10

Bibi‑atan diak

                 ¹ Tebes, Ha’u dehan ba imi: ida nebe la tama ba bibi luhan housi lutu matan maibe tama housi fatin seluk, ema ne’e na’okten ida. ² Maibe ida nebe tama housi lutu matan, nia mak bibi atan. ³ Nia  bolu bibi sira hodi sira nia naran, sira rona nia lia, hafoin nia lori sira ba liur. ⁴ Hasai hotu tiha nia bibi sira, nia ba uluk; bibi sira tuir nia, tan sira hatene nia lia. ⁵ Maibe bibi la tuir ema leet ida; sira halai housi nia, tan sira la hatene ema ne’e nia lia.”

                 ⁶ Ne’e mak aiknanoik nebe Jesus hateten ba sira; maibe sira la komprende lo-los Jesus koalia kona ba sa. ⁷ Ne’e duni Jesus dehan teni ba sira: “Tebes, tebes, Ha’u dehan ba imi: Ha’u mak bibi sira nia lutu matan. ⁸ Ema hotu nebe mai uluk liu Ha’u, mesak na’okten no ahu‑na’in sira; bibi sira la rona sira nia lia. ⁹ Ha’u mak lutu matan. Ida nebe liu housi Ha’u sei hetan diak; nia sei tama, sei sai, hodi hetan du’ut matak. ¹⁰ Ema na’okten mai atu na’ok, atu harahun deit. Ha’u mai atu ema hetan moris, hodi hetan moris ne’e wa’in liu tan. ¹¹ Ha’u mak bibi atan diak. Bibi‑atan diak saran nia moris ba nia bibi sira. ¹² Maibe ema nebe la’os bibi atan, la’os bibi na’in, hare tiha asu fuik mai, nia halai hodi soe bibi sira, nebe asu fuik kaer hodi halo namkari. ¹³ Tan nia ema kontratu, la tau matan ba bibi sira. ¹⁴ Ha’u mak bibi atan diak, Ha’u hatene Ha’u nia bibi sira, no Ha’u nia bibi sira hatene Ha’u. ¹⁵ Nudar Aman hatene Ha’u, nune’e mos Ha’u hatene Aman; no Ha’u saran Ha’u nia moris ba Ha’u nia bibi sira. ¹⁶ Ha’u sei iha tan bibi seluk nebe seidauk tama iha bibi luhan ida ne’e. Ha’u sei dada mos sira mai. Sira sei rona Ha’u nia lia, no sei iha bibi luhan ida deit ho bibi atan ida deit. ¹⁷ Aman hadomi Ha’u tamba Ha’u saran Ha’u nia moris atu simu fali nia. ¹⁸ Ema ida la hasai Ha’u nia moris housi Ha’u; hodi Ha’u rasik nia hakarak mak Ha’u saran moris ne’e. Ha’u iha kbiit atu saran Ha’u nia moris, no mos iha kbiit atu simu fali nia. Ida ne’e mak ukunfuan nebe Ha’u simu housi Ha’u Aman.” ¹⁸ Dala ida tan Judeu sira haksesuk malu tamba liafuan hirak ne’e. ²⁰ Sira barak dehan: “Diabu iha nia laran, Nia bulak: tansa imi rona Nia?” ²¹ Balun fali dehan: “Ema nebe iha diabu iha nia laran la koalia hanesan ne’e, diabu bele loke karik matan delek nia matan?”

Jesus fo sai katak nia Maromak Oan. Judeu sira hakribi nia.

                 ²² Iha Jerusalem sira halo dau-daun festa dedikasaun templu nian iha tempu malirin. ²³ Iha templu, Jesus la’o iha portiku Salomao nian. ²⁴ Judeu sira halibur hamutuk ho Nia hodi husu ba: “To’o wainhira O sei husik ami iha nakukun laran? O mak Kristu karik, hateten los kedas mai ami.” ²⁴ Jesus hatan ba sira: “Ha’u hateten ona ba imi, maibe imi la fiar. Hahalok sira nebe Ha’u halo hodi Ha’u Aman nia naran fo sasin kona ba Ha’u, ²⁶ maibe imi la fiar, basa imi la’os Ha’u nia bibi sira. ²⁷ Ha’u nia bibi sira rona Ha’u nia lia; Ha’u hatene sira, no sira tuir Ha’u. ²⁸ Ha’u fo ba sira moris rohan laek. Sira la lakon, no ema ida sei la bele hadau sira housi Ha’u nia liman. ²⁹ Ha’u Aman, nebe fo sira mai Ha’u, Nia boot liu ema hotu; no ema ida sei la bele hadau sira housi Aman nia liman. ³⁰ Aman ho Ha’u ida deit.” ³¹ Dala ida tan Judeu sira kaer fatuk atu tuda Jesus. ³² Nia dehan ba sira: “Ha’u hatudu ona ba imi hahalok diak barak nebe mai housi Aman: tan hahalok ida nebe mak imi tuda Ha’u?” ³³ Judeu sira hatan ba Nia: “Ami la tuda o tamba hahalok diak ruma, maibe tamba o koalia aat Maromak; tamba maski o ema deit, o halo an Maromak.” ³⁴ Jesus husu sira: “La hakerek iha imi nia eskritura, ‘ha’u dehan, imi sira ne’e maromak’? ³⁵ Ne’e duni, eskritura hanaran ‘maromak’ ema sira nebe Maromak nia liafuan to’o tiha, no ema ida la bele halakon eskritura, ³⁶ maibe ba Ida nebe Aman halo santu hodi haruka ba mundu, imi dehan ‘O koalia aat Maromak; tamba Ha’u dehan ‘Ha’u Maromak nia Oan’? ³⁷ Ha’u la halo karik Ha’u Aman nia hahalok, imi keta fiar Ha’u. ³⁸ Maibe, Ha’u halo karik, maski imi lakohi fiar Ha’u, imi fiar Ha’u nia hahalok sira, atu imi bele hatene no komprende katak Aman hela iha Ha’u no Ha’u iha Aman.” ³⁹ Tuir mai, sira buka atu kaer Jesus, maibe Nia halai housi sira nia liman. ⁴⁰ Nia fila fali ba mota Jordao nia sorin balun, fatin iha nebe uluk Joao sarani ema, hodi hela iha neba. ⁴¹ Ema barak mai hakbesik Nia, dehan: “Tebes, Joao la halo sinal ida, maibe buat hotu nebe Joao dehan kona ba ema ne’e, los duni.”  ⁴² No ema barak iha neba fiar Nia.