba ema maksalak ida nebe hakribi nia sala, liu fali tamba ema diak sia nulu resin sia nebe la kuran atu hakribi sala.” 

Osan mean nebe lakon

                ⁸ “Eh feto ida nebe mak, iha karik osan mean sanulu, lakon tiha ida, nia la sunu ahi-oan, dasa uma laran hodi buka di-diak to’o hetan osan nebe lakon? ⁹ Hetan tiha, nia bolu nia belun no maluk sira, dehan: ‘Haksolok ho ha’u ba, basa ha’u hetan ona osan mean nebe lakon. ¹⁰ Ha’u dehan ba imi katak Maromak nia anju sira mos sei haksolok tamba ema maksalak ida nebe hakribi sala.”

Oan nebe soe hela uma

                ¹¹ Nia dehan tan: “Ema ida iha oan mane na’in rua. ¹² Ida kiik dehan ba nia aman: ‘Aman, fo mai ha’u buat ne’e ha’u nian.’ Aman ne’e fahe tiha nia rikusoi ba sira. ¹³ Liu tiha loron ruma, oan kiik ne’e halibur nia rikusoi tomak, hodi ba rai dook ida; iha neba nia halo naben nia rikusoi tomak, hodi moris aat liu. ¹⁴ Nahas tiha nia sasan tomak, rai neba hamlaha boot. Nia mos hahu hetan susar. ¹⁵ Tan ne’e nia ba serbisu ba ema rai na’in ida, nebe haruka nia ba hein fahi iha nia to’os. ¹⁶ Nia kaan atu han ai-fuan nebe fahi sira han, maibe ema ida la husik. ¹⁷ Nia hanoin, hodi dehan ba nia an: ‘Ha’u nia aman iha atan barak nebe aihan la kuran; ha’u fali iha ne’e mate hamlaha. ¹⁸ Ha’u sei hamriik hodi ba koalia ho ha’u nia aman, dehan: ‘Aman, ha’u sala hasouru lalehan no mos hasouru ita. ¹⁹ Ha’u la soi ona atu ita bolu ha’u ita oan. Hare deit ha’u nudar ita nia atan ida.’

                ¹⁹ Nune’e, hamriik tiha, nia ba hasouru nia aman. ²⁰ Nia sei dook hela, nia aman hare ona nia, hanoin teb-tebes nia, hodi halai ba hasouru nia, hakoak no rei nia. ²¹ Nia dehan: ‘Aman, ha’u sala duni hasouru lalehan no mos hasouru ita; ha’u la soi ona atu ita hare ha’u nudar oan.’ ²² Maibe aman ne’e dehan ba nia atan sira: ‘Lori mai lalais unuk furak liu, hodi fo hatais nia; tau kadeli ba nia liman, sapatu ba nia ain. ²³ Lori mai karau oan bokur ida atu oho. Ita sei han hemu hodi halo festa. ²⁴ Basa ha’u nia oan ida ne’e mate tiha, maibe moris fali; nia lakon tiha, maibe hetan fali.’ No sira hahu halo festa.”

                ²⁵ “Maibe oan boot sei hela iha to’os. Wainhira nia fila fali, hakbesik dau-daun uma, nia rona ema hananu no bidu. ²⁶ Nia bolu atan ida, hodi husu buat ne’e sa ida los. ²⁷ Atan ne’e hatan: ‘O nia alin to’o ona mai no o nia aman oho karau oan bokur, basa nia to’o ho isin diak.’ ²⁸ Maun boot, laran nakali teb-tebes, lakohi tama. Tan ne’e, nia aman sai hodi hahu hamaus nia. ²⁹ Maibe nia hatan, hodi dehan ba nia aman: ‘Tinan hira ona mak ha’u serbi ita, hodi halo tuir nafatin ita nia hakarak, maibe ita la dauk fo bibi oan ida mai ha’u atu halo festa ho ha’u nia belun sira. ³⁰ Maibe, wainhira ita nia oan ne’e to’o mai, nebe halakon tiha nia rikusoi tomak ho feto aat sira, ita oho karau oan bokur ida ba nia.’ ³¹ Nia aman hatan ba nia: ‘Ha’u oan, o horik nafatin ho ha’u, no buat hotu nebe ha’u nian, o nian mos. ³² Maibe ita sei halo festa duni hodi haksolok, basa o nia alin ne’e mate tiha, maibe moris fali; nia lakon tiha, maibe hetan fali.’”