12

Mina morin ba Jesus iha Betania

                 ¹ Loron neen molok festa Paskua, Jesus ba Betania. Lazaro nebe Jesus halo moris hi’as housi mate horik iha neba. ² Sira fo han Jesus. Lazaro han hamutuk ho Nia. Marta serbi meja. ³ Maria fali hola mina morin buli ida ho folin boot hodi fase no hamaran Jesus nia ain ho fuuk, to’o mina morin nia iis hamorin uma laran tomak. ⁴ Eskolante sira ida, Judas Iscariotes. Simao nia oan, ida nebe atu saran Nia ba mate. husu: ⁵ “Tansa ita la fa’an mina morin ne’e ba denariu atus tolu, hodi fo osan ba ema kiak sira?” ⁶ Nia hateten buat ne’e la’os tan hanoin kiak sira, maibe tamba nia na’okten ida; dala barak nia foti housi sira hotu nia osan. nebe nia rai. ⁷ Jesus dehan: “Husik nia halo nune’e, hodi hanoin loron atu hakoi Ha’u. ⁸ basa kiak sira sei hela nafatin iha imi nia leet, maibe Ha’u sei la hela nafatin ho imi” ⁹ Rona tiha katak Nia iha neba, Judeu barak mai, la’os deit tamba Jesus, maibe mos atu hare Lazaro, nebe Nia halo moris hi’as housi mate. ¹⁰ Amlulik boot sira futu lia atu oho mos Lazaro, ¹¹ tamba hodi nia ema barak husik sira no fiar Jesus.

Jesus tama iha Jerusalem

                ¹² Liu tiha loron ida, ema lubun boot nebe ba festa rona katak Jesus hakbesik dau-daun ba Jerusalem. ¹³ Sira kaer ramos sanak sira no ba hasouru Nia, hodi haklalak: “Osana! Rahun diak ba Ida nebe mai hodi Na’i nia naran, Israel nia Liurai!” ¹⁴ Jesus hetan kuda burro oan ida hodi sa’e, nudar hakerek: ¹⁵ “Keta tauk, Siao nia oan feto; hare ba, o nia liurai to’o mai, sa’e kuda burro oan ida.” ¹⁶ Uluk eskolante sira la komprende buat ne’e; maibe wainhira Jesus simu ona gloria. mak sira hanoin fali katak ne’e hakerek tiha ona kona ba Nia. no katak sira halo tiha nune’e ba Nia. ¹⁷ Ema barak nebe hamutuk ho Jesus wainhira Nia bolu Lazaro sai housi rate hodi halo nia moris hi’as housi mate, fo sasin kona ba Nia. ¹⁸ Ema barak ba hasouru Nia tan sira rona katak Nia halo milagre ne’e. ¹⁹ Ne’e duni, fariseu sira hateten ba malu: “Hare ba, imi la bele halo buat ida; mundu tomak tuir Nia!”

Jesus fo sai kona ba nia mate

                ²⁰ Sira nebe ba adora iha loron festa, balun ema Gregu. ²¹ Sira ne’e hakbesik ba Filipe, ida nebe mai housi Betsaida iha Galileia, hodi dehan ba nia: “Na’i, ami hakarak hare Jesus.” ²² Filipe ba dehan ba Andre; hafoin Filipe ho Andre hato’o ba Jesus. ²³ Jesus hatan ba sira dehan: “Loron to’o ona atu Oan Mane simu gloria. ²⁴ Tebes, tebes, Ha’u dehan ba imi: trigu musan nebe monu ba rai la mate karik, nia hela mesak; maibe mate karik, nia fo fulin barak. ²⁵ Ema nebe hadomi nia moris, sei lakon nia moris ne’e; ema nebe hewai nia moris iha mundu ne’e sei rai hela nia ba moris rohan laek. ²⁶ Ema nebe serbi Ha’u, sei tuir Ha’u; no iha fatin nebe Ha’u hela, Ha’u atan mos sei hela neba. Ema nebe serbi Ha’u, Ha’u Aman sei hahi nia.”

