8

Feto sala na’in

¹ Maibe Jesus sa’e ba foho Oliveira. ² Iha dader, Nia mosu fali iha templu. Povu tomak hakbesik Nia, no Jesus tur hodi hanorin sira. ³ Eskriba no fariseu sira lori feto ida nebe ema toman halo sala ho mane seluk. ⁴ Sira tau feto ne’e iha klaran, hodi dehan ba Jesus: “Mestre, ema toman feto ne’e halo sala ho mane seluk. ⁵ Tuir ukunfuan, Moises haruka ita atu tuda mate feto sira hanesan ne’e. O dehan sa los?” ⁶ Sira husu ne’e hodi koko Nia, atu sira bele hetan lia ruma hasouru Nia. Maibe Jesus hakru’uk, hodi hakerek iha rai ho nia liman fuan. ⁷ Tan sira litik nafatin Nia, Jesus hamriik hodi dehan ba sira: “Imi ida nebe sala la iha, nia mak tuda uluk feto ne’e!” ⁸ Hafoiin Nia hakru’uk fali hodi hakerek iha rai. ⁹ Rona tiha liafuan hirak ne’e, sira ida‑ida sai dau-daun, hahu housi katuas sira. Ikus mai Jesus hela mesak ho feto nebe hamriik iha nia oin. ¹⁰ Hodi foti matan, Jesus dehan ba nia: “Feto, sira hotu ba nebe? Ema ida la tesi lia ba o?” ¹¹ Nia hatan: “La iha, Na’i.” Jesus koalia fali hodi dehan ba nia: “Ha’u mos la tesi lia hasouru o; la’o ona ba, no keta sala tan.”

Jesus mak mundu nia naroman

                 ¹² Jesus koalia hikas ba sira nune’e: “Ha’u mak mundu nia naroman. Ema nebe tuir Ha’u, nia sei la la’o iha nakukun laran, maibe sei iha naroman moris nian.” ¹³ Fariseu sira dehan ba Nia: “O fo sasin ba o nia an; O nia sasin la los.”¹⁴ Jesus hatan ba sira, dehan: “Maski Ha’u fo sasin kona ba Ha’u An, Ha’u nia sasin los, tamba Ha’u hatene Ha’u mai housi nebe no Ha’u ba nebe; maibe imi la hatene Ha’u mai housi nebe no Ha’u ba nebe. ¹⁵ Imi tesi lia tuir isin nia hanoin. Ha’u la tesi lia kona ba ema ida ¹⁶ Maibe, Ha’u tesi lia mos karik, Ha’u nia lia los, tamba Ha’u la hela mesak. Ha’u hela ho Ida nebe haruka Ha’u mai. ¹⁷ Iha imi nia ukunfuan hakerek katak ema na’in rua nia sasin los. ¹⁸ Ha’u fo sasin kona ba Ha’u An; no Aman nebe haruka Ha’u mai, Nia mos fo sasin kona ba Ha’u.” ¹⁹ Sira husu ba Nia: “O Nia Aman iha nebe?” Jesus hatan: “Imi la hatene Ha’u, la hatene mos Ha’u Aman. Imi hatene Ha’u karik, imi sei hatene mos Ha’u Aman.” ²⁰ Jesus hateten liafuan hirak ne’e besik osan fatin, wainhira Nia hanorin dau-daun iha templu. Maibe ema ida la kaer Nia, basa nia oras seidauk to’o.

Jesus la’os housi mundu ne’e

                 ²¹ Jesus dehan fali ba sira: “Ha’u sei ba, imi sei buka Ha’u; maibe imi sei mate iha imi nia sala. Ba fatin nebe Ha’u ba, imi la bele ba.” ²² Judeu sira hateten ba malu: “Nia atu oho an karik, tan ne’e Nia dehan: ‘Ba fatin nebe Ha’u ba, imi la bele ba?” ²³ Jesus lia tun ba sira, dehan: “Imi mai housi kraik, Ha’u mai housi leten; imi mundu ne’e nian, Ha’u la’os mundu ne’e nian. ²⁴ Ha’u dehan ba imi katak imi sei mate iha imi nia sala, basa imi la fiar karik katak Ha’u mak Nia, imi sei mate iha imi nia sala.” ²⁵ Sira husu ba Nia: “O se los?” Jesus hatan: “Ha’u hateten ona ba imi uluk kedas. ²⁶ Ha’u sei iha buat barak atu koalia no tesi lia kona ba imi. Maibe ida nebe haruka Ha’u mai, Nia los; no Ha’u fo sai ba mundu buat nebe Ha’u rona housi Nia.” ²⁷ Sira la hatene katak Nia koalia ba sira kona ba Aman. ²⁸ Ne’e duni, Jesus dehan: “Wainhira imi sei foti tiha Oan Mane, iha oras neba mak imi sei hatene katak Ha’u mak Nia, no katak Ha’u la halo buat ida hodi Ha’u rasik nia kbiit, maibe Ha’u koalia nune’e nudar Aman hanorin mai Ha’u. ²⁹ Ida nebe haruka Ha’u mai hela ho Ha’u; Nia la husik Ha’u mesak basa Ha’u halo nafatin buat nebe fo ksolok ba Nia.”

