23

Jesus iha Pilatos nia oin

                ¹ Sira hotu hamriik, hodi lori Nia ba Pilatos. ² Sira hahu duu Nia, dehan: “Ami hetan ema ne’e soran ami nia povu, bandu ema atu selu impostu ba Cesar, hodi dehan katak nia mak Messias liurai.” ³ Pilatos husu, “O Judeu sira nia liurai?” Nia hatan, “O dehan los.” ⁴ Pilatos dehan fali ba am’lulik sira nia ulun sira no ba ema lubun boot: “Ha’u la hetan sala ida iha ema ne’e.” ⁵ Maibe sira litik, dehan: “Nia soran povu hodi hanorin iha rai Judeia tomak, hahu housi Galileia to’o iha ne’e.”

                ⁶ Rona tiha ne’e, Pilatos husu Nia housi Galileia, ka lae. ⁷ No hatene tiha katak Nia Herodes nia emar, Pilatos haruka Nia ba Herodes, nebe mai mos iha Jerusalem iha loron hirak neba.

Jesus iha Herodes nia oin

                ⁸ Wainhira Herodes hare Jesus, nia haksolok teb-tebes; kleur ona mak nia hakarak hare Jesus, tan buat barak nebe nia rona, hodi hein Jesus sei halo milagre ruma iha nia oin. ⁹ Nia husu buat oi-oin ba Jesus, maibe Jesus la hatan buat ida. ¹⁰ Am’lulik sira nia ulun sira no mos eskriba sira iha neba litik hodi foti lia hasouru Jesus. ¹¹ Herodes ho nia soldadu sira hasara Nia, fo hatais unuk mean ida ba Nia hodi hamnasa, hafoin haruka Nia fila fali ba Pilatos. ¹² Iha loron neba Herodes ho Pilatos badame fali malu, tan uluk sira hare malu la diak.

Jesus fila fali ba Pilatos

                ¹³ Pilatos halibur am’lulik sira nia ulun sira, na’i ulun sira ho tan povu, hodi dehan ba sira: ¹⁴ “Imi lori ema ne’e mai ha’u tan Nia soran povu. Ha’u husu Nia iha imi nia oin, maibe iha Nia ha’u la hetan sala ida housi buat hirak nebe  imi duu Nia. ¹⁵ Herodes mos la hetan buat ida; tan ne’e, nia haruka fali mai ha’u. Ema ne’e la halo buat ida atu ita saran nia ba mate. ¹⁶ Ne’e duni, ha’u sei kastigu Nia hodi husik Nia ba.”

                ¹⁷ Nia ten ke husik ema ida ba sira iha loron festa. ¹⁸ Maibe sira hotu hakilar, dehan: “Oho tiha nia! Hasai mak Barrabas!” ¹⁹ Barrabas ne’e ema iha dadur laran tan halo funu hasouru estadu iha sidade no oho ema. ²⁰ Dala ida tan Pilatos koalia ba sira, hodi buka soi Jesus.  ²¹ Maibe sira hakilar nafatin:  “Hedi Nia ba krus! Hedi Nia ba krus!” ²² Ba dala tolu nia dehan ba sira: “Nia halo aat sa?  Ha’u la hetan sala ida atu oho Nia. Ne’e duni, ha’u sei kastigu Nia, hafoin husik Nia ba.” ²³ Maibe sira litik, hodi husu ho lia maka’as atu hedi Nia ba krus. Sira nia lia maka’as liu tan ba dau-daun. ²⁴ Ne’e duni, Pilatos haraik buat nebe sira husu; ²⁵ nia hasai ema nebe dadur tan soran povu no oho ema, no saran Jesus ba sira tuir sira nia hakarak.

Dalan ba foho Kalvariu

                ²⁶ Wainhira sira lori Nia, sira kaer ema ida housi Sirene naran Simao, nebe fila dau-daun housi to’os, hodi tau krus iha nia kbaas atu lori tuir Jesus. ²⁷ Ema lubun boot tuir Nia, no mos feto sira nebe tanis hodi hanoin tebes Nia. ²⁸ Maibe Jesus fila oin ba sira, dehan: “Jerusalem nia oan feto sira, imi keta tanis tamba Ha’u; diak liu tanis tan imi an rasik no tan imi nia oan sira. ²⁹ Basa loron sei to’o mai wainhira ema sei dehan:  ‘Rahun diak ba feto sira nebe oan la iha, knotak sira nebe la ko’us, hirus matan sira nebe la fo susuben.’  ³⁰ Iha loron neba sira sei dehan ba foho aas sira:  ‘Imi monu mai ami leten!’ no ba foho kiik sira:  ‘Imi taka tiha ami!’  ³¹ Basa sira halo ona nune’e karik ba ai-hun matak, ba ai-hun maran sira sei halo sa ida?”

