MATEUS

1

Jesus Nia bei-ala sira

                ¹ Jesus Kristu nia bei-ala sira housi David to'o Abraao mak ne'e: ² Abraao mak Isaac nia aman; Isaac Jacob nia aman; Jacob mak  Juda ho nia alin sira nia aman. ³ Juda ho Tamar hahoris Fares no Zara, Fares mak Esrao nia aman; Esrao Arao nia aman, ⁴ Arao fali hahoris Aminadab; Aminadab Naassao nia aman; Naassao Salmao nia aman. ⁵ Salmao ho Racab hahoris Booz; Booz ho Rute hahoris Obed; Obed mak Jesse nia aman; ⁶ Jesse fali mak liurai David nia aman.

David, ho Urias nia fen, hahoris Salomao. ⁷ Salomao mak Roboao nia aman; Roboao Abias nia aman; Abias Asa nia aman. ⁸ Asa  mak Josafa nia aman; Josafa Jorao nia aman;  Jorao Ozias nia aman. ⁹ Ozias mak Joatao nia aman; Joatao Acaz nia aman; Acaz Ezequias nia aman. ¹⁰ Ezequias mak Manasses nia aman; Manasses Amos nia aman; Amos Josias nia aman. ¹¹ Josias mak Jeconias ho nia maun alin sira nia aman, iha tempu dadur nian iha Babilonia.

¹² Liu tiha tempu dadur nian iha Babilonia, Jeconias hetan oan naran Salatiel. Salatiel mak Zorobabel nia aman; ¹³ Zorobabel  mak Abiude nia aman; Abiude Eliaquim nia aman; Eliaquim Azor nia aman. ¹⁴ Azor Sadoque nia aman; Sadoque Aquim nia aman; Aquim Eliude nia aman; ¹⁵ Eliude Eleazar nia aman; Eleazar Mata nia aman; Mata Jacob nia aman; ¹⁶ Jacob hetan oan naran Jose, nebe kaben ho Maria. Housi Maria moris Jesus, nebe hanaran Kristu. ¹⁷ Nune'e housi Abraao to'o David, derasaun sanulu resin haat; housi David to'o tempu dadur nian iha Babilonia, derasaun sanulu resin haat; no housi tempu dadur nian iha Babilonia to'o Kristu, derasaun sanulu resin haat.

Jesus nia moris

                ¹⁸ Jesus Kristu moris nune'e: Jose husu nanis ona atu kaben ho Maria, Jesus nia inan. Molok sira moris hamutuk, Maria ko’us tiha ona hodi Espiritu Santu nia kbiit. ¹⁹ Nia laen Jose, nebe ema diak no lakohi hamoe Maria, hakotu atu husik deit nia. ²⁰ Nia hanoin dau-daun buat ne'e, wainhira Na’i nia anju mosu ba nia iha mehi, dehan: “Jose, David nia oan, keta tauk simu Maria nudar o nia kaben, basa nia ko’us hodi Espiritu Santu nia kbiit. ²¹ Maria sei tur ahi oan mane ida nebe o sei hanaran Jesus, basa Nia mak sei soi povu housi sira sala.” ²² Ne'e hotu mosu, atu halo tuir lia nebe Na’i hato'o housi profeta, dehan: ²³ 'Fetoran ida sei ko’us no tur ahi oan mane ida, nebe ema sei hanaran Emmanuel, katak Maromak ho ita.' ²⁴ Hader tiha housi mehi, Jose halo tuir buat nebe Na'i nia anju haruka hodi simu nia kaben. ²⁵ Maski Jose la dauk hamutuk ho nia,  Maria tur ahi oan mane ida, nebe nia hanaran Jesus.