19

Zaqueu

                ¹ Tama tiha iha Jeriko, Jesus la’o tesi sidade laran. ² Ema riku ida horik iha neba. Nia publikanu sira nia ulun, naran Zaqueu. ³ Nia buka namanas atu hare Jesus, maibe la bele tamba ema barak, basa nia ain badak. ⁴ Nia halai hodi sa’e ba ai ida atu hare Jesus, nebe sei liu housi neba. ⁵ To’o tiha fatin neba, Jesus foti matan hodi dehan: “Zaqueu, tun mai lalais, basa ohin Ha’u sei hela iha o nia uma.” ⁶ Nia tun kedas hodi simu Jesus ho ksolok boot. ⁷ Hare tiha ne’e, sira hotu hamuu, dehan: “Nia tama iha maksalak ida nia uma!” ⁸ Maibe Zaqueu hamriik hodi dehan ba Na’i: “Na’i, ha’u sei fahe ha’u nia rikusoi balun ba kiak sira; ha’u na’ok tiha karik ema ruma nia sasan, ha’u sei selu fali liu dala haat.” ⁹ Jesus dehan ba nia: “Ohin maksoin tama iha uma ne’e, tan ema ne’e mos Abraao nia oan; basa Oan Mane mai buka hodi soi sira nebe la’o lakon dalan.”

Aiknanoik osan mean nian

                ¹¹ Wainhira sira rona tiha buat hirak ne’e, Jesus haktuir tan aiknanoik ida, tamba Jerusalem besik ona, no mos tamba sira hanoin katak Maromak nia reinu sei mosu lalais. ¹² Nia dehan: “Ema boot ida ba tiha rai dook atu simu reinu, hafoin nia sei fila fali. ¹³ Bolu tiha nia atan na’in sanulu, nia fahe ba sira osan mean sanulu, hodi dehan ba sira: ‘Fila liman to’o ha’u sei fila fali.’ ¹⁴ Maibe ema sira iha reinu neba lakohi nia. Sira haruka manu-ain sira hodi dehan: ‘Ami lakohi ema ne’e nudar ami nia liurai.’ ¹⁵ Simu tiha reinu, wainhira nia fila hikas, nia haruka ema bolu atan sira nebe nia fo osan, atu hatene sira manan hira. ¹⁶ Ida uluk mai, dehan: ‘Na’i, ita nia osan ida manan sanulu tan.’ ¹⁷ Nia hatan: ‘Diak tebes, atan diak, tamba o ema los kona ba sasan uitoan, o sei ukun sidade sanulu.’ ¹⁸ Atan seluk mai, dehan: ‘Ha’u nian manan lima tan.’ ¹⁹ Nia hatan: ‘O mos sei ukun sidade lima.’ ²⁰ Ida seluk mai, dehan: ‘Na’i, ita nia osan mak ne’e. Ha’u rai di-diak iha hena ida, ²¹ basa ha’u tauk ita nebe ema si’akten, nebe foti buat nebe la tau no ku’u buat nebe la kuda.’ ²² Ba ema ne’e nia simu fali: ‘Tamba o nia liafuan rasik, ha’u tesi lia todan hasouru o, atan aat. O hatene katak ha’u ema laran tos, nebe foti buat nebe la tau, ku’u buat nebe la kuda. ²³ Ne’e duni, tansa o la hatama ha’u nia osan iha banku atu, fila tiha, ha’u bele manan nia osan funan?’ ²⁴ Hafoin Nia dehan ba sira nebe hamriik iha neba: ‘Hasai tiha nia osan, hodi fo fali ba ida nebe iha sanulu.’ ²⁵ Sira dehan: ‘Na’i, nia iha ona osan sanulu.’ ²⁶ Maibe nia simu: ‘Ha’u dehan ba imi katak ba ida nebe iha ona, sei fo tan; maibe housi ida nebe la iha, sei hasai tan buat nebe nia iha. ²⁷ Kona ba ha’u nia funubalun sira nebe lakohi ha’u atu ukun sira, lori sira mai iha ne’e, oho tiha sira iha ha’u nia oin!’” ²⁸ Dehan tiha ne’e, Jesus la’o hodi sa’e ba Jerusalem.

Jesus tama iha Jerusalem

                Wainhira Nia to’o Betfage no Betania, besik foho ida naran Oliveira, Jesus haruka eskolante na’in rua, dehan: ³⁰ “Imi ba iha knua iha oin. To’o tiha neba, imi sei hetan kuda oan ida, nebe ema la dauk sa'e, kesi hela. Imi kore tiha nia, hodi lori mai. ³¹ Ema ruma husu karik tansa imi kore nia, imi sei hateten nune’e: ‘Na’i presisa nia.’” ³² Sira na’in rua ba, hodi hetan buat hotu nudar Jesus dehan. ³³ Wainhira sira kore dau-daun, kuda na’in dehan ba sira: “Tansa imi kore kuda oan?” ³⁴ Sira hatan: “Na’i presisa nia.” ³⁵ Sira lori nia ba Jesus. Hafoin, tau tiha sira nia hatais iha kuda leten, sira tulun Jesus atu sa’e. ³⁶ Wainhira Nia liu dau-daun, sira nahe sira nia hatais iha dalan. ³⁷ Besik ona atu to’o foho Oliveira, ema lubun boot nebe tuir Jesus hahu hawelok Maromak ho ksolok no lia maka’as tan buat diak nebe sira hare, dehan: ³⁸ “Rahun diak ba ida nebe mai nudar liurai hodi Na’i nia naran! Dame iha lalehan, gloria iha leten aas ba!”

                ³⁹ Housi ema lubun boot sira leet, fariseu balun dehan ba Jesus: “Mestre, haksi’ak o nia eskolante sira!” ⁴⁰ Maibe Jesus hatan: “Ha’u dehan ba imi katak, sira ne’e nonok karik, fatuk sira mak sei hakilar!”

Jesus tanis tamba Jerusalem          

⁴¹ Hakbesik tiha hodi hare sidade, Jesus tanis tamba nia, dehan: ⁴¹  “O hatene karik ohin loron ne’e Ida nebe lori dame ba o! Maibe buat ne’e subar hela ba o nia matan. ⁴³ Loron sei mai wainhira o nia funubalun sira sei hada rai hodi hale’u o housi fatin hotu; ⁴⁴ sira sei hanehan o ba rai, no mos o nia oan sira iha o nia laran; sira sei la husik fatuk ida hamriik iha fatuk seluk nia leten, basa o la hatene nanis loron nebe o simu Na’i nia visita ne’e.”

Jesus duni sai kontratu na’in sira housi templu

                ⁴⁵ Tuir mai, tama tiha iha templu, Nia hahu duni sai sira nebe halo kontratu, hodi dehan ba sira: ⁴⁶ “Hakerek tiha ona: ‘Ha’u nia uma uma orasaun nian; maibe imi halo tiha nia na’okten sira nia luhan nian!”

                ⁴⁷ Loron loron Nia hanorin iha templu. Am’lulik sira nia ulun sira, eskriba sira no mos na’i ulun sira povu nian buka atu halakon Nia. ⁴⁸ Maibe sira la hatene atu halo oin sa, basa povu tomak hakarak teb-tebes rona Nia.