24

Jesus moris hi’as

                ¹ Iha loron uluk semana nian, iha rai hun mutin, sira ba to’o rate, hodi lori mina morin nebe sira hadia. ² Sira hetan fatuk duir tiha ona. ³ Tama tiha iha laran, sira la hetan Na’i Jesus nia isin. ⁴ Sira sei hanoin hela, wainhira ema na’in rua ho unuk nabilan mosu iha sira leet. ⁵ Tan feto sira tauk, hodi hakru’uk ba rai, ema sira ne’e dehan ba sira: “Tansa imi buka ema moris iha mate sira leet? ⁶ Nia la iha ne’e; Nia moris hi’as ona! Imi hanoin fali oin sa Nia koalia ba imi, wainhira Nia sei iha Galileia, dehan: ⁷ ‘Ema sei saran Oan Mane ba maksalak sira liman, nebe sei hedi Nia ba krus; liu loron tolu, Nia sei moris hi’as.’” ⁸ No sira hanoin fali Jesus nia liafuan sira.

                ⁹ Fila tiha housi rate, sira ba haktuir buat hirak ne’e hotu ba sira na’in sanulu resin ida no ba sira seluk hotu. ¹⁰ Feto sira nebe haktuir ba apostolu sira buat hirak ne’e mak Maria Madalena, Joana ho Maria, Tiago nia inan, no mos sira seluk nebe la’o hamutuk ho sira. ¹¹ Maibe sira rona lia hirak ne’e nudar lia bulak, tan ne’e sira la fiar. ¹² Maibe Pedro hamriik hodi ba lalais rate. Hakru’uk tiha, nia hare deit hena sira. Nia fila fali ba uma, hodi hakfodak ho buat nebe mosu tiha.

Dalan Emaus nian

¹³ Iha loron neba eskolante na’in rua la’o ba knua ida naran Emaus, besik kilometru ualu housi Jerusalem. ¹⁴ Sira koalia ba malu kona ba buat nebe mosu ona. ¹⁵ Sira sei koalia hodi haksesuk malu dau-daun, Jesus rasik hakbesik hodi la’o hamutuk ho sira. ¹⁶ Maibe sira nia matan la dauk nakloke atu hatene Nia. ¹⁷ Nia dehan ba sira: “Imi koalia ba malu kona ba sa ida tuir dalan?” Sira para tiha ho oin kraik. ¹⁸ Sira ida naran Cleofas simu, hodi dehan: “Ita mesak ema housi rai seluk iha Jerusalem mak la hatene buat nebe mosu iha neba iha loron hirak ne’e?” ¹⁹ Nia husu ba sira: “Sa ida?” Sira hatan: “Kona ba Jesus Nazare, profeta ida beran boot iha lia no hahalok, iha Maromak no povu tomak nia oin: ²⁰ oin sa ita nia am’lulik no na’i ulun sira saran Nia ba mate hodi hedi Nia ba krus. ²¹ Ami hanoin katak Nia mak atu soi Israel, maibe liu ona loron tolu mak buat hirak ne’e mosu. ²² Los duni, ami nia feto balun halo ami hakfodak, basa dadersan hela, sira ba rate; ²³ hafoin, la hetan Nia isin, sira mai haktuir katak sira hare anju sira nebe dehan katak Nia moris hi'as ona. ²⁴ Ami nia maluk balun mos ba to’o rate, hodi hetan buat hotu hanesan feto sira haktuir; maibe sira la hare Nia.”

                ²⁵ Nia dehan ba sira: “Imi ema beik duni, no neon badak atu fiar buat hotu nebe profeta sira hateten! ²⁶ Mesias sei terus buat hirak ne’e atu nune’e Nia bele tama iha Nia gloria?” ²⁷ Hafoin, hahu ho Moises no profeta sira hotu, Nia hanorin ba sira buat hotu nebe hakerek iha Eskritura tomak kona ba Nia. ²⁸ Besik ona knua nebe sira atu ba, Nia hakfudik atu la’o ba oin. ²⁹ Maibe sira husu maka’as ba Nia, dehan: “Hela ho ami, basa kalan besik ona, loron mos monu dau-daun ona.” Nia tama ho sira. ³⁰ Hafoin, tur tiha atu han ho sira, Nia kaer paun, fo bensa, silu hodi fahe ba sira. ³¹ Sira nia matan nakloke, hodi hatene Jesus; maibe Nia lakon kedas housi sira oin. ³² Sira dehan ba malu: “Ita nia laran la manas wainhira Nia koalia tuir dalan hodi hanorin Eskritura?”           

                ³³ Sira hamriik kedas, hodi fila fali ba Jerusalem. Iha neba sira hetan sira na’in sanulu resin ida halibur hamutuk ho maluk sira seluk, ³⁴ nebe dehan ba sira: “Tebes, Na’i moris hi’as ona, hodi mosu ba Simao!” ³⁵ Tuir mai, sira haktuir buat nebe mosu iha dalan, oin sa sira hatene Jesus wainhira Nia silu paun.

Jesus mosu ba eskolante sira

                ³⁶ Sira sei koalia hela, Jesus hamriik iha sira leet, hodi dehan ba sira: “Dame hela ho imi!” ³⁷ Sira hakfodak no tauk, hodi hanoin katak sira hare mate klamar ida. ³⁸ Nia husu ba sira: “Tansa imi fuan taridu hodi husu buat barak iha imi laran? ³⁹ Hare ha’u nia liman no ain ba: Ha’u mak ne’e duni! Imi kaer Ha’u ba, hodi hare katak mate klamar ida isin ho ruin la iha, nudar imi hare Ha’u iha.” ⁴⁰ Dehan tiha ne’e, Nia hatudu ba sira nia liman no ain. ⁴¹ Maibe sira la fiar, hodi hakfodak ho ksolok boot. Nia dehan: “Imi iha buat ruma atu han?” ⁴² Sira fo ba Nia ikan tunu baluk ida. ⁴³ Nia simu, hodi han iha sira oin. ⁴⁴ Hafoin Nia dehan ba sira: “Wainhira Ha’u sei iha imi leet, Ha’u dehan ba imi liafuan hirak ne’e: katak sei sai tuir los lia hotu nebe Moises, profeta no salmu sira hakerek kona ba Ha’u iha Eskritura.”  ⁴⁵ Tuir mai, Nia loke sira neon atu hatene lo-los Eskritura,  ⁴⁶ hodi dehan ba sira: “Hakerek tiha ona, nune’e mak Messias sei hetan terus no, liu loron tolu, sei moris hi’as. ⁴⁷ Hodi nia naran sei haklaken ba nasaun hot-hotu laran moras no perdua ba sala sira, hahu housi Jerusalem. ⁴⁸ Imi mak sasin kona ba buat hirak ne’e. ⁴⁹ Ha’u sei haruka ba imi Ida nebe ha’u Aman hakotu tiha ona; imi hela lai iha sidade, to’o imi simu tiha kbiit housi leten.”

Jesus sa’e ba lalehan

                ⁵⁰ Hafoin Jesus lori sira to’o besik Betania. Iha neba, Nia foti liman, hodi haraik bensa ba sira. ⁵¹ Wainhira Nia sei fo bensa dau-daun, Nia hadook an housi sira, hodi sa’e ba lalehan. ⁵² Sira hakneak iha nia oin, hafoin sira fila ho ksolok boot ba Jerusalem. ⁵³ Loron loron sira halibur iha templu, hodi hahi hanai Maromak.