                 ²⁷ “Oras ne’e Ha’u neon sala: Ha’u sei dehan los sa ida? ‘Aman, hadook tiha Ha’u housi oras ne’e?’ Lae; tan ne’e duni mak Ha’u mai to’o oras ne’e. ²⁸ Aman hahi Ita naran!” Lia ida mai housi lalehan, dehan: “Ha’u hahi tiha ona Nia, no Ha’u sei hahi tan Nia!” ²⁹ Ema lubun boot nebe hamriik iha neba rona lia ne’e no sira dehan katak ne’e rai tarutu ida. Balun dehan: “Anju ida mak koalia ba Nia.” ³⁰ Jesus hatan: “La’os tan Ha’u mak lia ne’e mosu, maibe tan imi. Ohin mak tesi lia ba mundu; ohin mos mak sei duni sai ona liurai mundu ne’e nian. ³² Wainhira ema foti Ha’u housi rai, Ha’u sei dada ema hot‑hotu mai Ha’u.” ³³ Nia koalia hanesan ne’e atu hatudu oin sa Nia sei mate. ³⁴ Ema barak hateten fali ba Nia: “Ami rona housi eskritura katak Kristu sei hela ba nafatin; oin sa mak o dehan katak ema sei foti Oan Mane? Se los mak Oan Mane ne’e?” ³⁵ Jesus hatan ba sira: “Naroman sei hela tan ho imi tempu uitoan deit. Imi la’o ba wainhira naroman sei hela ho imi keta nakukun ukun imi; basa ema nebe la’o iha nakukun laran la hatene nia ba nebe. ³⁶ Wainhira naroman sei hela ho imi, imi fiar naroman ba, atu imi sai naroman nia oan sira.”

                Koalia tiha nune’e, Jesus hadook An hodi subar housi sira.

Judeu sira la fiar Jesus

                 ³⁷ Maski Jesus halo milagre barak iha sira nia oin, sira la fiar Nia, ³⁸ atu halo tuir Profeta Isaias nia liafuan nebe dehan: “Na’i, se los mak fiar ami nia liafuan? Ba se los mak Na’i hatudu nia liman?” ³⁹ Tan ne’e, sira la bele fiar, basa Isaias dehan: ⁴⁰  “Nia halo tiha sira matan delek no laran tos, keta sira hare ho sira nia matan no hatene lo-los ho sira nia fuan, nune’e sira fila mai Ha’u hodi hetan isin diak.” ⁴¹ Isaias koalia nune’e tan nia hare Nia gloria no koalia kona ba Nia. ⁴² Na’i ulun barak fiar Nia, maibe tan sira tauk fariseu sira, sira la fo sasin, keta ema duni sai sira housi sinagoga, ⁴³ basa sira hadomi gloria housi ema liu fali gloria housi Maromak.

                ⁴⁴ Jesus dehan tan ho lia maka’as: “Ema nebe fiar Ha’u, la fiar Ha’u maibe ida nebe haruka Ha’u mai. ⁴⁵ No ema nebe hare Ha’u, hare Ida nebe haruka Ha’u mai. ⁴⁶ Ha’u mai iha mundu nudar naroman, atu ema nebe fiar Ha’u la bele hela iha nakukun laran. ⁴⁷ Ema ida rona karik Ha’u nia liafuan maibe la halo tuir nia, Ha’u la tesi lia hasouru nia; basa Ha’u la mai atu tesi lia hasouru mundu, maibe  atu soi mundu. ³⁸ Ema nebe hakribi Ha’u hodi la simu Ha’u nia liafuan, nia iha ona ida nebe sei tesi lia hasouru nia: Ha’u nia liafuan mak sei tesi lia hasouru nia iha loron ikus. ⁴⁹ Basa Ha’u la koalia hodi Ha’u nia kbiit rasik; maibe Aman nebe haruka Ha’u mai, Nia mak haruka Ha’u atu koalia sa los, no atu dehan sa. ⁵⁰ No Ha’u hatene katak Nia ukunfuan mak moris rohan laek. Ne’e duni, Ha’u koalia nudar Aman haruka Ha’u.”