2

Festa kaben nian iha Kana

                 ¹ Liu tiha loron tolu, ema halo festa kaben nian iha Kana Galileia. Jesus nia inan iha neba. ² Jesus ho nia eskolante sira simu mos konvite ba festa. ³ Tamba tua la iha ona, Jesus nia inan dehan ba Nia: “Sira nia tua hotu ona.” ⁴ Jesus simu  dehan: “Na’in feto, ita atu halo sa los? Ha’u nia loron la dauk to’o.” ⁵ Maibe nia inan dehan ba sira nebe hein meja: “Imi halo tuir buat nebe Nia haruka.” ⁶ Kusi neen iha neba, atu Judeu sira fase ain no liman; kusi ida‑ida  bele lori litru ualu nulu ka atus ida rua nulu. ⁷ Jesus lia tun ba sira: “Imi tau be ba kusi sira ne’e to’o nakonu.” Sira tau be nakonu di-diak to’o ibun. ⁸ Hafoin Jesus dehan ba sira: “Imi bele hasai ona, lori ba uma na’in tenda.” Sira lori duni. ⁹ Uma na’in tenda koko tiha be nakfila ba tua (tan nia la hatene tua ne’e mai housi nebe, maibe ema sira nebe hein meja no kuru be hatene); nia bolu noivu ¹⁰ hodi dehan: “Ema hotu fo uluk tua diak; konvidadu sira hemu di-diak ona, hafoin mak fo tua la dun diak. O fali rai subar tiha tua diak to’o oras ne’e.” ¹¹ Ne’e mak milagre uluk nebe Jesus halo iha Kana Galileia. Nia hatudu nia gloria, nia eskolante sira fiar Nia.

                ¹² Liu tiha ne’e, Jesus ho nia inan, maun‑alin no eskolante sira tun ba Kafarnaum. Sira hela loron ruma iha neba.

Jesus hamos templu

                 ¹³ Besik dau-daun ona Judeu sira nia Paskua, Jesus sa’e ba Jerusalem. ¹⁴ Iha templu laran, Nia hetan ema nebe fa’an karau, bibi no falur, ho ema sira nebe troka osan tur hela iha sira nia meja. ¹⁵ Nia bobar tali hamutuk, hodi duni sai sira hotu housi templu hamutuk ho bibi no karau sira. Nia halo namtate ba rai ema troka osan sira nia osan, hodi halo taka‑fila meja sira. ¹⁶ Ba sira nebe fa’an falur, Nia dehan: “Hasai buat hirak ne’e housi ne’e: keta halo Ha’u Aman nia uma sai uma kontratu ida.” ¹⁷ Eskolante sira hanoin kedas liafuan nebe hakerek: “Tan badinas tau matan ba o nia uma, mak Ha’u lakon Ha’u an.” ¹⁸ Judeu sira husu  ba nia: “Sinal sa los mak o bele fo mai ami atu hatudu katak  o bele halo nune’e?” ¹⁹ Jesus hatan ba sira: “Imi sobu templu ne’e, Ha’u sei harii fali nia iha loron tolu nia laran.” ²⁰ Judeu sira dehan: “Ema halo templu ne’e iha tinan haat nulu resin neen nia laran, no o sei harii fali nia iha loron tolu nia laran?” ²¹ Maibe Jesus koalia kona ba templu nia isin nian. ²² Tan ne’e, wainhira Jesus moris hi’as housi mate, nia eskolante sira hanoin hikas katak uluk nia dehan nanis: nune’e sira fiar eskritura no lia fuan sira nebe uluk nia dehan.

                ²³ Wainhira Jesus sei hela iha Jerusalem, iha festa Paskua, ema barak fiar iha Nia naran, tan milagre sira nebe Nia halo. ²⁴ Maibe Nia la fiar sira, basa Nia hatene sira hotu. ²⁵ Nia la kuran atu ema fo hatene ba Nia kona ema naran ida, basa Nia hatene buat sa los mak iha ema nia laran.