Ema hedi Jesus ba krus

                ³² Sira lori mos ema aat na’in rua atu oho hamutuk ho Nia. ³³ Wainhira sira to’o fatin naran Kalvariu, sira hedi Nia ba krus ho ema aat sira ne’e, ida iha sorin kuana, ida seluk iha sorin karuk. ³⁴ Jesus dehan: “Aman, perdua sira, basa sira la hatene buat nebe sira halo.” Tuir mai sira dada  sorte atu fahe ba malu Jesus nia unuk sira.  ³⁵ Ema sira hamriik hodi hateke hela. Na’i ulun sira hamoe Nia, dehan:  “Nia nebe soi ema seluk, soi to’ok nia an; ema ne’e Maromak nia Messias karik.”  ³⁶ Soldadu sira mos hamoe Nia, hodi hakbesik atu fo ba Nia tua sin, ³⁷ dehan: “O Judeu sira nia liurai karik, soi o nia an ba!”  ³⁸ Iha nia ulun leten ema hakerek ho lia gregu, latin no ebreu: “Ne’e mak Judeu sira nia liurai.”

                ³⁹ Ema aat sira ida, nebe tara hela, koalia aat Nia, dehan: “O mak Messias karik, soi o an rasik, no mos ami!” ⁴⁰ Maibe ida seluk haksi’ak nia, dehan: “O mos hetan terus ne’e, o la tauk Maromak? ⁴¹ Tuir duni justisa mak ita hetan kastigu, tan ita nia hahalok aat; maibe ema ne’e la halo aat ida.”  ⁴² Hafoin nia dehan ba Jesus: “Na’i, hanoin ha’u wainhira Ita to’o Ita nia reinu.” ⁴³ Jesus hatan ba nia: “Tebes, Ha’u dehan ba o: ohin kedas o sei hamutuk ho Ha’u iha lalehan.”

Jesus nia mate

                ⁴⁴ Besik ona loron fahe rua, nakukun taka rai tomak to’o tuku tolu loraik, tan loro matan lakon tiha. ⁴⁵ Hena templu nian nakles fahe rua iha klaran, ⁴⁶ no Jesus hakilar ho lia maka’as: “Aman, iha Ita liman Ha’u saran Ha’u nia klamar!” Dehan tiha ne’e, Nia iis kotu.

                ⁴⁷ Hare tiha buat nebe mosu, senturiaun hahi Maromak, dehan: “Tebes, ema ne’e, ema diak duni!”

                ⁴⁸ Ema lubun boot nebe mai hare buat ne’e, hare hotu tiha, sira fila fali hodi tuku hirus matan. ⁴⁹ Jesus nia belun sira, no mos feto sira nebe tuir Nia housi Galileia, hamriik hodi hare housi dook.

Ema hakoi Jesus

                ⁵⁰ Iha na’i ulun ida, naran Jose, ema laran diak ida housi rai Arimateia, sidade ida iha Judeia. ⁵¹ Nia membru ida konseliu nian, nia la tuir nia maluk sira nia hakarak no hahalok sira, maibe hein dau-daun Maromak nia reinu. ⁵² Nia ba koalia ho Pilatos, hodi husu Jesus nia isin mate. ⁵³ Hatun tiha housi krus, nia falun tiha Nia ho hena mutin, hodi tau Nia iha rate foun ida, iha nebe seidauk hakoi ema ida. ⁵⁴ Ne’e loron atu hadia sasan, no loron Sabadu atu hahu ona. ⁵⁵ Feto sira nebe tuir Nia housi Galileia ba hamutuk ho Jose. ⁵⁶ Wainhira sira fila fali ona, sira hadia mina morin. Iha Sabadu sira la kaer serbisu tuir lisan.