21

Feto faluk nia esmola

                ¹ Foti tiha matan, Nia hare ema riku sira tau esmola iha osan fatin templu nian. ² Nia hare mos feto faluk kiak ida nebe tau nia esmola kiik. ³ Nia dehan: “Tebes, Ha’u dehan ba imi katak feto faluk kiak ne’e tau osan folin liu sira seluk hotu, ⁴ basa housi buat nebe resin, sira fo buat karan ba Maromak, maibe ema kiak ne’e saran buat hotu nebe nia iha atu moris.”

Jesus si’ik kona ba templu

                ⁵ Tan ema balun koalia kona ba templu hodi hateten katak ema hafutar nia ho fatuk mesa furak no buat karan sira, Jesus dehan: ⁶ “Loron sei to’o wainhira buat nebe imi hare dau-daun ne’e sei sobu hotu; fatuk ida sei la hela iha fatuk seluk nia leten.” ⁷ Sira husu ba Nia: “Mestre, wainhira mak buat hirak ne’e mosu? Sira sei hahu ho sinal ida nebe?” ⁸ Nia hatan: “Hare ba, atu ema keta lohi imi; basa ema barak sei mosu mai hodi ha’u nia naran, dehan ‘Mak ha’u!’ eh ‘Loron besik ona!’ Imi keta tuir sira. ⁹ Wainhira imi rona koalia kona ba funu no revolusaun sira, keta tauk, basa buat hirak ne’e hotu sei mosu uluk, maibe ne’e la’os katak rohan to’o ona mai.” ¹⁰ Hafoin Nia dehan ba sira: “Povu ida sei hamriik halo funu hasouru povu seluk, reinu ida hasouru reinu seluk. ¹¹ Rai sei nakdoko maka’as; iha fatin oi-oin ema sei hamlaha, moras peste sei mosu; buat nebe halo ema tauk sei mosu mai, ho sinal bo-boot sira iha lalehan. ¹² Maibe uluk liu buat ne’e hotu, ema sei kaer imi, sei duni imi, sei lori imi ba sinagoga no hatama imi iha dadur laran. Ema sei saran imi ba liurai no emboot sira hodi Ha’u nia naran; ¹³ maibe imi sei biban atu fo sasin. ¹⁴ Ne’e duni, keta haluha, imi lalika hanoin resin atu hatan oin sa; ¹⁵ basa Ha’u sei fo ba imi lia matenek, nebe imi nia funubalun sira hotu sei la bele tahan eh koalia hasouru. ¹⁶ Imi nia aman inan, maun alin, parenti no belun sira mak sei saran imi. Ema sei oho imi balun. ¹⁷ Ema hotu sei hakribi imi tan Ha’u nia naran. ¹⁸ Maibe imi nia fuuk lahan ida mos sei la monu lakon. ¹⁹ Imi fiar metin nafatin karik, imi sei soi imi nia klamar.”

                ²⁰ “Wainhira imi hare soldadu sira hale’u Jerusalem, imi sei hatene los katak nia besik ona atu mohu. ²¹ Iha loron ne’e sira nebe iha Judeia, halai ba foho sira; sira nebe iha sidade laran, sai tiha; sira nebe iha to’os, keta tama fali iha sidade. ²² Basa ne’e mak loron kastigu nian, iha nebe sei sai tuir los buat nebe hakerek ona. ²³ Rahun aat ba feto sira nebe ko’us eh hasusu iha loron ne’e, basa sei iha tauk boot no hirus hasouru povu ne’e. ²⁴ Sira sei monu iha surik kroat nia okos, ema sei lori sira hanesan ema dadur ba rai hotu, no gentiu sira sei sobu rahun Jerusalem to’o sira nia otas sei hotu ona.”

Sinal sira loron ikus nian

                ²⁵ “Sinal sira sei mosu iha loron, iha fulan no fitun sira. Iha raiklaran, nasaun sira sei susar no tauk teb-tebes tamba tarutu housi laloran no tasi nian. ²⁶ Ema sira sei mate deit tamba tauk, hodi hanoin sa ida mak sei mosu iha raiklaran, basa lalehan nia kbiit sei nakdoko. ²⁷ Iha oras ne’e, sira sei hare Oan Mane tun mai iha kalohan ida ho kbiit no gloria wa’in tebes. ²⁸ Wainhira buat hirak ne’e sei mosu, imi aten berani, hodi foti matan ba leten, basa imi nia Maksoin besik ona.”

Aiknanoik ai figueira nian

                ²⁹ Nia haktuir tan ba sira aiknanoik ida ne’e: “Imi hare di-diak ai figueira no ai sira seluk. ³⁰ Wainhira sira hahu hatubun tahan nurak, imi hatene katak bainloron besik ona. ³¹ Nune’e mos, wainhira imi hare buat hirak ne’e mosu, imi sei hatene katak Maromak nia reinu besik ona. ³² Tebes Ha’u dehan ba imi: otas ne’e sei la liu, to’o buat ne’e mosu. ³³ Lalehan no rai sei liu, maibe Ha’u nia liafuan sira sei la liu.”

                ³⁴ “Imi matan moris neon na’in ba; imi laran keta todan tan hahalok aat sira, tan lanu, tan fo neon resin ba moris ne’e, atu loron ne’e keta to’o teki-teki deit; ³⁵ basa nia sei monu hanesan hani ida ba ema hotu iha raiklaran tomak. ³⁶ Ne’e duni, imi matan moris hodi hamulak nafatin, atu imi bele hetan kbiit hodi hadook an housi buat hotu nebe sei mosu no bele hamriik metin iha Oan Mane nia oin.”

³⁷ Iha loron, Jesus hanorin iha templu, maibe iha kalan Nia hela iha foho ida naran Oliveira. ³⁸ Iha dadersan povu tomak ba iha templu atu rona Nia.