                ³⁰ Jesus hateten buat sira ne’e, no ema barak fiar Nia.

Jesus ho Abraao

                 ³¹ Tuir mai Jesus dehan ba sira nebe fiar iha Nia: “Imi hela nafatin karik iha Ha’u nia liafuan, imi sei sai Ha’u nia eskolante lo-los; ³² no imi sei hatene lialos, no lialos sei soi imi.” ³³ Sira hatan: “Ami Abraao nia oan; ami la dauk sai ema ida nia atan. Nusa mak o dehan: ‘Imi sei hetan maksoin’?” ³⁴ Jesus hatan ba sira : “Tebes, tebes, Ha’u dehan ba imi: ema nebe halo sala, ema ne’e sala nia atan. ³⁵ Atan la horik nafatin iha uma; Oan Mane mak horik nafatin iha uma. ³⁶ Ne’e duni, Oan Mane soi imi karik, imi sei hetan maksoin duni. ³⁷ Ha’u hatene katak imi Abraao nia oan; maibe imi hakarak oho Ha’u basa Ha’u nia liafuan la monu ba imi nia laran. ³⁸ Ha’u koalia kona ba buat nebe Ha’u hare iha Ha’u Aman; no imi fali halo buat nebe imi rona housi imi nia aman.” ³⁹ Sira hatan ba Nia: “Ami nia aman mak Abraao.” Jesus hatan, “Imi Abraao nia oan sira karik, imi sei halo buat nebe nia halo, ⁴⁰ maibe ohin imi hakarak oho Ha’u, nebe fo sai ba imi lialos nebe Ha’u rona housi Maromak. Abraao la halo buat ne’e! ⁴¹ Imi halo dau-daun imi aman rasik nia hahalok.” Sira dehan fali ba Nia: “Ami la moris tan sala foer: ida deit mak ami nia Aman, katak Maromak.” ⁴² Jesus hatan: “Maromak mak imi nia Aman karik, imi sei hadomi Ha’u, basa Ha’u sai no mai housi Maromak. Ha’u la mai hodi Ha’u nia hakarak rasik, maibe Nia mak haruka Ha’u mai. ⁴³ Tansa mak imi la komprende buat nebe Ha’u hateten? Tamba imi la bele tahan atu rona Ha’u nia liafuan. ⁴⁴ Tan diabu mak imi nia aman. imi hakarak tuir imi nia aman nia hakarak. Houri uluk kedas nia oho ema. Nia la hela iha lialos, basa la iha lialos iha nia. Wainhira nia bosok, nia fo sai buat nebe tuir nia an nian, basa nia bosokten no lia bosok nia aman. ⁴⁵  Maibe tan Ha’u hateten lialos ba imi, imi la fiar. ⁴⁶ Imi ida nebe mak bele dehan katak Ha’u sala? Ha’u hateten lialos karik ba imi tansa imi la fiar Ha’u? ⁴⁷ Ema nebe mai housi Maromak, rona Maromak nia liafuan; imi la rona sira tamba imi la mai housi Maromak.” ⁴⁸ Judeu sira hatan ba Nia: “Ami la koalia los wainhira ami dehan katak O ema Samaritanu ida no diabu iha O nia laran?” ⁴⁹ Jesus hatan: “Ha'u diabu la iha, maibe Ha’u hahi Ha’u nia Aman, no imi la hamtauk Ha’u. ⁵⁰ Ha’u la buka naran boot ba Ha’u An. Iha Ida seluk nebe buka nia no Nia sei tesi lia. ⁵¹ Tebes, tebes, Ha’u dehan ba imi: Ema ida halo tuir karik Ha’u nia liafuan, nia sei la mate tinan ba tinan.” ⁵² Judeu sira hateten ba Nia: “Oras ne’e ami hatene katak O iha diabu. Abraao mate tiha ona, profeta sira mos mate ona; maibe O dehan: ‘Ema nebe halo tuir Ha’u nia liafuan, nia sei la mate tinan ba tinan.’ ⁵³ O boot liu fali ami nia aman Abraao, nebe mate ona? Profeta sira mos mate. O halo an sa los?” ⁵⁴ Jesus hatan: “Ha’u fo gloria ba Ha’u nia an karik, Ha’u nia gloria la folin buat ida; Ha’u nia Aman mak fo gloria mai Ha’u. Nia nebe imi bolu imi nia Maromak. ⁵⁵ Maibe imi la hatene Nia, Ha’u mak hatene Nia. Ha’u dehan karik Ha’u la hatene Nia, Ha’u bosokten hanesan imi. Maibe Ha’u hatene Nia no Ha’u halo tuir nia liafuan. ⁵⁶ Imi nia aman Abraao haksolok tan nia atu hare Ha’u nia loron; nia hare tiha ona hodi haksolok.” ⁵⁷ Judeu sira hateten ba Nia: “O seidauk tinan lima nulu, O hare ona Abraao?” ⁵⁸  Jesus hatan ba sira: “Tebes, tebes, Ha’u dehan ba imi katak molok Abraao moris, Ha’u mak Ha’u.” ⁵⁹ Nune’e sira kaer fatuk atu tuda Nia, maibe Jesus la’o haksumik tiha, hodi sai housi templu.