17

Liafuan diak ruma

                ¹ Jesus dehan tan ba nia eskolante sira: “Esemplu aat sira sei iha duni; maibe ema nebe fo esemplu aat sei hetan kastigu. ² Kesi fatuk boot dulas batar nian ida ba nia kakorok hodi soe nia ba tasi, diak liu fali nia dada labarik kiik sira ne’e ida ba sala.”

                ³ “Imi rona di-diak: o nia maluk ida halo sala karik, fo hatene ba nia; nia hakribi sala karik, perdua nia. ⁴ Nia sala karik dala hitu hasouru o, no nia hateten dala hitu ‘Ha’u hakribi,’ perdua nia.”

⁵ Apostolu sira hateten ba Na’i: “Haboot ami nia fiar!” ⁶ Na’i hatan ba sira: “Imi nia fiar boot karik hanesan modo musan ida, imi bele dehan ba ai-hun ne’e: ‘Fokit o an housi ne’e, ba kuda o an iha tasi laran,’ nia sei halo tuir. ⁷ Iha imi leet se mak, iha atan ida nebe wainhira nia fila housi to’os sei dehan ba nia: ‘O mai lalais tur iha meja?’ ⁸ Nia sei la dehan fali: ‘O ba tein,’ ka ‘O ba hatais lalais atu serbi meja wainhira ha’u han dau-daun; hafoin mak o sei tur han?’ ⁹ Ema se los mak sei fo obrigadu ba nia atan tan atan ne’e halo tuir nia hakarak? ¹⁰ Nune’e mos imi, wainhira imi halo tiha imi nia knaar tomak, hateten: ‘Ami atan folin laek, ami halo deit ami nia obrigasaun.”

Ema moras lepra na’in  sanulu

                ¹¹ Jesus liu housi Galileia no Samaria atu ba Jerusalem. ¹² Wainhira nia tama dau-daun ba knua ida, ema moras lepra na’in sanulu mai hasouru Nia. ¹³ Housi dook sira hasa’e lia, dehan: “Jesus, mestre, sadia atan ami!” ¹⁴ Hare tiha sira, Nia dehan ba sira: “Imi ba, hatudu imi an ba am’lulik sira.” La’o tuir dalan, sira hetan isin diak. ¹⁵ Sira ida, hare katak nia isin diak fali ona, fila fali hodi hahi Maromak ho lia maka’as; ¹⁶ nia monu ba Jesus nia ain, hakru’uk to’o rai, hodi agradese. Ema ne’e Samaritanu ida. ¹⁷ Jesus dehan ba nia: “La’os ema na’in sanulu mak hetan isin diak? Sira na’in sia iha nebe? ¹⁸ Ema ida la fila atu hahi Maromak, mak ema malae ne’e deit?” ¹⁹ Hafoin Nia dehan ba ema ne’e:  “Hamriik, la’o ba! O nia fiar mak soi tiha o!”

Maromak nia reinu to’o ona

                ²⁰ Fariseu sira husu ba Nia wainhira mak Maromak nia reinu sei to’o. Nia hatan ba sira: “Maromak nia reinu la mai hodi hatudu an. ²¹ Ema ida la bele dehan: ‘Mak ne’e,’ eh ‘Mak neba;’ basa Maromak nia reinu iha ona imi nia laran.”

Oan Mane nia loron

                ²² Tuir mai Nia dehan ba nia eskolante sira: “Loron sei to’o wainhira imi sei hakarak hare Oan Mane nia loron ida, no imi sei la hare. ²³ Ema sei dehan ba imi: ‘Nia mak ne’e,’ eh ‘Nia mak neba.’ Imi keta ba, keta tuir. ²⁴ Basa nudar rai lakan nabilan housi lalehan nia hun to’o nia rohan, nune’e mos sei mosu iha Oan Mane nia loron. ²⁵ Maibe uluk knanain Nia sei terus boot, ema housi otas ne’e sei hakribi Nia. ²⁶ Nudar mosu tiha ona iha Noe nia loron, nune’e mos sei mosu iha Oan Mane nia loron: ²⁷ sira han hemu, mane sira hola feto, feto sira hola mane to’o loron nebe Noe tama iha ro laran no udan tau maka’as nebe hamout sira hotu. ²⁸ Sei mosu mos hanesan iha Lot nia loron: sira han hemu dau-daun, sira sosa no faan, sira kuda no harii uma. ²⁹ Maibe iha loron nebe Lot sai tiha housi Sodoma, ahi no ensofre tun housi lalehan hodi oho sira hotu. ³⁰ Nune’e mos sei mosu iha loron nebe Oan Mane sei hatudu an. ³¹ Iha loron neba, ema nebe iha uma nia kakuluk keta tun atu hola nia sasan sira; nune’e mos ida nebe iha to’os keta fila fali. ³² Imi hanoin fali Lot nia feen.”

³³ “Ema nebe hakarak soi nia moris, sei lakon moris ne’e; no ema nebe lakon nia moris, sei soi nia moris ne’e. ³⁴ Ha’u dehan ba imi katak iha kalan neba ema na’in rua sei toba iha fatin ida: sira sei lori ida, hodi husik ida seluk. ³⁵ Feto na’in rua sei tuku batar hamutuk: sira sei lori ida, hodi husik ida seluk.” ³⁶ Sira simu, dehan: “Na’i, buat ne’e sei mosu iha los nebe?” ³⁷ Nia hatan ba sira: “Iha fatin nebe isin mate hela, iha neba mos mak manu makikit sira sei halibur hamutuk.”