9

Jesus bali ema matan delek

                ¹ Jesus liu dau-daun, Nia hare ema nebe matan delek houri moris mai. ² Eskolante sira husu ba Nia: “Na’i, se nia sala mak halo ema ne’e moris matan delek: nia sala ka nia aman sira nian?” ³ Jesus hatan ba sira: “Nia la sala, nia aman inan sira mos la sala; maibe, ne’e atu Maromak nia hahalok sira mosu iha nia. ⁴ Wainhira sei loron, Ha’u sei halo Ida nebe haruka Ha’u mai nia serbisu; kalan to’o mai wainhira ema ida la bele serbisu. ⁴ Wainhira Ha’u iha mundu, Ha’u mundu nia naroman.” ⁶ Dehan tiha ne’e, Nia tafui ba rai halo tahu ho nia kaben, hafoin nia kose tahu ne’e ba matan delek ne’e nia matan ⁷ hodi dehan ba nia: “O ba fase iha pisina Siloe nian.” Siloe katak “ida nebe ema haruka.” Ne’e duni, nia ba fase; hafoin nia fila, hodi hare ona. ⁸ Ema sira nebe hela besik nia, no sira hotu nebe hare nia husu esmola, husu ba malu: “Ema ne’e la’os ida nebe tur husu esmola?” ⁹ Ema balun dehan: “Nia duni,” seluk fali dehan: “La’os nia; ema ida hanesan nia!” Nia rasik dehan: “Ha’u duni!” ¹⁰ Sira husu ba nia: “Oin sa mak o nia matan nakloke?” ¹¹ Nia hatan: “Ema ida naran Jesus halo tahu, kose ha’u nia matan hodi dehan: ‘Ba fase iha pisina Siloe.’ Ha’u ba, fase tiha, no ha’u hare.” ¹² Sira husu tan: “Nia iha nebe?” Nia hatan: “Ha’u la hatene.” ¹³ Sira lori ema nebe uluk matan delek ne’e ba fariseu sira. ¹⁴ Loron nebe Jesus halo tahu hodi loke nia matan ne’e, loron Sabadu ida. ¹⁵ Fariseu sira husu ba nia oin sa nia hahu hare. Ema ne’e dehan ba sira: “Nia tau tahu ba ha’u nia matan, hafoin ha’u ba fase; oras ne’e ha’u hare.” ¹⁶ Fariseu balun dehan: “Ema ne’e la mai housi Maromak, basa nia la halo tuir Sabadu.” Balun dehan: “Oin sa mak ema maksalak ida bele halo milagre ida hanesan ne’e?” Sira nia lia la tuir malu. ¹⁷ Sira husu fali ba ema matan delek ne’e: “O dehan sa kona ba ema nebe loke o nia matan?” Nia hatan: “Ema ne’e Profeta ida.” ¹⁸ Maibe Judeu sira la fiar katak ema ne’e uluk matan delek, hafoin hahu hare. Tan ne’e, sira bolu nia aman inan, ¹⁹ hodi husu ba sira: “Ida ne’e mak imi nia oan nebe imi dehan katak moris mai matan delek? Nusa mak oras nia bele hare?” ²⁰ Nia aman inan hatan: “Ami hatene katak ida ne’e ami nia oan nebe moris mai matan delek, ²¹ maibe halo nusa mak oras ne’e nia hare, se mak loke nia matan, ne’e ami la hatene. Nia iha otas ona: imi husu nia ba, nia rasik sei koalia.” ²² Nia aman inan koalia hanesan ne’e, tan sira tauk Judeu sira. Basa Judeu sira lia tuir malu ona katak ema ruma karik hateten katak Jesus mak Messias, sira sei duni sai nia housi sinagoga. ²³ Tan ne’e, mak nia aman inan dehan: “Nia iha otas ona, imi husu nia ba.”

                ²⁴ Sira bolu ema nebe uluk matan delek dala ida tan, hodi dehan ba nia: “O hahi Maromak  ba! Ami hatene katak ema ne’e ema maksalak.” ²⁵ Nia hatan: “Nia ema maksalak ka lae, ha’u la hatene. Ha’u hatene deit katak, uluk ha’u matan delek, oras ne’e ha’u hare.” ²⁶ Sira husu ba nia: “Nia halo sa ida ba o? Oin sa mak nia loke o nia matan?” Nia hatan: “Ha’u dehan ona ba imi, imi la rona; tansa imi hakarak rona hikas? Imi mos hakarak sai nia eskolante, ka?” ²⁸ Sira hateten ba nia: “O mak nia eskolante; ami Moises nia eskolante sira. ²⁹ Ami hatene katak Maromak koalia ba Moises; maibe ida ne’e ami la hatene Nia mai housi nebe!” ³⁰ Ema ne’e dehan fali ba sira: “Ne’e mak halo ema hakfodak, katak imi la hatene Nia mai housi nebe, maibe Nia loke ha’u nia matan. ³¹ Ita hatene katak Maromak la rona ema maksalak sira, maibe Nia rona ema nebe adora Maromak no halo tuir nia hakarak. ³² Houri uluk seidauk rona ema ida loke matan ba ema nebe matan delek houri loron nia moris! ³³ Nia la mai karik housi Maromak, Nia la bele halo buat ida.” ³⁴ Sira hatan: “O moris iha sala nia laran, o hakarak hanorin fali ami?” Hafoin sira duni sai nia.

                ³⁵ Jesus rona katak sira duni sai nia; hetan tiha nia, Jesus dehan ba nia: “O fiar Oan Mane?” ³⁶ Nia hatan: “Nia se los, Na’i, atu ha’u fiar nia?” ³⁷ Jesus dehan: “O hare tiha ona Nia: Nia mak koalia dau-daun ho o.” ³⁸ Ema ne’e dehan: “Ha’u fiar, Na’i!” Hafoin nia hakneak iha Jesus nia futar oin, hodi adora Nia. ³⁹ Jesus lia tun ba nia: “Ha’u mai iha mundu atu tesi lia, atu sira nebe la hare bele hare, no sira nebe hare, sira nia matan sai delek.” ⁴⁰ Rona liafuan hirak ne’e, fariseu balun nebe iha neba husu ba Nia: “Ne’e duni, ami mos matan delek?” ⁴¹ Jesus hatan ba sira: “Imi matan delek karik, imi la sala. Maibe tamba imi dehan ‘ami hare’ mak imi nia sala hela nafatin.”