20

Jesus nia kbiit

                ¹ Loron ida, wainhira Nia hanorin povu iha templu hodi haklaken evangeliu, am’lulik nia ulun sira, eskriba sira no katuas sira hakbesik hodi hateten ba Nia: ² “Dehan to’ok mai ami ho kbiit ida nebe mak o halo buat hirak ne’e, ka se mak fo kbiit ne’e ba o.” ³ Jesus hatan ba sira: “Ha’u mos sei husu buat ida ba imi. Dehan to’ok mai Ha’u: ⁴ Joao nia baptismu mai housi lalehan ka housi ema sira?” ⁵ Sira hanoin hodi dehan ba malu: “Ita hatan karik ‘Housi lalehan’, Nia sei husu: ‘Tansa imi la fiar nia?’ ⁶ Ita hatan karik ‘Housi ema sira’, povu tomak sei tuda ita ho fatuk, basa sira hare Joao nudar profeta.” ⁷ Tan ne’e, sira hatan katak sira la hatene housi nebe. ⁸ Jesus dehan ba sira: “Ha’u mos sei la dehan ba imi ho kbiit ida nebe mak Ha’u halo buat hirak ne’e.”

Aiknanoik kona ba serbisu na’in sira iha to’os uvas nian

                ⁹ Tuir mai, Nia hahu haktuir ba povu aiknanoik ida ne’e: “Ema ida kuda uvas iha to’os ida, nebe nia aluga ba serbisu na’in sira. Hafoin nia ba dook hodi hela kleur. ¹⁰ Wainhira tempu to’o ona, nia haruka atan ida ba serbisu na’in sira atu sira ne’e fo ba nia housi to’os nia fuan. Maibe sira baku nia, hodi duni sai nia ho liman mamuk. ¹¹ Liu tiha ne’e, nia haruka atan ida seluk, maibe ida ne’e mos sira baku, hanehan no duni sai ho liman mamuk. ¹² Ba dala tolu nia haruka ida tan, nebe sira hakanek hodi soe ba liur. ¹³ Ikus mai, to’os na’in dehan: ‘Ha’u sei halo sa los? Ha’u sei haruka ha’u nia oan doben. Hare tiha nia, sira sei respeita nia karik.’ ¹⁴ Maibe, hare tiha nia, serbisu na’in sira dehan ba malu: ‘Ida ne’e mak liman rohan na’in. Ita ba oho nia, atu liman rohan monu ba ita nia liman.’ ¹⁵ Nune’e, soe tiha nia ba to’os liur, sira oho nia. To’os na’in sei halo sa los ba sira? ¹⁶ Nia sei mai, hodi oho serbisu na’in sira ne’e, hafoin sei saran to’os ne’e ba ema seluk.” Rona tiha ne’e, sira simu dehan: “Ne’e la bele!” ¹⁷ Maibe, hateke dau-daun ba sira, Jesus dehan ba sira: “Lia nebe hakerek ne’e dehan katak sa: ‘Fatuk nebe badaen sira hewai, sai fali fatuk inan?’ ¹⁸ Sira hotu nebe monu iha fatuk ne’e nia leten sei mohu hela; fatuk ne’e monu karik iha ema ruma nia leten, sei hanehan nia.” ¹⁹ Eskriba sira no na’i ulun am’lulik sira nian haka’as an atu kaer Nia, basa sira hatene katak aiknanoik ida ne’e kona ba sira, maibe sira tauk povu.

Impostu ba Cesar

                ²⁰ Sira hafu Nia sub-subar, hodi haruka emar sira nebe hakfudik nudar ema diak, atu kaer Nia iha liafuan ruma, atu nune’e sira bele saran Nia ba gubernador nia liman no kbiit. ²¹ Sira husu ba Nia: “Mestre, ami hatene katak Ita koalia no hanorin ho lialos, la fihir ema, maibe hatudu Maromak nia dalan tuir lialos. ²² Ami bele selu impostu ba Cesar ka lae?” ²³ Hatene tiha sira nia laran makerek, Nia hatan ba sira: ²⁴ “Hatudu lai mai Ha’u osan denariu ida. Ilas ho hakerek ne’e, se nian?” Sira hatan: “Cesar nian.” ²⁵ Nia dehan fali: “Ne’e duni, fo ba Cesar buat nebe Cesar nian, no ba Maromak buat nebe Maromak nian.” ²⁶ Sira la biban atu kaer Nia iha lia sala ida iha povu nia oin; hakfodak tiha ho nia liafuan, sira nonok tiha.

Kona ba matebian sira nia moris hi’as

                ²⁷ Ema saduseu balun, nebe la fiar moris hi’as, hakbesik hodi husu ba Nia: ²⁸ “Mestre, Moises hakerek katak mane ida mate karik hodi husik nia feen maibe oan la iha, nia alin mane sei hola feto faluk ne’e atu fo oan sira ba nia maun. ²⁹ Iha kedas maun alin na’in hitu. Ida uluk hola feto, hodi mate oan la iha. ³⁰ Alin nebe tuir nia kaben fali ho feto faluk ne’e; tuir mai ida seluk, nune’e mos sira na’in hitu mate hotu la husik oan ida. ³² Ikus liu, feto faluk mos mate. ³³ Ne’e duni, iha loron moris hi’as nian, feto ne’e se nia feen los? Basa sira na’in hitu hola tiha nia” ³⁴ Jesus dehan ba sira: “Mundu ne’e nia oan sira hola malu nudar laen feen, ³⁵ maibe sira nebe soi ba mundu seluk no ba moris hi’as housi mate sira leet, sira ne’e la kaben, ³⁶ tan sira la bele mate tan, basa sira hanesan anju sira. Nudar moris hi’as nia oan sira, sira Maromak nia oan. ³⁷ Kona ba moris hi’as ema mate sira nian, Moises rasik mak hatudu hodi hakerek kona ba ai-tarak nebe lakan maibe ahi la han, wainhira nia bolu Na’i ‘Abraao nia Maromak, Isaac nia Maromak, no Jacob nia Maromak.’ ³⁸ Nia la’os ema mate sira nia Maromak, maibe ema moris sira nian; basa ba  Na’i, ema hotu moris hela.” ³⁹ Tuir mai, eskriba balun simu hodi dehan: “Mestre, Ita koalia los.” ⁴⁰ No sira la berani atu husu tan buat ida.

Jesus ho David

                ⁴¹ Nia dehan ba sira: “Oin sa ema dehan katak Messias mak David nia oan? ⁴² Basa David rasik mak dehan iha livru salmu sira nian: ‘Na’i dehan ba ha’u nia Na’i: Tur iha Ha’u nia sorin kuana, ⁴³ to’o Ha’u tau O nia funubalun sira iha O nia ain sira okos.’ ⁴⁴ David bolu Nia karik ‘Na’i,’ nusa mak nia bele sai nia oan fali?” ⁴⁵ Wainhira povu tomak rona Nia, Jesus dehan ba nia eskolante sira: ⁴⁶ “Imi matan moris kona ba eskriba sira nebe gosta la’o ho hatais naruk atu ema kumprimenta sira iha luron, hodi buka fatin uluk iha sinagoga no iha festa sira; ⁴⁷ nebe han feto faluk sira nia sasan sira hodi hakfudik hamulak barak: sira ne’e sei hetan kastigu aat liu.”